ގޯތި ވައްކަމުގެ ޒިންމާ މިނިސްޓްރީން ނަގާކަށް ނުޖެހޭނެ: ހައިދަރު
އުސޫލާ ހިލާފަ ގޯއްޗާއި، ފްލެޓް ދިނުމުގައި އެއްވެސް ބައިވެރިވުމެއް ނޯންނާނެ ކަމަށް ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓަރު ޑރ އަލީ ހައިދަރު އަހުމަދު މިއަދު ވިދާޅުވެއްޖެ އެވެ.
"ބިންވެރިޔާ" އަދި "ގެދޮރުވެރިޔާ" ސްކީމުގެ ދަށުން ގޯއްޗާއި ފްލެޓް ނުލިބޭ ބަޔަކަށް، ގަވާއިދާ ހިލާފަށް އެޗްޑީސީން ހުޅުމާލޭން ގޯތިތަކާއި، ވިނަރެސް ފްލެޓްތަކެއް ދިން މައްސަލައެއް ވަނީ ފެންމަތިވެފަ އެވެ. އަދި އެ މައްސަލައިގެ ޖިނާއީ ތަހުގީގެއް ފުލުހުން ވަނީ ފަށާފަ އެވެ. ފުލުހުން ބަލަމުންދަނީ ޑޮކިއުމެންޓް ފޯޖް ކުރި މައްސަލަ އެކެވެ.
ގޯތިތަކާ ގުޅިގެން ހައުސިން މިނިސްޓްރީ އާއި އެޗްޑީސީ އާ ދެމެދު ސިޓީތަކެއް ބަދަލުކޮށްފައިވާއިރު، ތަހުގީގަށް ބޭނުންވާ ލިޔެކިޔުންތައް ހައުސިން މިނިސްޓްރީން މިހާތަނަށް ލިބިފައިވާ ކަމަށް ފުލުހުން ވަނީ ބުނެފަ އެވެ.
އެ މައްސަލައާ ގުޅިގެން ކޮމެންޓެއް ހޯދަން 'ދެން' އިން ގުޅާލުމުން ހައިދަރު ވިދާޅުވީ، ޑޮކިއުމެންޓް ފޯޖް ކުރިކަން މީގެ ކުރިން އެނގިވަޑަިގެންފައިވާ ނުވާ ކަމަށެވެ. ނަމަވެސް އެއް ބިމަކަށް ދެ މީހަކު ކުރިމަތިލީ މައްސަލައެއް މިނިސްޓްރީން ބަލާފައިވާނެ ކަމަށް ހައިދަރު ވިދާޅުވި އެވެ. އަދި ވިދާޅުވީ، އެއީ މައްސަލަ ޖެހިގެން އުޅޭ ބިންތަކުގެ ތެރެއިން ބިމެއް ކަމަށެވެ.
އެ މައްސަލައާ ގުޅުންހުރި އިތުރު ތަފްސީލެއް ހައިދަރު ނުދެއްވަ އެވެ.
ހައިދަރު އިތުރަށް ވިދާޅުވީ، "އެ މައްސަލައިގައި އަޅުގަނޑުގެ އެއްވެސް އިންވޯލްމަންޓެއް ނޯންނާނެ،" ކަމަށެވެ. އަދި އެކަމުގައި މިނިސްޓްރީން ޒިންމާ ނަގަން ޖެހޭނެ ކަމަށް ގަބޫލު ނުކުރައްވާ ކަމަށް ވެސް ވިދާޅުވި އެވެ.
"އަޅުގަނޑުމެންނެއް ނޫނެއް ނުންތޯ ޑޮކިއުމެންޓް ފޯޖް ކޮށްގެން މިއުޅެނީ. އެހެންވީމަ ކީއްވެތޯ މިނިސްޓްރީއިން ޒިންމާ ނަގަން ޖެހޭނީ،" ހައިދަރު ވިދާޅުވި އެވެ.
ހައިދަރު އެހެން ވިދާޅުވެފައިވާއިރު، ފުލުހުންގެ ތަހުގީގަށް ވަނީ ތަހުގީގަށް މިނިސްޓްރީގެ ޑޭޓާ ބޭސް އެއްކޮށް ގެންގޮސްފަ އެވެ.
އެ މައްސަލައާއި ގުޅިގެން މައުލޫމާތު ހިއްސާކުރުމަށް އިސްކަންދަރު ބިލްޑިންގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، ސުޕްރިޑަންޓް އޮފް ޕޮލިސް ރަޖުނީ ޝުއައިބު ވިދާޅުވީ، އެ މައްސަލައާ ގުޅުންހުރި ޑިޖިޓަލް ހެކިތައް ފުލުހުންގެ ބެލުމުގެ ދަށަށް ގެންދެވި، ތަހުލީލު ކުރެވެމުންދާ ކަމަށެވެ.
ގޯތި ވައްކަމުގެ މައްސަލައިގައި ސަރުކާރުގެ އިސްވެރިންގެ ބައިވެރިވުން އެބައޮތް ކަމަށާއި، އިސްވެރިން ހައްޔަރު ކުރުމަށް ގޮވާލާ މިއަދު އާއްމުންގެ ބަޔަކު ވަނީ މުޒާހަރާ ވެސް ކޮށްފަ އެވެ.
އެ މައްސަލަ ބެލުން ލަސްވި ސަބަބާ މެދު ސުވާލު އުފައްދައި ޒިންމާވާން ޖެހޭ ފަރާތްތަކާ މެދު ފިޔަވަޅު އަޅަން އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ވަނީ ގޮވާލައިފަ އެވެ.
މިދިޔަ ބުރާސްފަތި ދުވަހު ބޭއްވި އެ ޕާޓީގެ ނޫސްވެރިންގެ ބައްދަލުވުމުގައި ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ ހައުސިން މިނިސްޓްރީއަށް އެނގުނު ހިސާބުން މައްސަލަ އާ މެދު ފިޔަވަޅު ނޭޅި ދިގުދެމިގެން އައި އައުމަކީ ސުވާލު އުފެދޭ ކަމެއް ކަމަށެވެ.
މައްސަލަ އާ ގުޅިގެން ހައުސިން މިނިސްޓަރު ހައިދަރު އިސްތިއުފާ ދެއްވަން ޖެހޭނެ ކަމަށާ އަދި މައްސަލަ ނިމެންދެން މަގާމުން ސަސްޕެންޑްކުރަން ޖެހޭނެ ކަމަށް ވެސް އެމްޑީޕީއިން ގޮވާލައިފައިވެ އެވެ.
