ގުރުއާނުގެ އާޔަތްތަކަށް ޕީއެސްއެމުނން ބަދަލު ގެނައި ކަމަށް ބުނެ ކުއްލި މައްސަލައެއް
ކީރިތި ޤުރުއާނުގެ އާޔަތްތަކަށް ޕީއެސްއެމްއިން ބަދަލު ގެނައި ކަމަށް ބުނެ ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފި އެވެ.
އެ މައްސަަލަ ބަލައިގެންފައިވަނީ 70 މެންބަރުންގެ އިއްތިފާގުންނެވެ.
މަޖިލީހުގެ މިއަދުގެ ޖަލްސާއަށް ދެ މެންބަރަކު ކުއްލި މައްސަލަ ހުށަހެޅުއްވި އެވެ. އެއީ ކެންދޫ ދާއިރާގެ މެންބަރު މައުރޫފް ޒާކިރާއި ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމެވެ.
މަޖިލީހުގެ ގަވާއިދު ބުނާ ގޮތުން އެއް މައްސަލައަށް ވުރެ ގިނަ މައްސަލަ އެއް ޖަލްސާއަަކަށް ހުށަހަޅައިފިނަމަ ގުރުއަތުން އެއް މައްސަލަ ނަގަން ޖެހެ އެވެ. އެގޮތުން ގުރުއަތުން ނެގިފައިވަނީ މައުރޫފް ޒާކިރުގެ މައްސަލަ އެވެ.
އެ މައްސަލާގައި ބުނެފައިވަނީ ހަބަރާއި މައުލޫމާތާއި ކަން ހިނގަމުންދާ ގޮތް ރައްޔިތުންނަށް އަންގައިދިނުމަކީ ޕީއެސްއެމްއަށް ލާޒިމްކޮށްފައިވާ ކަމެއް ކަމަށެވެ. އެހެންނަމަވެސް ގުރުއާނުގެ އާޔަތްތަކަށް ބަދަލު ގެނެސް ޕީއެސްއެމްގެ ޗެނަލްތަކުން ދައްކަމުންދާކަން ފާހަގަކުރެވިފައިވާ ކަމަށް މައްސަލަ ހުށަހަޅުއްވަމުން މައުރޫފް ވިދާޅުވި އެވެ.
ޕަބްލިކް ސާވިސް މީޑިއާގެ ގާނޫނުގައި ހަމަހަމަކަން ގާއިމުކުރުމަކީ ޕީއެސްއެމްގެ އަދާކުރަން ޖެހޭ ޒިންމާއެއް ކަމަށާއި ހަމައެކަނި ފުރުސަތު ދެމުންދަނީ ސަރުކާރުގެ ކަންކަމަށް އެކަނި ކަމަށް އެ މައްސަލާގައި ފާހަގަކޮށްފައިވެ އެވެ.
އެ މައްސަލަ ހުށަހަޅާފައިވަނީ އެކަންކަމަކީ ރައްޔިތުންނާއި ގައުމުގެ މަސްލަހަތަށް ސީދާ އަސަރުކުރާ ފަދަ ބޮޑެތި ކަންކަމަށްވީ ހިނދު އެކަންކަން ސަރުކާރުގެ ސަމާލުކަމަށް ގެނައުމަށްޓަކައި ކަމަށް މައުރޫފް ވިދާޅުވި އެވެ.
ގުރުއާނަށް ބަދަލު ގެނެސް ޕީއެސްއެމްއިން ގެނެސްދިން ކަމަށް ބުނާ މައްސަލައަކީ ރައީސް ޑރ. މުހަައްމަދު މުއިއްޒު ދާދިފަހުން އއ އަތޮޅަށް ކުރެއްވި ދަތުރުފުޅުގައި އެ އަތޮޅު ރަސްދޫގައި ބޭއްވި ޖަލްސާ ފެއްޓެވުމަށް ޤުރުއާން ކިޔެވިއިރު އެ އާޔަތުގައި ހިމެނޭ "ފާސިގު" ލަފްޒު އުނިވެފައިވާ ކަމަށް ބުނާ މައްސަލައެކެވެ.
އެހެންނަމަވެސް އެކަން ދިމާވެފައިވަނީ ލައިވް މައްސަލައެއް ދިމާވެގެން ކަން މައުލޫމާތު ލިބިފައިވެ އެވެ.
Ads by STO
