ބިދޭސީން ކޮންޓްރޯލްކުރާ ލޯކަލް މާރުކޭޓްގައި ބޮޑު ރެއިޑެއް: 23 ބިދޭސީން އަތުލައިގެންފި
ބިދޭސީންގެ ބޮޑު ކޮންޓްރޯލެއް އޮންނަ މާލޭގެ ލޯކަލް މާރުކޭޓުގައި އިމިގްރޭޝަނުން ބޮޑު ރެއިޑެއް ޖައްސައި ގަވައިދާ ހިލާފަށް އުޅެމުން ދިޔަ ބިދޭސީންތަކެއް އަތުލައިގެންފި އެވެ.
އިމިގްރޭޝަނުން އެކްސްގައި މިރޭ ކުރި ޕޯސްޓެއ ގައި ބުނީ އެ އިދާރާއަށް ލިބުނު މައުލޫމާތަކާ ގުޅިގެން ލޯކަލް މާރުކޭޓް ސަރަހައްދުގައި މިއަދު ފަތިހުން ފެށިގެން މެންދުރާއި ހަމައަށް ބޮޑު ރެއިޑު އޮޕަރޭޝަނެއް ކުރިއަށް ގެންދިޔަ ކަމަށެވެ.
އެ ރެއިޑު އޮޕަރޭޝަންގައި ލޯކަލް މާރުކޭޓް ސަރަހައްދުގައި އަޅާފައިވާ އުޅަނދުފަހަރާއި، އެ ސަރަހައްދުން ލަފާފުރާ އުޅަނދުފަހަރު ވެސް ބަލައި ފާސްކުރިކަމަށް ބުންޏެވެ.
އެގޮތުން ލޯކަލް މާރުކޭޓް ސަރަހައްދުން 148 ބިދޭސީން ބަލައި ފާސްކޮށް، ގަވާއިދާ ހިލާފަށް އުޅޭ ބިދޭސީ 22 ފިރިހެނަކާއި 1 އަންހެނަކު އިމިގްރޭޝަންގެ ބެލުމުގެ ދަށަށް ގެނައިކަމަށް ވެސް ބުންޏެވެ.
ލޯކަލް މާރުކޭޓްގައި ބިދޭސީންގެ ބާާރުގަދައިރު މީގެ ކުރިންވެސް އެތަނުގައި ބިދޭސީން ވިޔަފާރިކުރުން ހުއްޓުވަން ކުރީ ސަރުކާރުތަކުގައި ވެސް މަސައްކަތްކޮށްފައިވެ އެވެ.
އެހެން ނަމަވެސް އެކަމަށް ހައްލެއް ނުލިބެ އެވެ.
އާންމުކޮށް ބިދޭސީން ލޯކަލް މާރުކޭޓްގެ ގޮޅިތައް ނަގައިގެން އުޅެނީ ދިވެހީންގެ ނަން މަތީގަ އެވެ.
ގަވާއިދާ ހިލާފަށް އުޅޭ ބިދޭސީންނަށް އަމާޒުކޮށް މަސައްކަތް ކުރުމަށް އުފައްދާފައިވާ ޓާސްކްފޯހުން ގިނަ އޮޕަރޭޝަންތަކެއް ހުއްޓުމެއް ނެތި މިހާތަނަށް އައިއިރު ވަނީ ކުރިއަށް ގެންގޮސްފަ އެވެ. އެގޮތުން 200 އަށް ވުރެ ގިނަ އޮފިސަރުން ހިމަނައިގެން މާލެ އަދި ހުޅުމާލޭގައި މާސް އިންސްޕެކްޝަންތަކެއް ކުރިއަށް ގެންގޮސްފައިވެ އެވެ.
އޮޕަރޭޝަންތަކުގައި 1،300 އަށް ވުރެ ގިނަ ތަންތަން ބަލައި ފާސްކުރިއިރު، ޖުމްލަ 5،012 ބިދޭސީން ވަނީ ފުރުވާލާފައިވާ ކަމަށް އިމިގްރޭޝަނުން އެންމެފަހުން އާންމުކޮށްފައިވާ ތަފާސް ހިސާބުތަކުން ދައްކަ އެވެ.
