ޕީއެސްއެމްގެ ޗެއާޕާސަންގެ މަގާމަށް ނަމްޒާ އައްޔަންކޮށްފި
ޕަބްލިކް ސާވިސް މީޑީއާ (ޕީއެސްއެމް) ޗެއާޕާސަންއަކަށް, މަޝްހޫރު ޕްރެޒެންޓަރު އާމިނަތު ނަމްޒާ އައްޔަންކުރައްވައިފި އެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން "އެކްސް" ގައި މިއަދު ކުރި ޕޯސްޓެއްގައި ބުނީ ޕީއެސްއެމްގެ ޑިރެކްޓަރުންގެ ބޯޑުގެ މެންބަރު ކަމަށާއި ޗެއާޕާސަން ކަމަށް މ. ހަނީކޯމްބް، އާމިނަތު ނަމްޒާ އައްޔަންކޮށްފައިވާ ކަމަށެވެ.
އެކަން "ދެން" އަށް ކަށަވަރު ދެއްވަމުން ނަމްޒާ ވިދާޅުވީ މިއަދު ރަސްމީ ސިޓީ ލިބިފައިވާ ކަމަށެވެ.
ނަމްޒާ ވަނީ ދައުލަތުގެ މީޑިއާގައި ގިނަ އަހަރުތަކެއް ވަންދެން ޕްރޮގްރާމްތައް ހުށަހަޅުއްވާ ދެއްވާފަ އެވެ.
ނަމްޒާ އެ މަގާމަށް އައްޔަންކޮށްފައިވާއިރު، އެންމެފަހުން ނަމްޒާ އަދާކުރައްވާފައިވަނީ ސިޓީސް, ލޯކަލް ގަވަމަންޓް އެންޑް ޕަބްލިކް ވޯކްސް މިނިސްޓްރީގެ ޑެޕިއުޓީ މިނިސްޓަރުގެ މަގާމެވެ. މި ސަރުކާރުގައި ނަމްޒާ ފުރަތަމަ އައްޔަންކުރެއްވީ ޖެންޑާ, ފެމިލީ އެންޑް ސޯޝަލް ސާވިސް މިނިސްޓްރީގެ ޑެޕިއުޓީ މިނިސްޓަރުގެ މަގާމަށެވެ.
ނަމްޒާ އެ މަގާމަށް އައްޔަންކުރެއްވިއިރު، ޕީއެސްއެމްގެ މެނޭޖިން ޑިރެކްޓަރުގެ މަގާމަށް އެ ކުންފުނީގެ ސޭލްސް އެންޑް މާކެޓިން ޑިރެކްޓަރުގެ މަގާމުގައި ހުންނެވި އިބްރާހީމް ނަސްރީން (ނައްޓު) އިއްޔެ ވަނީ އައްޔަންކުރައްވާފަ އެވެ.
ޕީއެސްއެމްއަށް ގިނަ އަހަރުތަކެއް ވަންދެން ހިދުމަތްކޮށް ދެއްވަމުން ގެންދަވާ ނަސްރީންއަކީ މި ސަރުކާރުން އެ ކުންފުންޏަށް އައްޔަންކުރި 3 ވަނަ މެނޭޖިން ޑިރެކްޓަރެވެ.
ޕީއެސްއެމްގެ މެނޭޖިން ޑިރެކްޓަރުގެ މަގާމާ ފުރަތަމަ ހަވާލުވެވަޑައިގެންނެވީ ބްރޯޑްކާސްޓިން ކޮމިޝަނުގެ ކުރީގެ މެންބަރު ޒީނާ ޒާހިރެވެ. މަގާމާ ހަވާލުވެވަޑައިގެންނެވިތާ 9 މަސް ފަހުން މިދިޔަ އޮގަސްޓު މަހުގެ 24 ވަނަ ދުވަހު ޒީނާ މަގާމުން އިސްތިއުފާ ދެއްވި އެވެ.
އޭނާއަށް ފަހު އެ މަގާމަށް އައްޔަންކުރެއްވި މުހައްމަދު ސައީދު އިސްތިއުފާ ދެއްވީ މިދިޔަ ހަފުތާގެ އަންގާރަ ދުވަހު އެވެ.
