މަސްތުވާތަކެތީގެ މައްސަލައެއްގައި ގަލޮޅުގައި ހުރި ގެއެއް ފުލުހުން ބަލާފާސްކުރަނީ
މަސްތުވާތަކެތީގެ މައްސަލައެއްގައި މާލޭގެ ގަލޮޅުގައި ހުރި ގެއެއް ފުލުހުން ބަލާ ފާސްކުރަމުން އެބަ ގެންދެއެވެ.
ފުލުހުން ބަލާފާސް ކުރަމުންދަނީ ގަލޮޅު "ޝީޝާ" ގޯޅި ތެރޭގައި ހުރި ގެއެއް ކަމަށް އެސަރަޙައްދުގައި ތިބި "ދެން" ގެ ރިޕޯޓަރުން މައުލޫމާތު ދީފައިވެއެވެ.
ފުލުހުން ރެއިޑް ކުރި ގޭގެ ތެރެއިން މަސްތުވާތަކެތި ކަމަށް ޝައްކުކުރެވޭ އެއްޗެހިތަކެއް ނެރުނު ކަމަަށް ވެސް މައުލޫމާތު ލިބިފައިވެއެވެ.
ފުލުހުންގެ މީޑިއާ އޮފިޝަލަކު "ދެން" އަށް މައުލޫމާތު ދެއްވަމުން ވިދާޅުވީ މޯލްޑިވްސް ޕޮލިސް ސާވިސް ގެ ޑްރަގް އެންފޯސްމަންޓު ޑިޕާޓްމަންޓުން ކުރިއަށް ގެންދާ އޮޕަރޭޝަނެއްގައި އެސަރަޙައަދުގައި ހުރި ގެއެއް ބަލާފާސް ކުރުމުގެ މަސައްކަތް ކުރަމުންދާ ކަމަށެވެ. މިކަމާއި ގުޅޭ އިތުރު ތަފްސީލު ފަހުން ދެއްވާނެ ކަމަށްވެސް ވިދާޅުވެފައިވެއެވެ.
މިފަހަކަށް އައިސް މަސްތުވާތަކެތީގެ މައްސަލަތައް އަނެއްކާވެސް އަންނަނީ ރާއްޖޭގައި ފެންމަތިވަމުންނެވެ.
އެގޮތުން މިއަދު ތ. ކިނބިދޫ އިން ވެސް މަސްތުވާތަކެއްޗާއެކު މީހަކު ހައްޔަރު ކޮށްފައިވާއިރު، އިއްޔެ ރ. މީދޫއިން ވެސް ވަނީ އުމުރުން 26 އަހަރުގެ ދިވެހި ފިރިހެނަކު ހައްޔަރު ކޮށްފައެވެ.
މީގެ އިތުރުން ހަމަ އިއްޔެ، މާލޭގެ ގެއެއް ބަލާފާސްކޮށް، ފުލުހުން ވަނީ ބިޔަރު ދަޅުތަކަކާއެކު ހަތް މީހަކު ހައްޔަރު ކޮށްފައެވެ.
