ފުލުހުން ޑްރަގު ބޭނުންކޮށް، އޭގެ ވިޔަފާރިކުރާ ކަމަށް އައްބާސް ތުހުމަތުކޮށްފި
މަސްތުވާތަކެތީގެ ވިޔަފާރީގައި ފުލުހުން އުޅޭ ކަމަށާއި، ފުލުހުންގެ ތެރޭގައި ވެސް މަސްތުވާތަކެތި ބޭނުންކުރާ އޮފިސަރުން ތިބޭ ކަމަށް ރައްޔިތުންގެ މަޖިލީހުގެ ވެލިދާ ދާއިރާގެ އެމްޑީއޭ މެންބަރު މުހައްމަދު އައްބާސް މިއަދު ތުހުމަތު ކުރައްވައިފި އެވެ.
ސަރުކާރުގެ ފަރާތުން، ގަމު ދާއިރާގެ މެންބަރު ޔޫސުފް ނަޝީދު ހުށަހަޅުއްވާފައިވާ މަސްތުވާތަކެއްޗާ ބެހޭ ގާނޫނަށް އިސްލާހު ގެނައުމުގެ ބިލުގެ ބަހުސްގައި އައްބާސް ވިދާޅުވީ ރާއްޖޭގެ މުޖުތަމައުގައި އެންމެ ބޮޑު އެއް ވަބާ ކަމަށް މަސްތުވާތަކެތީގެ މައްސަަލަ ހައްލުނުވެގެން އުޅެނީ ގާނޫނުތައް ނެތިގެން ނޫން ކަމަށެވެ.
ޒުވާން އާބާދީގެ ގާތްގަނޑަކަށް 60 އިންސައްތަ މަސްތުވާތަކެތީގެ ވަބާގައި ޖެހި، މަގުމަތީގައި ދިރިއުޅެން މަޖުބޫރުވެފައިވާކަން ފާހަގަކުރައްވާ އައްބާސް ވިދާޅުވީ އެ މައްސަލަ ހައްލުކުރުމަށް އޮތް އެންމެ ބޮޑު ހުރަހަކީ ތަންފީޒީ އަދި ތަހުގީގީ މުއައްސަސާތަކުން އެންމެ އެކަށީގެންވާ ވަރަށް ޒިންމާ އަދާނުކުރެވޭތީ ކަމަށެވެ. އެއަށް ފަހު އައްބަސް ކުރެއްވީ ފުލުހުންނަށް ތުހުމަތުތަކެެވެ.
"ހަމަ ސީދާ ރަށްރަށުގެ ޕޮލިސް ސްޓޭޝަންތަކުގައި ތިބޭ ޕޮލިހުންވެސް އެ މަސްތުވާތަކެތީގެ ބޭނުންކުރައްވާ، އެ ބޭފުޅުންނަށް ގުޅިގެން މި ވިޔަފާރިކުރަނީ، މިކަމަށް އެބަޖެހޭ މޯލްޑިވްސް ޕޮލިސް ސާވީސް، ކޮމިޝަނާ އޮފް ޕޮލިސް ހޯމް މިނިސްޓަރު އެބަޖެހޭ ސަމާލުކަން ދޭން" އައްބާސް ވިދާޅުވި އެވެ.
އޭނާ ވިދާޅުވީ މަސްތުވާތަކެތީގެ ވިޔަފާރިކުރާ މައްސަލަތަކުގައި ހައްޔަރުކުރާ މީހުން ޖަލަށް ގެންދިއުމަށްފަހު މަދު ދުވަސްކޮޅެއްގެ ތެރޭގައި މިނިވަންވެގެންދާކަން ފާހަގަކުރައްވާ އައްބާސް ވިދާޅުވީ އަނެއްކާވެސް އެ މީހުން މަގުމައްޗަށް ނިކުންނަނީ "ބަލްކް ޝިޕްމަންޓެއް" ހިފައިގެން, ވިއްކާ ވިޔަފާރިކުރަން ކަމަށެވެ.
ޖުޑިޝަރީ ވަނީ ވަރަށް ބޮޑަށް ފެއިލްވެފައި ކަމަށާއި މަސްތުވާތަކެތީގެ ވިޔަފާރިކުރާ މީހުން އެތައް ފަހަރަކު ޖަލުގައި ހޭދަކުރުމަށްފަހު ހުކުމެއް ތަންފީޒުނުކޮށް މިނިވަންވާ ކަމަށެވެ.
އަދި އެކަމުގެ ނަތީޖާއަކީ އިތުރަށް މަސްތުވާތަކެއްޗަށް ދޮރުހުޅުވި, އިތުރު ޒުވާނުންތަކެއް އެކަމުގެ އަވާގައި ޖެއްސުން ކަމަށް އައްބާސް ވިދާޅުވި އެވެ. މަސްތުވާތަކެތީގެ ވަބާގައި ޖެހިފައިވާ އުމުރުން 12 އަހަރުގެ ކުދިންވެސް އެބަތިބި ކަމަށްވެސް އޭނާ ވިދާޅުވި އެވެ.
އައްބާސް ވިދާޅުވީ އަވަށްޓެރި ގައުމުތަކުން މަސައްކަތްތެރިން ރާއްޖެ ގެނައުމުގެ ބަދަލުގައި ރާއްޖޭގެ ޒުވާނުންނަށް ވަޒީފާތައް ލިބޭގޮތް ހަދަން ޖެހޭ ކަމަށެވެ.
"އަޅުގަނޑު މިއަދުވެސް ސަރުކާރަށް ގޮވާލަން މި ޖަނަވާރު ފެސިލިޓީއެއް ހަދާނެ ކަމެއް ނެތް, މާލޭގެ މިހިރަ މަގުތަކުގައާއި މާރުކޭޓުތަކުގައާއި އެހެރަ ސްޓޭޖްމަތީގައި ނިދާ ބޭފުޅުންނަށް ހިމާޔަތާއި އެ މީހުންނަށް ބޮވޭނެ ގޮތާއި އެކޮމެކޭޝަން ފެސިލިޓީއެއް ގާއިމުކޮށްދިނުން މާ މުހިއްމު ކަމަށް އަޅުގަނޑު ދެކެން"
ކިތަންމެ ރަނގަޅު ގާނޫނެއް މަޖިލީހުން ފާސްކޮށް ރައީސް ތަސްދީގުކުރެއްވި ކަމުގައި ވިޔަސް ތަންފީޒީ ބާރުތަކުން ގާނޫނުތަކުން އަމަލުނުކުރާހާ ހިނދަކު ދާއިމީ ހައްލު ނުލިބޭނެ ކަމަށް އައްބާސް ވިދާޅުވި އެވެ.
ކޯޓުތަކުގައި ނުނިމި ހުރި މައްސަލަތައް ފާހަގަކުރައްވަމުން އައްބާސް ވިދާޅުވީ 24 ގަޑިއިރު މަސައްކަތްކޮށްގެން ވިޔަސް އެ މައްސަލަތައް ނިންމަން ޖެހޭ ކަމަށެވެ. އަދި ވާނުވާ ބަންދުގައި ތިބެން ނުޖެހޭނެ ކަމަށާއި ވާނުވާ ބަންދުގައި ތިބި މީހުން ވީ އެންމެ އަވަހަކަށް ނެރެން ޖެހޭ ކަމަށް އައްބާސް ވިދާޅުވި އެވެ.
