Tuesday, 17 November 2026
Advertisement
Ooredoo — Article-Top (leaderboard)
ސަރުކާރު

އިންޑިއާއަށް ކުރެއްވި ދަތުރަށް ފަހު ހަލީލް ޔޫއޭއީއަށް

އިންޑިއާއަށް ކުރެއްވި ދަތުރަށް ފަހު ހަލީލް ޔޫއޭއީއަށް

ފޮރިން މިނިސްޓަރު ޑރ. އަބްދުﷲ ހަލީލް ރަސްމީ ދަތުރުފުޅެއްގައި ޔޫއޭއީއަށް މިއަދު ވަޑައިގެންފި އެވެ.

ހަލީލުގެ ދަތުރަކީ ޔޫއޭއީގެ ޑެޕިއުޓީ ޕްރައިމް މިނިސްޓަރު އަދި ފޮރިން މިނިސްޓަރު ޝެއިހް އަބްދުﷲ ބިން ޒަޔެދް އަލް ނަހްޔާންގެ ދައުވަތަކަށް އެ ގައުމަށް ކުރައްވާ ރަސްމީ ދަތުރެކެވެ.

ފޮރިން މިނިސްޓްރީން ބުނީ މިނިސްޓަރުގެ މި ދަތުރުގައި، ޔޫއޭއީގެ ފޮރިން މިނިސްޓަރާ ބައްދަލު ކުރައްވައި، ދެ ގައުމުގެ ދެމެދުގައި އޮންނަ ޒަމާންވީ ގުޅުމަށް ރިއާޔަތް ކުރައްވައި، އެ ގުޅުން އިތުރަށް ބަދަހިކުރެވޭނެ ގޮތްތަކާމެދު މަޝްވަރާ ކުރައްވާނެ ކަމަށެވެ. އަދި މުސްތަގުބަލުގައި ދެ ގައުމުން ގުޅިގެން މަސައްކަތް ކުރެވިދާނެ އިތުރު ދާއިރާތަކާ ބެހޭގޮތުން މަޝްވަރާ ކުރައްވާނެ ކަމަށެވެ.

Advertisement
Allied — Dhen Online (box)

މީގެ އިތުރުން، ތަފާތު ދާއިރާތަކުން ގުޅުން ބަދަހިކުރުމުގެ ފުރުސަތުތައް ހޯއްދެވުމަށް ހަލީލުގެ މި ދަތުރުގައި ޔޫއޭއީ ސަރުކާރުގެ އިސްވެރިންނާ ބައްދަލު ކުރެއްވުމަށް ހަމަޖެހިފައިވާ ކަމަށް މިނިސްޓްރީން ބުންޏެވެ.

ފޮރިން މިނިސްޓްރީން ބުނީ މި ދަތުރުން، ރާއްޖެ އާއި ޔޫއޭއީ އާ ދެމެދު އޮތް ޒަމާންވީ ގުޅުން އިތުރަށް ބަދަހިކޮށް، ރާއްޖޭގެ ތަރައްގީއަށް ޔޫއޭއީން ދެމުން އަންނަ އެހީތެރިކަން ފާހަގަކޮށް، އެ ގުޅުން އިތުރުކުރުމަށް ދެ ގައުމުން އެކުގައި ކުރަމުންގެންދާ މަސައްކަތްތައް ހާމަވެގެންދާނެ ކަމަށެވެ.

މި ދަތުރުގައި މިނިސްޓަރުގެ އަރިހުގައި އެމްބެސެޑަ އެޓް ލާޖް އަބްދުﷲ ހަމީދާއި ޖޮއިންޓް ސެކްރެޓަރީ މަރްޔަމް ރީޝާ ބައިވެރިވެ ވަޑައިގަންނަވަ އެވެ.

ހަލީލް ޔޫއޭއީއަށް ވަޑައިގެންފައި މި ވަނީ އިންޑިއާއަށް ކުރެއްވި ރަސްމީ ދަތުރަށް ފަހުގަ އެވެ.

ތިން ދުވަހުގެ އެ ދަތުރުގައި ހަލީލް ވަނީ އެ ގައުމުގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމަނަޔަމް ޖައިޝަންކަރާ ބައްދަލު ކުރައްވާފަ އެވެ. އެ ބައްދަލު ކުރެއްވުމުގައި ރާއްޖެ އާއި އިންޑިއާ އާ ދެމެދުގައި ހެދިފައިވާ އެއްބަސްވުންތަކާއި ލިބިފައިވާ ކުރިއެރުންތަކާ ގުޅޭގޮތުން މަޝްވަރާ ކުރައްވާފައިވެ އެވެ.

ރާއްޖެއަށް މިވަގުތު ކުރިމަތިވެފައިވާ މާލީ ގޮންޖެހުންތަކުން އަރައިގަތުމަށް އިންޑިއާއިން ވަމުން އަންނަ އެހީތެރި ކަމަށް ދިވެހި ސަރުކާރުގެ ފަރާތުން މިނިސްޓަރު ވަނީ ޝުކުރު އަދާކުރައްވާފަ އެވެ.

ހަލީލަށް މަރުހަބާ ދެންނެވުމަށްފަހު ޖައިޝަންކަރު ސިފަކުރެއްވީ ރާއްޖެއަކީ އިންޑިއާގެ "ނެއިބަހޫޑް ފަސްޓް" ސިޔާސަތުގެ މުހިންމު މިސާލެއް ކަމަށެވެ. އަދި ރާއްޖެއަށް އެއްބާރުލުން ދިނުމުގައި އިންޑިއާ ދެމިއޮންނާނެ ކަމަށް ވެސް ޖައިޝަންކަރު ވަނީ ވިދާޅުވެފަ އެވެ.

ފޮރިން މިނިސްޓްރީން ބުނީ އެ ބައްދަލުވުމުގައި އިންޑިއާގެ ހިލޭ އެހީ އާއި ލައިން އޮފް ކްރެޑިޓްގެ ދަށުން ހިނގަމުންދާ މަޝްރޫއުތައް ކުރިއަށްދާ ގޮތާމެދު ދެ ބޭފުޅުން މަޝްވަރާ ކުރައްވާފައިވެ އެވެ. އަދި، ރާއްޖޭގެ ތަރައްގީގައި އިންޑިއާގެ އިސްދައުރު ފާހަގަކޮށް، އިގުތިސޯދީ ރޮނގުން ދެ ގައުމުގެ ގުޅުން އިތުރަށް ބަދަހިކުރެވޭނެ ގޮތްތަކާމެދު މަޝްވަރާކުރެއްވި ކަމަށް ވެސް އެ މިނިސްޓްރީން ބުނެފައިވެ އެވެ.

އެ ބައްދަލުވުމަށްފަހު، ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސްގެ ފޭސް 3 ގެ ފަހުމުނާގައި ދެ މިނިސްޓަރުން ވަނީ ސޮއިކުރައްވާފަ އެވެ. އެ ޕްރޮޖެކްޓްތަކަކީ ސީދާ ރައްޔިތުންނަށް އޭގެ ފައިދާ ކުރާ އަތޮޅުތަކުގައި ކުރިއަށްގެންދާ ޕްރޮޖެކްޓްތައް ކަމަށް ފޮރިން މިނިސްޓްރީން މައުލޫމާތުދެ އެވެ.

ރިއެކްޝަން

Advertisement
Ooredoo — Truecaller (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.