ވިއްސާރާގައި މާލޭ 30 ގެއަކަށް ގެއްލުން ލިބުނު: އެންޑީއެމްއޭ
މިދިޔަ ހޮނިހިރު ދުވަހުކުރި ވިއްސާރައިގައި މާލޭގައި ހިނގި ފެންބޮޑުވުމުގެ ހާދިސާ އާ ގުޅިގެން އެސެސްމަންޓް ހަދަން ޖެހޭ ކަމަށް ފާހަގަކުރެވުނު 30 ގެއެއްގެ ޑެމޭޖް އެސެސްމެންޓް ހަދާފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ބުނެފި އެވެ.
މި މަހު މާލެ އާއި ރާއްޖޭގެ އެކި ސަރަހައްދުތަކަށް ކުރި ވިއްސާރައިގެ އަދާހަމަ ހާމަކޮށް އެންޑީއެމްއޭއިން މިއަދު ބުނީ މިދިޔަ ހަފުތާގެ އަންގާރަ ދުވަހުގެ ކުރި ވިއްސާރައިގައި ބޯކޮށް ވާރޭވެހި ފެންބޮޑުވުމާ ގުޅިގެން 3 ރަށަކުން ރިޕޯޓުކޮށްފައިވާ ކަމަށެވެ. އެއީ ނ. ހެނބަދޫ އާއި އެ އަތޮޅު ކެނދިކުޅުދޫގެ އަދި ޅ. ކުރެންދޫން ކަމަށެވެ.
ހެނބަދޫން ގާތްގަނޑަކަށް 80 ގެއަކަށް ފެންވަދެ ގެއްލުންވި ކަމަށް ރިޕޯޓުކުރި ނަމަވެސް އެއްވެސް ގެއަކުން މީހަކު ބަދަލުކުރަން ޖެހޭ ހާލަތަށް ގޮސްފައި ނުވާ ކަމަށެވެ.
އެ ރަށުގައި ފެން ހިއްކުމުގެ މަސައްކަތުގައި މޯލްޑިވްސް ނޭޝަނަލް ޑިފެންސް ފޯސްގެ ނޮދަން އޭރިއާއިން ހަރަކާތްތެރިވެފައިވާ ކަމަށް އެންޑީއެމްއޭއިން ބުންޏެވެ.
އަދި ރެޕިޑް އެސެސްމެންޓް ހެދުމާއި ނަފްސާނީ ފުރަތަމަ އެހީ ބޭނުންވާ ފަރާތްތަކަށް އެހީ ފޯރުކޮށްދިނުމަށް ދިވެހި ރެޑް ކްރެސެންޓުގެ ވެލިދޫ ދަރުމަވެރިން އެހީތެރިކަން ފޯރުކޮށްދީފައިވާ ކަމަށެވެ.
"ހެނބަދޫގައި ފެންވަދެ ގެއްލުން ލިބިގެން ޑެމޭޖް އެސެސްމެންޓް ހެދުމަށް ފަހު 27 ގެއެއްގެ ފޯމު މިހާރު ވަނީ މި އޮތޯރިޓީއަށް ލިބިފައި. މި ފޯމުތައް ވެރިފައިކޮށް ޕްރޮސެސް ކުރުމުގެ މަސައްކަތް މިހާރު ކުރިއަށް އެބަދޭ. މި ގެތަކަށް ލިބުނު ގެއްލުންތަކުގެ ތެރޭގައި ހިފާ ގެންގުޅޭ ތަކެއްޗާއި އިމާރާތަށް ލިބުނު ގެއްލުންތައް ހިމެނޭ،"
އެންޑީއެމްއޭއިން ބުނި ގޮތުގައި ހެނބަދޫ ފިޔަވައި އިތުރު ރަށަކުން އެ ދުވަހުގެ ވިއްސާރައިގައި ގެއްލުން ލިބިގެން ޑެމޭޖް އެސެސްމެންޓެއް ފޮނުވާފައި ނުވާ ކަމުގަ އެވެ.
