އެފްޓީއައިގެ ސަބަބުން މުޅި މާކެޓަށް ގޯސް އަސަރެއް ނުކުރާނެ: މިނިސްޓަރު
ރާއްޖެ އާއި ޗައިނާއާ ދެމެދު އަންނަ ބުދަ ދުވަހު އަމަލުކުރަން ފަށާ މިނިވަން ވިޔަފާރީގެ އެއްބަސްވުން (އެފްޓީއައި) ގެ ސަބަބުން ޓްރެޑިޝަނަލް މާކެޓްތައް ނުގެއްލޭނެ ކަމަށް އިކޮނޮމިކް ޑިވޮލޮޕްމެންޓް އެންޑް ޓްރޭޑިން މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.
އެފްޓީއައި އަށް އަމަލުކުރަން ފަށަން ރާއްޖެއާ ޗައިނާއިން ވަނީ މިއަދު އޮންލައިންކޮށް އެއްބަސްވެފަ އެވެ. އެއްބަސްވުމަށް އަމަލުކުރަން ފެށުމާއެކު ޗައިނާއިން ރާއްޖެއަށް އިމްޕޯޓްކުރާ 70 ޕަސެންޓުގެ އައިޓަމްސް އިން ޑިއުޓީ ކަނޑާލެވޭނެ އެވެ. އަދި ރާއްޖެއިން ޗައިނާ އަށް އެކްސްޕޯޓްކުރާ 95 ޕަސެންޓުގެ އައިޓަމްސްވެސް އިން ޑިއުޓީ ކަނޑާލެވޭނެ އެވެ.
އެފްޓީއާ ދެކޮޅަށް ދެކެވޭ ވާހަކަތަކަށް ރައްދު ދެއްވަމުން އެ ރަސްމިއްޔާތަށް ފަހު މިނިސްޓަރު ވިދާޅުވީ އިތުރު ގައުމުތަކާއެކު މިނިވަން ވިޔަފާރީގެ އެއްބަސްވުން ގާއިމުކުރެވެމުން މިހާރު ކުރަމުންދާ ވިޔަފާރިތަކަށް އޭގެ ނުރަނގަޅު އަސަރެއް ނުކުރާނެ ކަމަށެވެ.
"...އަޅުގަނޑުމެން ގޮސް ތަކެތި ގަންނަނީ އެ ލިބޭ މުދަލެއްގެ ކޮލިޓީއާ އަގާއި އަދި ލިބުމުގެ ލުއިތަކާއި ފަސޭހަތަކަށް ބަލާފައި، ހަމަ މިގޮތް އޮންނާނެ ގައުމުތަކާއެކު ވިޔަފާރި ކުރުމަށްވެސް. އިލެކޮޓްރޯނިކް ފަރުނީޗާ، ކޮންސްޓްރަކްޝަން މެޓީރިއަލްސް، އެހެން ނޫނީ އަޅުގަނޑުމެން ގައުމަށް އިމްޕޯޓް ކުރާ ހުރިހާ މުދަލެއްވެސް ކޮންސިއުމާ ބޭނުންވާ ވަރަށް ބޭނުންވާ ކޮލިޓީއެއްގެ އެއްޗެއް މި ގަންނަނީ. އެ މުދާ މިއަދު އަޅުގަނޑުމެންނަށް މިވާ ގޮތަކީ ޑިއުޓީއަކާ ނުލައި ބޯޑަރަށް އެތެރެކުރެވޭނެ ގޮތް މި ވަނީ. ދެން މިއާއި ގުޅިގެން ޓްރެޑިޝަނަލް މާކެޓްސް ގެއްލުމުގެ އެއްވެސް ފުރުސަތެއް އޮންނާނެ ކަމަށް އަޅުގަނޑަކަށް ގަބޫލެއް ނުކުރެވޭ" ސައީދު ވިދާޅުވި އެވެ.
ޑިއުޓީ ކަނޑާލުމުން ދައުލަތަށް ލިބޭ އާމްދަނީ ގެއްލޭނެ ކަމަށް ދެކެވޭ ވާހަކަތަކަށް އިޝާރާތް ކުރައްވާ މިނިސްޓަރު ވިދާޅުވީ، ޑިއުޓީ ކަނޑާލުމުން ކުރިން ލިބެމުން އައި އާމްދަނީ ސަރުކާރަށް ނުލިބޭނެ ކަމަށެވެ.
"އެހެން ނަމަވެސް ދައުލަތަކުން އެ އާމްދަނީ އެއް ނުގެއްލޭ" ވިދާޅުވި އެވެ. އެފްޓީއައި ވިޔަފާރިތައް ފެށުމަށްވެސް އޮތް ވަރަށް ބޮޑު ފަސޭހައެއްކަން ސައީދު ފާހަގަކުރެއްވި އެވެ.
" ..އާއްމު ފަރުދަކަށް ރާއްޖޭގެ ރަށެއްގައި ގެސްޓު ހައުސްއެއް އަޅަން ، އަލަށް ވިޔަފާރިއަށް ވަންނަ ފަރާތްތަކަށް މި ފްރީ ޓްރޭޑް އެގްރީމެންޓުގެ ސަބަބުން އަޅުގަނޑު ގަބޫލުކުރާ ގޮތުންނަމަ އެ ދެވެނީ ގާތްގަނޑަކަށް 5 ލައްކަ އާއި 7 ލައްކަ ރުފިޔާގެ ޑިސްކައުންޓެއް" ސައީދު ވިދާޅުވި އެވެ.
ރަށެއްގައި އެފަދަ ވިޔަފާރީއެއް ފެށުމުގެ އިގްތިސާދީ ހަރަކާތްތައް އިތުރުވުމުން ސަރުކާރަށް އެކި ގޮތް ގޮތުން ޓެކްސް އިތުރުވާނެ ކަމަށް މިނިސްޓަރު ގަބޫލުކުރައްވަ އެވެ.
"އެހެންވީމަ ބޯޑަރުން ޑިއުޓީއެއް ގެއްލޭއިރުގައި އާއްމު ވިޔަފާރިވެރިއަކަށް އެ ފުރުސަތު އިންޑައިރެކްޓްލީ މާބޮޑަށް ފުޅާވެގެންދާ ފުރުސަތުތައް އެބަ ލިބޭ، އޭގެ ސަބަބުން އޯވަރޯލް ވިޔަފާރީ ފުޅަވެގެން ދަނީ" ސައީދު ވިދާޅުވި އެވެ.
Ads by STO
