ވައިޑް ބޮޑީ އެއާކްރާފްޓް ގެނައުން ފާހަގަކުރަން އެއާ ޝޯއެއް
ދުރު މަންޒިލްތަކަށް އުދުހުމަށްޓަކައި ވައިޑް ބޮޑީ އެއާކްރާފްޓު ގެންނާތީ އެއާ ޝޯއެއް ބާއްވަން ގައުމީ އެއާލައިން، މޯލްޑިވިއަނުން ނިންމައިފި އެވެ.
މޯލްޑިވިއަނުން ބުނީ އެއާބަސް އޭ330 ގެ ވައިޑް ބޮޑީ އެއާކްރާފްޓް ގެނައުން ފާހަގަކުރަން ބާއްވާ ޝޯ އޮންނާނީ ފެށޭ ޖެނުއަރީ މަހުގެ 6 ދުވަހު ކަމަށެވެ.
އެގޮތުން މާލެއާއި ހުޅުމާލޭގޭ ސަރަހައްދުގައި އެ ދުވަހު ހަވީރު 5 ޖަހާއިރު އެ ޝޯ ކުރިއަށްދާނެ ކަމަށް މޯލްޑިވިއަނުން ބުންޏެވެ.
ނަމަވެސް އެއާ ޝޯގެ މާބޮޑު ތަފްސީލެއް މޯލްޑިވިއަނުން ނުދެ އެވެ.
ވައިޑް ބޮޑީ އެއާކްރާފްޓް ރާއްޖެ ގެނައުމަކީ މޯލްޑިވިއަން ހިންގާ އައިލެންޑް އޭވިއޭޝަންގެ ތާރީހުގައި ވެސް ކުރިއަށްދާ އެންމެ ބޮޑު މަޝްރޫއު އެވެ.
އެ ބޯޓު ގެނެސް ޗައިނާގެ 4 މަންޒިލްތަކަށް ޑައިރެކްޓް ފްލައިޓް ފަށަން ނިންމާފައިވާއިރު ޕްލޭނާ އެއްގޮތަށް ޔޫރަޕްގެ ޑެސްޓިނޭޝަންތަކަށްވެސް ދަތުރު ފެށިގެންދާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ކުރިން ވިދާޅުވެފައިވެ އެވެ.
މިނިސްޓަރު އަމީން ވިދާޅުވީ އެ ހިދުމަތް ފެށުމުން ރާއްޖޭގެ ފަތުރުވެރިކަމުގެ ސިނާއަތަށްވެސް ރަނގަޅު ކުރިއެރުމެއް އަންނާނެ ކަމަށެވެ. އަދި އިގްތިސާދުގައި ހަރަކާތްތެރިވާ ވިޔަފާރިތަކަށް މަންފާކޮށް އައު ވިޔަފާރިތައް އުފެދިގެންދާނެ ކަމަށެވެ.
ރާއްޖެ ގެންނަ ވައިޑް ބޯޑު އެއާކްރާފްޓަކީ އެއްފަހަރާ 264 ފަސިންޖަރުންނަށް, ދުރު މަންޒިލްތަކަށް ސީދާ ދަތުރު ކުރެވޭ އެއާކްރާފްޓެކެވެ.
ވައިޑް ބޮޑީ އެއާކްރާފްޓުގެ ހިދުމަތް ރާއްޖޭގައި ފެށުމަކީ ރައީސް ޑރ މުހައްމަދު މުއިއްޒުގެ ވައުދުފުޅެކެވެ.
