ޒުހޫރުގެ ސިޓީއެއް ނުލިބޭ، މައްސަލަ ބަލަން ފުލުހުންނަށް އެންގީ އަޅުގަނޑު: ރައީސް
ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ) ގެ ކުރީގެ މެނޭޖިން ޑިރެކްޓަރުގެ މަގާމަށް އިބްރާހިމް ފަޒުލް ރަޝީދު އައްޔަން ކުރެއްވުމާއެކު، އުސޫލުތަކާ ހިލާފަށް އޭނާ ހިންގަމުން ދިޔަ މައްސަލަތައް ބަޔާންކޮށް އެ ކުންފުނީގެ ކުރީގެ ޗެއާމަން އަހުމަދު ޒުހޫރު ސިޓީއެއް ލިބިވަޑައިގެންފައިވާ ކަމަށް ދެކެވޭ ވާހަކަތައް ރައީސް ޑރ މުހައްމަދު މުއިއްޒު ދޮގުކުރައްވައިފި އެވެ.
ސޯޝަލް މިޑީއާގައި، ޖުލައި މަހު ޒުހޫރު ފޮނުވި ސިޓީގެ ކޮޕީއެއް ދައުރުވަމުންދާއިރު އެ ސިޓީގައި ޒުހޫރު ވިދާޅުވީ ޗެއާމަންގެ މަގާމަށް އޭނާ އައްޔަން ކުރީ އުސޫލުތައް ބަދަލުކޮށް ތިލަފުށިން ބިމެއް ބަދަލު ކުރި ވާހަކާ އާއި ފަޒުލްގެ އަނބިކަނބަލުންނަށް ހުޅުމާލެއިން ބިމެއް ދިން ވާހަކަ އާއި ވިޔަފާރިވެރިންގެ ޝަކުވާ އެޗްޑީސީގެ މެނޭޖުމެންޓާ މެދު ގިނަވެފައިވާ ދުވަސްވަރެއްގައި ކަމަށްވުމުން އެންމެ ބޮޑު އިސްކަމެއް ދެއްވީ އެ ކަންކަން ހައްލު ހޯދައިދޭން ކަމަށެވެ.
އަދި އެ ވާހަކަތައް ފަޒުލްއާ ހިއްސާކުރުމުން އޭނާ ރުޅި އިސްކުރެއްވި ކަމަށް ޒުހޫރުގެ ސިޓީގައި ވިދާޅުވެފައިވެ އެވެ.
އެޗްޑީސީން ޝަރުުތު ހަމަނުވާ ބަޔަކަށް ގޯތި ދިން މައްސަލަ ފެންމަތިވެ އެކަން ތަހުގީގުކުރަން ފަށާފައިވާއިރު، އެކަމާ ގުޅިގެން ފުރަތަމަ ފަހަރަށް މިޑީއާ ވާހަކަ ދައްކަވަމުން ރައީސް ވިދާޅުވީ އެމަނިކުފާނަށް ސިޓީއެއް ލިބިވަޑައިގެންނެވި ނަމަ ފިޔަވަޅު އަޅުއްވާނެ ކަމަށެވެ.
"ތި ވިދާޅުވާ ސިޓީ (ޒުހޫރުގެ ސިޓީ) އެއް ނުލިބޭ، އަޅުގަނޑަށް ލިބުނު ނަމަ އެއަށް އަމަލުކުރާނަން، ބަލާނަން... އަޅުގަނޑަށް ލިބި (ސިޓީ) އަމަލުނުކޮށް އޮތް ކަމަށް ދައްކާ ވާހަކަ އަކީ ހަގީގަތެއް ނޫން" ރައީސް މުއިއްޒު ވިދާޅުވީ ކޮރަޕްޝަންގެ އަމަލުތައް ހުއްޓުވަން މިއަދާ ހަމަޔަށް ފަހަތަށް ޖެހިވަޑައިގެންފައިނުވާ ކަމަށެވެ.
"މިއަދާ ހަމަޔަށްވެސް ހުންނާނީ އެކި ތަންތަނުގައި ނުވަތަ އެކި މީހުން އެގޮތަށް ކޮށްފައި ހުރިކަންކަމުގައި މައުލޫމާތު ލިބުނީމަ ފިޔަވަޅު އަޅަން ކަމާ ބެހޭ ފަރާތްތަކަށް ދަންނަވާފައި" އެމަނިކުފާނު ވިދާޅުވީ ބޭނުންފުޅުވެވަޑައިގަންނަވީ މި ސަރުކާރަކީ ކޮރަޕްޝަނާ ފަސާދައާ ދުރުވެފައިވާ ސަރުކާރަކަށް ހެއްދެވުން ކަމަށެވެ.
އަދި ވިދާޅުވީ ވަގު ގޯތި މައްސަލަވެސް އެނގިވަޑައިގެންނެވި ހިސާބުން ކަމާ ބެހޭ ފަރާތްތަކަށް އެކަން ތަހުގީގުކުރަން އެންގެވި ކަމަށެވެ.
"މިހާރު މި ހިނގައިގެން އުޅޭ ކަންތަކުގައި އަޅުގަނޑަށް އެނގުނު ހިސާބުން އަޅުގަނޑު ވާނީ ޕޮލިހަށް އަންގަވާފައި، ބޭފުޅުންގެ (ފުލުހުން) ގެ ގާނޫނީ ޒިންމާ އެ ބޭފުޅުން އެ އަދާ ކުރައްވަނީ" ރައީސް ވިދާޅުވި އެވެ.
ސަރުކާރުގެ ވެރިންނަށް ނުއަގުގައި އެޗްޑީސީން ބިން ވިއްކި ކަމަށް ބުނެ ސޯޝަލް މީޑިއާގައި ފެތުރެމުންދާ ވާހަކަތަކާ ގުޅިގެން އެޗްޑީސީން ރޭ ނެރެނު ނޫސް ބަޔާނެއްގައި ވަނީ އުސޫލާ ހިލާފަ ބިން ވިއްކާ ކަމަށް ބުނާ ވާހަކަތައް ދޮގު ކޮށްފަ އެވެ.
އެޗްޑީސީން ބުނީ ދިރިއުޅުމުގެ ބޭނުމަށް ހުޅުމާލޭން ބިން ވިއްކާފައި ވަނީ އާންމުކޮށް އިއުލާނުކުރުމާ އެކު، ހުޅުވާލެވިފައިވާ ބިޑިން ޕްރޮސެސްއެއްގެ ތެރެއިން ކަމަށެވެ.
އަދި ބިން ގަތުމުގެ ފުރަތަމަ މަރުހަލާއަކީ ކަނޑައެޅޭ ބިމަކަށް އެކްސްޕްރެޝަން އޮފް އިންޓަރެސްޓް (އީއޯއައި) ހުށަހެޅުން ކަން އެ ކޯޕަރޭޝަނުން ފާހަގަކުރި އެވެ.
އެ މައްސަލާގައި އެޗްޑީސީގެ ޗެއާމަން އަހްމަދު ނާސިފް ފިޔަވައި ޑިރެކްޓަރުންގެ ބޯޑު މެންބަރުން ސަސްޕެންޑްކޮށް, އެމްޑަބްލިޔުއެސްސީން ފަޒީލް ސަސްޕެންޑްކުރި އެވެ.
ސަސްޕެންޑް ކޮށްފައިވަނިކޮށް ރޭގެ ވަގުތެެއްގައި އެޗްޑީސީގެ މެނޭޖިން ޑިރެކްޓަރުގެ މަގާމުން ފަޒުލް ވަނީ އިސްތިއުފާ ދެއްވާފަ އެވެ.
