ކޮވިޑް-19: ރާއްޖެއިން އެންމެ ގިނައިން ފައްސިވެފައިވަނީ 30-45 އަހަރުގެ މީހުން!
ރާއްޖެއިން ކޮވިޑް-19 އަށް އެންމެ ގިނައިން ފައްސި ވެފައިވަނީ އުމުރުން 30-45 އަހަރުގެ މީހުން ކަމަށް ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
މިރޭ ކުރިއަަށްދިޔަ ނޫސްވެރިންގެ ބައްދަލުވުމުގައި އެޗްޕީއޭގެ އެޕިޑަމޮލޮޖިސްޓް ޑރ. އިބްރާހިމް އަފްޒަލް ހާމަ ކުރެއްވި ކޮވިޑްގެ ތަފާތު ހިސާބުތަކުން ދައްކާފައިވާ ގޮތުގައި، ރާއްޖޭގައި އެންމެ ގިނަ މީހުން ކޮވިޑަށް ފައްސި ވެފައިވަނީ ޒުވާން އުމުރު ފުރައިންނެވެ.
އެގޮތުން އެހިސާބުތަކުން ދައްކާ ގޮތުގައި އުމުރުން 30 އުމުރާއި 45 އަހަރުގެ 3230 މީހުން، ކޮވިޑަށް ފައްސި ވެފައިވެއެވެ.
ދެވަނައަށް އެންމެ ގިނައިން ބަލި ޖެހިފައިވަނީ އުމުރުން 18 އަހަރާއި 30 އަހަރާއި ދެމެދުގެ މީހުންނަށެވެ. މިއުމުރުފުރައިގެ 2363 މީހުން ބައްޔަށް ފައްސި ވެފައިވެއެވެ.
ތިންވަނައަަށް އެންމެ ގިނައިން ފައްސި ވެފައިވަނީ އުމުރުން 45 އަހަރާއި 60 އަހަރުގެ މީހުންނެވެ. މިއުމުރުފުރައިގެ 1144 މީހުން ކޮވިޑަށް ފައްސި ވެފައިވެއެވެ.
ކޮވިޑަށް ފައްސިވީ އެއް އަހަރު ނުފުރޭ ތުއްތު ކުދިންވެސް އެހާމެ ގިނައެވެ. އެގޮތުން 929 ތުއްތު ކުދިން މިހާރު މިބައްޔަށް ފައްސި ވެފައިވާ ކަމަަށް ތަފާތު ހިސާބު ތަކުން ދައްކައެވެ.
އަހަރު ނުފުރޭ ކުޑަކުދިން މިބައްޔަށް ފައްސިވީ މިންވަރު މިހުރީ ކަންބޮޑުވާ މިންވަރެއްގައި ކަމަށް ވެސް ޑރ. އަފްޒަލް ވިދާޅުވިއެވެ.
"މިއީ އަޅުގަނޑުމެން ވަކިން ވިސްނާލަން ޖެހޭ ކަމެއް. ހަމަ ގައިމުވެސް ކުޑަ ކުދިންނަށް ބަލި ޖެހޭނީ ކޮންމެވެސް އެހެން މީހެއްގެ ފަރާތުން. ކުޑަ ކުދިންނަށް ވެސް ރައްކާތެރިކަން ދެވޭނީ އަޅުގަނޑުމެންގެ އަމަލުތައް ރައްކާތެރިގޮތަކަށް ބަހައްޓައިގެން،" ޑރ. އަފްޒަލް ވިދާޅުވިއެވެ.
Ads by STO