މިދިޔަ ހޮނިހިރު ދުވަހު މާލޭގައި ހިނގި ފެންބޮޑުވުމުގެ ހާދިސާ އާ ގުޅިގެން އެ އޮތޯރިޓީ އާއި ސިފައިންނާއި ފުލުހުން އަދި ރެޑް ކްރެސެންޓުގެ ހޮޓްލައިންތަކަށް 98 ކޯލް ލިބުނު ކަމަށް އެންޑީއެމްއޭއިން ބުންޏެވެ.
އޭގެ ތެރޭގައި ހިމެނެނީ ވެލިބަސްތާ ޖައްސައިދިނުމަށް އެދި 70 ކޯލަކާއި ގެއްލުންތައް ރިޕޯޓް ކުރުމަށް ކުރި 21 ކޯލެއްގެ އިތުރުން ސީދާ ޒަރޫރީ އެހީތެރިކަމަށް އެދި ކުރި 7 ކޯލެކެވެ.
ފެން ވަނުން ކޮންޓްރޯލް ކުރުމަށް ސިފައިންނާއި މާލެ ސިޓީ ކައުންސިލާއި ޕަބްލިކް ވޯކްސްގެ އެހީތެރިކަމާ އެކު 49 ތަނެއްގައި 304 ވެލިބަސްތާ ޖެހި ކަމުގަ އެވެ. އޭގެ ތެރޭގައި ގެތަކާއި ގުދަނާއި ފިހާރަ ފަދަ ތަންތަން ހިމެނޭ ކަމުގަ އެވެ.
އެންޑީއެމްއޭއިން ބުނީ ފެންބޮޑުވުމާ ގުޅިގެން ވަގުތުން އެހީތެރިކަން ބޭނުންވާ ކަމަށް ފާހަގަ ކުރެވުނު 12 ގޭބީސީއެއްގެ ރެޕިޑް އެސެސްމެންޓް ދިވެހި ރެޑް ކްރެސެންޓުގެ އެހީތެރިކަމާ އެކު ހެދުނު ކަމަށެވެ.
އޭގެ ތެރެއިން 8 ގޭބީސީއެއްގެ 32 މީހުންނަށް އެއް ދުވަހުގެ މުއްދަތަށް ވަގުތީ ބޯހިޔާވަހިކަމާއި ކެއިންބުއިން ހަމަޖައްސައިދެވުނު ކަމަށެވެ.
"މި ފަރާތްތަކަށް ވަގުތީ ބޯހިޔާވަހިކަން ހަމަޖެއްސީ ކައްކައި ކައިބޮއި ހެދުމަށާއި ނިދާ ފާހާނާ ކުރެވޭނެ ގޮތެއް ނެތުމާއި ވަގުތީ ގޮތުން އެ ތަންތަނުގައި ދިރިއުޅެވޭނެ ހާލަތެއް ނެތުމުގެ ސަބަބުން. އަދި މި އާއިލާތައް މިހާރު ވަނީ އާންމު ހާލަތަށް ރުޖޫއަވެފައި،"
ފެންބޮޑުވުމުގެ ހާދިސާ އާ ގުޅިގެން އެސެސްމަންޓް ހަދަން ޖެހޭ ކަމަށް ފާހަގަކުރެވުނު 30 ގެއެއްގެ ޑެމޭޖް އެސެސްމެންޓް، ރެޑް ކްރެސެންޓާ ގުޅިގެން ނިންމާފައިވާ ކަމަށް އެންޑީއެމްއޭއިން ބުންޏެވެ.
ގެތަކަށް ލިބުނު ގެއްލުންތަކުގެ ތެރޭގައި ގިނަ ކަމަށް ފާހަގަކުރެވެނީ ހިފާ ގެންގުޅޭ ތަކެއްޗަށް ލިބުނު ގެއްލުން ކަމަށާއި މަދުމަދުން އިމާރާތުގެ ސީލިން ފަދަ ތަންތަނަށް ލިބިފައިވާ ގެއްލުން ވެސް ފާހަގަކުރެވޭ ކަމަށެވެ.
މިހާރު ކުރިއަށް ދަނީ ފޯމުތައް ވެރިފައިކޮށް، ޕްރޮސެސް ކުރުމުގެ މަސައްކަތްކަން ވެސް އެންޑީއެމްއޭއިން ފާހާގަކުރި އެވެ.
