އުސޫލުތަކާ ހިލާފަށް މިފްކޯއަށް 700 މިލިއަނުގެ އޯވަޑްރާފްޓެއް ދުލެއް ނުކުރަން: ބީއެމްއެލް
އެ ބޭންކުގެ އާންމު އުސޫލުތަކާ ހިލާފަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އަށް 700 މިލިއަން ރުފިޔާގެ އޯވަޑްރާފްޓެއް ހަމަޖައްސައިދީފައި ނުވާނެ ކަމަށް ބޭންކް އޮފް މޯލްޑިވްސް (ބީއެމްއެލް) އިން ބުނެފި އެވެ.
"އަދަދު" ނޫހަށް ލިބިފައިވާ މައުލޫމާތަކާ ހަވާލާދީ އެ ނޫހުގައި އިއްޔެ ޝާއިއުކުރި ހަބަރެއްގައި ބުނެފައިވާ ގޮތުގައި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) މެދުވެރިކޮށް މަސްވެރިންނަށް ބީއެމްއެލުން އެ ކުންފުންޏަށް 700 މިލިއަން ރުފިޔާގެ އޯވަޑްރޯ ފެސިލިޓީއެއް ހަމަޖައްސައިދީފައިވާ ކަމުގަ އެވެ. އަދި އެ މެދުވެރިކޮށް ނަގާ ފައިސާ އަނބުރާ ދައްކަން ޝަރުތުކޮށްފައި ވަނީ ޑޮލަރުން ކަމުގަ އެވެ.
ބީއެމްއެލުން އިއްޔެ ނެރުނު ބަޔާނެއްގައި ބުނީ އެ ބޭންކުން 700 މިލިއަން ރުފިޔާގެ އޯވަޑްރާފްޓެއް އާންމު އުސޫލުތަކާ ހިލާފަށް ދޫކޮށްފައިވާ ކަަމަށް ބުނެ "އަދަދު" ނޫހުގައި ލިޔެފައިވާ ހަބަރަކީ ދޮގު ހަބަރެއް ކަމަށެވެ.
ބޭންކު ކަސްޓަމަރުންނަށް ހިދުމަތްދެމުން އަންނަނީ ބޭންކިން ގާނޫނާ އެ ގާނޫނުގެ ދަށުން ހެދިފައިވާ ގަވާއިދުތަކާއި އިންޓަނޭޝަނަލް ބެސްޓް ޕްރެކްޓިސްތަކާ އެއްގޮތްވާ ގޮތުގެ މަތިން ކަމަށް ބީއެމްއެލުން ފާހަގަކުރި އެވެ.
"މިގޮތުން ބަލްކް ޓްރާންސްފާގެ ހިދުމަތް ސަރުކާރުގެ އިދާރާތަކާއި ކުންފުނިތަކާއި އަމިއްލަ ކުންފުނިތަކާއި ވިޔަފާރިތަކަށް ދެމުން އަންނަނީ އާންމު އުސޫލުތަކާ އެއްގޮތަށެވެ،" ބީއެމްއެލުގެ ބަޔާނުގައި ބުނެފައިވެ އެވެ.
އިތުރަަށް ބުނީ އެ ބޭންކުގެ އެންމެ މަތީ މަސްލަހަތަކީ ޑިޕޮސިޓަރުންގެ ރައްކާތެރިކަން ކަމަށް ވާތީ އަބަދުވެސް އަމަލު ކުރަމުންދާނީ ބޭންކުން އަމަލު ކުރަމުންދާ ހަރުދަނާ އުސޫލުތަކާ އެއްގޮތަށް ކަމަށެވެ.
ބީއެމްއެލުން ވަނީ ބޭންކުގެ އިތުބާރު ގެއްލޭ ފަދަ ގޮތަށް ހަބަރު ޝާއިއުކޮށްފައިވާތީ އެކަން ކުށްވެރިކޮށްފަ އެވެ.
މިދިޔަ ހޯމަ ދުވަހު ރައީސް ޑރ. މުހައްމަދު މުއިއްޒު ވަނީ ވައުވެވަޑައިގެންނެވި ގޮތަށް އިއްޔެއިން ފެށިގެން ބީއެމްއެލްގައި އެކައުންޓް ހުޅުވާފައިވާ މަސްދޯނިތަކުން މިފްކޯއަށް ކިރުވާ މަހަށްވާ ފައިސާ 48 ގަޑިއިރުގެ ތެރޭގައި ދޫކުރަން ފަށާނެ ކަމަށް ވިދާޅުވެފަ އެވެ. އެކަން ކުރަނީ ފިނޭންސް މިނިސްޓްރީ އާއި މިފްކޯ އަދި ބީއެމްއެލް އާ ދެމެދު ވެފައިވާ އެއްބަސްވުމެއްގެ ދަށުން ކަމުގައި ފާހަގަކުރެއްވި އެވެ.
