އެމްޑީޕީގެ ތިން ދާއިރާއެއްގެ ރައީސް ކަމަށް ކުރިމަތިލާން ހުޅުވާލައިފި
އެމްޑީޕީގެ ގައުމީ މަޖިލީހުން ހުސްވެފައިވާ ތިން ދާއިރާއެއްގެ ރައީސް ކަމަށް ކުރިމަތިލުމުގެ ފުރުސަތު ހުޅުވާލައިފި އެވެ.
އިއްޔެ އެ ޕާޓީން އާއްމު ކުރި އިއުލާނުގައި ބުނީ، ފުރުސަތު ހުޅުވާލާފައިވަނީ ހއ. ހޯރަފުށީ ދާއިރާގެ ރައީސް، ރ. އިނގުރައިދޫ ދާއިރާގެ ރައީސް އަދި ގއ. ވިލިނގިލީ ދާއިރާގެ ރައީސް ކަމުގެ މަގާމަށް ކުރިމަތިލުމަށް ކަމަށެވެ.
އެ ޕާޓީން ބުނީ ތިން ދާއިރާއެއްގެ ރައީސްކަމުގެ މަގާމަށް ކުރިމަތިލުމުގެ ފުރުސަތު ހުޅުވާލާފައިވަނީ އިއްޔެއިން ފެށިގެން މި މަހުގެ 6 ވަނަ ދުވަހާ ހަމައަށް ކަމަށެވެ.
އެމްޑީޕީން ކުރި އިއުލާނުގައި ބުނާ ގޮތުން އެ މަގާމުތަކަށް ކުރިމަތިލެވޭނީ، މިދިޔަ ބުދަ ދުވަހާ ހަމައަށް އެ ޕާޓީގެ މެމްބަރުންގެ ގޮތުގައި ތިބި ފަރާތްތަކަށެވެ. އަދި އެ ފަރާތަކީ ވޭތުވެދިޔަ 5 އަހަރު އެ ޕާޓީގެ އަސާސީ ގަވާއިދާ ހިލާފުވެފައިވާ މީހަކަށް ވެއްޖެ ނަމަ، އެ ފަރާތަކަށް މަގާމަށް އެދި ކުރިމަތިލުމުގެ ފުރުސަތު ގެއްލެ އެވެ.
އެމްޑީޕީގެ ގައުމީ މަޖިލީހުގައި ތިބެނީ ދާއިރާތަކުގެ ރައީސުންނެވެ. އޭގެއިތުރުން ދެން އެންމެ އިސްކޮށް ތިއްބަވަނީ ޗެއާޕާސަނާއި ޕާޓީގެ ރައީސާއި ރައްޔިތުންގެ މަޖިލީސް ތަމްސީލްކުރައްވަމުން ގެންދަވާ މެމްބަރުންނެވެ. އެއަށްފަހު ޒުވާނުންގެ ހިތްވަރުގެ ރައީސް އިތުރުން އިސްލާމީ މަޝްވަރާ މަޖިލީހުގެ ރައީސެވެ.
