އަލީ ހަމީދުގެ ކުންފުންޏަށް 44 މިލިއަން ދިން މައްސަލައިގެ ތަހުގީގު އަވަސްކުރަން އަންގައިފި
ރައްޔިތުންގެ މަޖިލިހުގެ އިސްދޫ ދާއިރާގެ ކުރީގެ މެމްބަރު އަލީ ހަމީދުގެ ކުންފުންޏަކަށް ދައުލަތުން 44 މިލިއަން ރުފިޔާ ދިން މައްސަލައެއްގެ ތަހުގީގު އަވަސްކުރަން ޕްރޮސިކިއުޓަ ޖެނެރަލްގެ އޮފީހުން އަންގައިފި އެވެ.
އާސަންދަ ކުންފުނިން ޕްރައިވެޓް ރޫމްތަކާއި އޮޑިޓޯރިއަމެއް ވެސް ހިމެނޭ ގޮތަށް 6 ފްލޯގެ މަލްޓިޕާޕަސް އޮފީސް އިމާރާތެއް އެޅުމަށް އަލީ ހަމީދުގެ ކުންފުނި، ނޯތު ކޯސްޓް ކޮންސްޓްރަކްޝަން ޕްރައިވެޓް ލިމިޓެޑަށް ހަވާލުކޮށްފައި ވަނީ 2016 ވަނަ އަހަރު އެވެ.
ޕްރޮޖެކްޓް ހަވާލުކުރި ނަމަވެސް، މަސައްކަތް ކުރިއަށް ކުރިއަށް ނުގެންދަނީސް އެ ކުންފުންޏަށް، މިދިޔަ ސަރުކާރުގައި އެޑްވާންސަށް 44 މިލިއަން ރުފިޔާ ދިން މައްސަލައެއް މި އަހަރުގެ ޖުލައި މަހު ވަނީ ފެންމަތިވެފަ އެވެ.
އެ މައްސަލަ އާ ގުޅިގެން ރައްޔިތުންގެ މަޖިލިހުގެ މާލިއްޔަތު ކޮމިޓީއަށް ހަމީދު އަދި އާސަންދަ ކުންފުނީގެ ވެރިން ހާޒިރުކޮށް ސުވާލުކޮށްފައިވެ އެވެ. މައްސަލަ އާ ގުޅިގެން ކޮމިޓީގެ މެމްބަރުން ސުވާލު ކުރުމުން ހަމީދު ވިދާޅުވެފައި ވަނީ ކުންފުންޏަށް ލިބިފައިވާ ފައިސާއަކީ އާސަންދަ އާއެކު ހެދުނު އެއްބަސްވުމުގެ ދަށުން ލިބެން ޖެހޭ އެޑްވާންސް ފައިސާ ކަމަށެވެ.
އެ ފައިސާ ލިބިފައި ވަނީ އިމާރާތް އަޅަންވީ ތަނުގެ ބިން ކުންފުންޏާ ހަވާލުކުރުމަށް ފަހު ކަމަށެވެ. އަދި އެ ފައިސާ އާސަންދައިން ދޫކުރީ، އެ ފައިސާއަށް ބަހައްޓަން ޖެހޭ ހުރިހާ ސެކިއުރިޓީސްގެ ގޮތުގައި މުދަލާއި ފައިސާ ބެހެއްޓުމުން ކަމަށް ވެސް ހަމީދު ވިދާޅުވެފައިވެ އެވެ.
ކޮމިޓީގައި އާސަންދަ ކުންފުނީގެ މެނޭޖިން ޑިރެކްޓަރު އައިމިނަތު ޒީނިއާ ވަނީ އެ ޕްރޮޖެކްޓްގެ މަސައްކަތް ތާވަލާ އެއްގޮތަށް ކުރިއަށް ނުދާތީ، އެކަމުގެ ކަންބޮޑުން ފާޅުކުރައްވާފަ އެވެ.
ޕީޖީ އޮފީހުން މިއަދު ބުނީ އަލީ ހަމީދުގެ މަސްލަހަތު އޮންނަ ކުންފުންޏެއް ކަމަށްވާ ނޯތު ކޯސްޓަށް ހަވާލުކޮށްފައިވާ ޕްރޮޖެކްޓަކާ ގުޅިގެން، މިދިޔަ އަހަރު 44 މިލިއަން ރުފިޔާ ދޫކޮށްފައިވާ ކަމަށް ތުހުމަތު ކުރެވޭ މައްސަލަ މަޖިލިހުގެ މާލިއްޔަތު ކޮމިޓީން ބަލައި، ފުލުހުންގެ ސަމާލު ކަމަށް ގެނެސްފައިވާ ކަމަށެވެ.
މި މައްސަލައަކީ ދިވެހި ދައުލަތާއި ރައްޔިތުންގެ އާންމު މަސްލަހަތު މަތީ ދަރަޖައަކަށް އޮތް ހައްސާސް މައްސަލައެއް ކަމަށް އެ އޮފީހަށް ފެންނަ ކަމަށެވެ. މި މައްސަލައަށް އިތުރު ސަމާލުކަމެއްދީ، މައްސަލައަށް ހާއްސަ ތަހުގީގު ޓީމެއް އެކުލަވާލައި، އަވަސް މައްސަލައެއްގެ ގޮތުގައި ކުރިއަށް ގެންދިއުމަށް މިއަދު އެ ހިދުމަތުގައި އެދިފައިވާ ކަމަށް ޕީޖީ އޮފީހުން ބުންޏެވެ.
އިތުރަށް ބުނި ގޮތުގައި މި މައްސަލައިގައި ހިމެނޭ ފަރާތްތަކާ ގުޅޭ މި ބާވަތުގެ އިތުރު ޕްރޮޖެކްޓެއްވާ ނަމަ އެކަންކަން ވެސް މި މައްސަލައިގެ ތެރެއިން ތަހުގީގު ކުރުމަށް އެދިފައިވާނެ ކަމުގަ އެވެ.
އަލީ ހަމީދުގެ ކުންފުންޏަކަށް ފައިސާދިން މައްސަލަ ތަހުގީގުކުރަން އެދި މާލިއްޔަތު ކޮމިޓީން ފުލުހުންނަށް ހުށަހެޅީ މިދިޔަ މަހުގެ 13 ވަނަ ދުވަހު އެވެ.
އެ ކަމާ ގުޅިގެން ފުލުހުން "ދެން" އަށް ބުނީ މަޖިލިހުން އެ މައްސަލަ ހުށަހަޅާފައިވާ ކަމަށެވެ. އަދި މައްސަލަ އެ އިދާރާއިން ތަހުގީގުކުރަމުން އަންނަ ކަމަށެވެ.
Ads by STO
