ގެއަކުން ވަގަށް ނެގި ދެ މިލިއަނެއްހާ ރުފިޔާގެ ތަކެތި ހޯދައިފި
މާލޭގެ ގަލޮޅުގައި ހުންނަ ގެއަކުން ވަގަށް ނެގި ދެ މިލިއަނެއްހާ ރުފިޔާގެ ތަކެތި ހޯދައިފި އެވެ.
ފުލުހުން މިރޭ "އެކްސް" ގައި ކުރި ޕޯސްޓެއްގައި ބުނީ އެ ގެއިން ވަގަށް ނަގާފައިވާ ތަކެތި ހޯދައި އެ ތަކެތީގެ ވެރިފަރާތާ ހަވާލުކޮށްފައިވާ ކަމަށެވެ. ދެ މިލިއަނެއްހާ ރުފިޔާގެ އަގުހުރި ތަކެތި ވަގަށް ނެގީ އިއްޔެގެ ވަގުތެއްގައި ކަމަށެވެ.
އެ މައްސަލަ ހުށަހެޅުމާ އެކު އެ ތަކެތި ހޯދީ ގަލޮޅު ޕޮލިސް އިންވެސްޓިގޭޝަނާއި ރެސްޕޮންސް އެންޑް ޕެޓްރޯލް ގުޅިގެން ކުރި މަސައްކަތުން ކަމަށް ވެސް ފުލުހުން ބުންޏެވެ.
ފުލުހުން ހާމަކުރި ފޮޓޯތަކުން އެނގޭ ގޮތުން ވަގަށް ނެތި ތަކެތީގެ ތެރޭގައި އައިޕެޑާއި ކެމެރާ އާއި ޓެބްލެޓާއި ކާޑް ރީޑާސް އަދި ފޯނު ފަދަ ތަކެތި ހިމެނެ އެވެ.
އެ މައްސަލައިގައި މީހަކު ހައްޔަރުކުރި ކަމެއް ފުލުހުން ހާމަކޮށްފައެއް ނުވެ އެވެ.
ފަހަކަށް އައިސް ވައްކަމުގެ މައްސަލަތައް އިތުރުވެފައިވާކަން މިފަހުން ނެރުނު ކްރިމިނަލް ކޯޓުގެ އަމުރުތަކުން އެނގެ އެވެ.
އަދި ތަކުރާރުކޮށް ވައްކަން ކުރާ ކުށްވެރިންނާއި މަސްތުވާތަކެތީގެ ވަބާގައި ޖެހިގެން ވައްކަންކުރާ ކުށްވެރިން އިތުރުކަން ވެސް ފާހަގަކުރެވެ އެވެ.
ތީ ގެޔެއް ނޫނެއްނު، ފިހާރައެންނު.