ދެމިލިއަން ވަނަ ފަތުރުވެރިޔާގެ ޝަރަފު އޮސްޓްރީއާގެ އަންހެނަކަށް
މި އަހަރު ރާއްޖެ އައި ފަތުރުވެރިންގެ އަދަދު ދެ މިލިއަނަށް ހުރަސްކޮށްފި އެވެ.
ދެ މިލިއަން ވަނަ ފަތުރުވެރިޔާ މިއަދު ހެނދުނު ރާއްޖެ އައިސްފައިވާއިރު އެއީ އޮސްޓްރިއާގެ އަންހެން ފަތުރުވެރިއެކެވެ.
ފިރިމީހާއާ ދެ ކުދިންނާއެކު ރާއްޖެއައި އެ އަންހެން މީހާއަށް ޓޫރިޒަމް މިނިސްޓްރީއާއި ކަމާ ބެހޭ އިދާރާތައް ގުޅިގެން ވަނީ ކުލަ ގަދަ މަރުހަބާއެއް ކިޔާފަ އެވެ. މިއީ އަހަރެއްގެ ތެރޭގައި ރާއްޖެއަށް ދެ މިލިއަން ފަތުރުވެރިން ޒިޔަރާތްކުރި ފުރަތަމަ ފަހަރެވެ.
އެ ފަތުރުވެރިޔާ އަށް މަރުހަބާ ކިޔަން ޓޫރިޒަމް މިނިސްޓަރު އިބްރާހިމް ފައިސަލާއި މޯލްޑިވްސް މާކެޓިން އެންޑް ޕަބްލިކް ރިލޭޝަންސް (އެމްއެމްޕީއާރްސީ) ގެ ޗެއާޕާސަން އަބްދުލް ގިޔާސް ރިޔާޒާއި އެ ކުންފުނީގެ މެނޭޖިން ޑިރެކްޓަރު, އިބްރާހިމް ޝިއުރީއާއި އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދާއި ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދާއި ޑެޕިއުޓީ ކޮމިޝަނަރު އޮފް ކަސްޓަމްސް ސާވިސް އަބްދުالله ވަހީދާއި އެޑްވައިޒާ ޓު ދަ ޕްރެޒިޑެންޓް އޮން ޓޫރިޒަމް ޑިވަލޮޕްމެންޓް މުހައްމަދު ހަލީލާއި ކޮމާންޑަންޓް އޮފް އޭވިއޭޝަން ސެކިއުރިޓީ ކޮމާންޑް އިބްރާހިމް ރަޝީދު އަދި އެ ކުންފުނިތަކާއި އިދާރާތަކުގެ އިސްވެރިން ބައިވެރިވެވަޑައިގެންނެވި އެވެ.
އެ ފަތުރުވެރިޔާއާއި އާއިލާއަށް ސައިލެގޫން މޯލްޑިވްސްގެ ފަރާތުން 6 ރޭ އެ ރިސޯޓުގައި ތިބުމުގެ ޕެކޭޖެއްގެ އިތުރުން އެމްއޭސީއެލް، ކަސްޓަމްސް އަދި އިމިގްރޭޝަނުން ހަދިޔާ ދީފައިވެ އެވެ.
މިއަހަރު އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޗައިނާއިން ކަމަށްވާއިރު އެ ގައުމުން 260,000 އަށް ވުރެ ގިނަ ފަތުރުވެރިން މިއަހަރު ރާއްޖެ ޒިޔާރަތްކޮށްފަ އެވެ.
އެ ލިސްޓްގެ ތިން ވަނައިގައި އޮތް އިނގިރޭސިވިލާތުން މިއަހަރުގެ މިހާތަނަށް 176,000 ފަތުރުވެރިން އައިސްފައިވެ އެވެ.
މި ދުވަސްވަރަކީ ސީޒަން ދުވަސްވަރަށްވާތީ ފަތުރުވެރިން ޒިޔާރަތްކުރާ އަދަދުވެސް އިތުރެވެބައެއް ދުވަސް ދުވަހު 8000 ނުވަތަ 10,000 ފަތުރުވެރިން ރާއްޖެ ޒިޔާރަތްކުރާ ކަމަށް ފައިސަލް ވިދާޅުވި އެވެ.
މި އަހަރުގެ މިހާތަނަށް އެއް ދުވަހާ ރާއްޖެ އެންމެ ގިނަ ފަތުރުވެރިން އައި ފެބްރުއަރީ މަހުގަ އެވެ. އެ ދުވަހު 10,000 އަށް ވުރެ ގިނަ ފަތުރުވެރިން ޒިޔާރަތްކޮށްފައިވެ އެވެ. ފައިސަލް ވިދާޅުވީ ތާރީހުގައި އެއް މަހެއްގައި އެންމެ ގިނަ ފަތުރުވެރިން ރާއްޖެ ޒިޔާރަތްކުރީ ފެބްރުއަރީގައި ކަމަށެވެ. ފެބްރުއަރީ ގައި 218,000 ފަތުރުވެރިން ރާއްޖެ ޒިޔާރަތްކުރި އެވެ.
މި އަހަރު އެއް މިލިއަން ފަތުރުވެރިން ހަމަކުރީ އެހެން އަހަރުތަކާ އަޅައިބަލާއިރު އެއް މަސް ކުރިންނެވެ. އެއް މިލިއަން ވަނަ ފަތުރުވެރިޔާ ރާއްޖެ އައީ ޖޫން މަހު އެވެ.
