ފްރާންސުގެ އާއިލާ އަންނަ މަހު ފުރުވާލެވޭތޯ ބަލަނީ
ވިސާއެއް ނެތި 12 ވަރަކަށް އަހަރު ވަންދެން ގަވާއިދާ ހިލާފަށް ރާއްޖޭގައި އުޅެމުން ދިޔަ ފްރާންސުގެ މުސްލިމު އާއިލާ އަންނަ މަހު ފުރުވާލުމުގެ މަސައްކަތް ކުރަމުންދާ ކަމަށް ކޮންޓްރޯލާ އޮފް އިމިގްރޭޝަން މުހައްމަދު ޝަމްއާން މިއަދު ވިދާޅުވެއްޖެ އެވެ.
ތ ވޭމަންޑޫގައި އުޅެމުންދާ 6 މީހުންގެ އާއިލާގެ ވާހަކަ މީޑިއާތަަކަށް ތިލަވީ މި މަހު ކުރީކޮޅު އެވެ. އެ މައްސަލަ ބަލަމުންދާކަން ހާމަކުރަމުން މީގެ ކުރިން ކުރި ޓްވީޓެއްގައި ޝަމްއާން ވިދާޅުވީ ރާއްޖެއަށް ނާދެވޭ ގޮތަށް އެ އާއިލާ ޑިޕޯޓްކުރުމުގެ މަސައްކަތް ފަށާފައިވާ ކަމަށެވެ.
ރާއްޖޭގެ ރަށްވެހިކަން ނުލިބޭނަމަ އާއިލާއިންވެސް އިމިގްރޭޝަންގައި އެދުނީ ފުރޭނެ ގޮތް ހަމަޖައްސައި ދިނުމަށެވެ. އިމިގްރޭޝަންގެ ގާނޫނު އޮންނަ ގޮތުން ގަވާއިދާ ހިލާފަށް އުޅޭ ބަޔަކު ރާއްޖޭގެ ރަށްވެހިކަމަށް ޝަރުުތުހަމައެއް ނުވެ އެވެ. އެ އާއިލާގެ އެއްވެސް މީހެއްގެ އަތުގައި ޕާސްޕޯޓެއްވެސް ނެތެވެ.
އެ ކޭސްގެ އެންމެ ފަހުގެ މައުލޫމާތު ހިއްސާކުރަމުން ޝައްމާން "ދެން" އަށް ވިދާޅުވީ މިހާރު ކުރިއަށް ދަނީ ފޮރިން މިނިސްޓްރީ މެދުވެރިކޮށް އެ މީހުންގެ ޕާސްޕޯޓް ހެެއްދުމުގެ މަސައްކަތް ކަމަށެވެ. ޖެނުއަރީ މަހުގެ ތެރޭގައި އެ މީހުންގެ ޕާސްޕޯޓް ލިބި، އެ މީހުން ބޭނުންވާ ގައުމަކަށް ފުރުވާލެވޭނެ ކަމަށް ޝަމްއާން ވިދާޅުވި އެވެ. އެ އާއިލާ މިހާރު ތިބީ މާލޭގަ އެވެ.
".... އުއްމީދުކުރަނީ ޖެނުއަރީ ތެރޭގައި ޑޮކިއުމެންޓް ހަމަޖެހޭނެ ކަމަށް. އޭރުން އެ މީހުން ބޭނުންވާ ގައުމަކަށް ފުރުވާލަދޭނެ" ކޮންޓްރޯލާ ވިދާޅުވި އެވެ.
އެ އާއިލާ ފުރުވާލާނެ ކަމަށް ޝައްމާން ވިދާޅުވެފައިވާއިރު އާއްމުންގެ ކަންބޮޑުވުންވެސް އެކަމުގައި އެބަ އޮތެވެ. ގިނަ ބަޔަކު ދެކޭ ގޮތުގައި އެ އާއިލާއަށް ރަށްވެހިކަން ދޭން ޖެހެ އެވެ. އެހެން ނޫނީ ރާއްޖެއިން ހިމާޔަތް ދޭން ޖެހެ އެވެ. އާއިލާއަށް ބޭނުންވާ ގާނޫނީ އެހީތެރިކަން ފޯރުކޮށް ދިނުމުގެ މަސައްކަތް ކުރީގެ ދެ ބަންޑާރަ ނައިބުން ކަމަށްވާ އާޒިމާ ޝަކޫރާއި ފާތިމަތު ދިޔާނާ ސައީދު ފެއްޓެވި އެވެ. އޭގެ އިތުރު ތަފްސީލެއް ދެ ބޭފުޅުންވެސް ނުދެއްވަ އެވެ.
