ޗުއްޓީއަށް ފަހު ސްކޫލްތަކުގެ ކިޔެވުން ފަށައިފި
ދެ ވަނަ ޓާމުގެ މިޑް ބްރޭކަށް ފަހު ސްކޫލުތަކުގެ ކިޔެވުން މިއަދު އަލުން ފަށައިފި އެވެ.
ދެ ވަނަ ޓާމުގެ ކިޔެވުން ފަށާފައި ވަނީ މިދިޔަ އޮކްޓޫބަރުގެ 6 ވަނަ ދުވަހު އެވެ. ޓާމުގެ ތެރެއިން ލިބޭ މިޑް ބްރޭކަށް ދަރިވަރުން ދިޔައީ ނިމުނު މަހުގެ 22 ވަނަ ދުވަހު އެވެ.
ސްކޫލުތަކުގެ ކިޔެވުން ފަށާފައި މި ވަނީ 15 ދުވަހުގެ ބަންދަކަށް ފަހުގަ އެވެ. މި ޓާމުގެ ކިޔެވުން ނިމި ބޮޑު ޗުއްޓީ ދޭނީ މާޗު މަހުގެ 6 ވަނަ ދުވަހު އެވެ.
ދިރާސީ އާ އަހަރުގެ ކިޔެވުން ފެށުމަށް ހަމަޖެހިފައި ވަނީ އަންނަ އެޕްރީލު މަހުގެ 6 ވަނަ ދުވަހު އެވެ.
ހިނގަމުން މިދާ އަހަރު 40،300 އަންހެން ދަރިވަރުންނާއި 42،700 ފިރިހެން ދަރިވަރުން ހިމެނޭހެން 96,000 ދަރިވަރުން އަންނަނީ ތައުލީމު ހާސިލުކުރަމުންނެވެ.
އޭގެ ތެރޭގައި ހިމެނޭ 26,000 އެއްހާ ދަރިވަރުންނަކީ މާލޭ ސަރަހައްދުގެ ސްކޫލުތަކުގައި ކިޔަވަމުންދާ ދަރިވަރުންނެވެ.
މި ދަރިވަރުންގެ ތެރެއިން 83،000 އެއްހާ ދަރިވަރުން ކިޔަވަމުން އަންނަނީ ސަރުކާރު ސްކޫލުތަކުގަ އެވެ. އަދި 13،000 އަށް ވުރެ ގިނަ ދަރިވަރުން ޕްރައިވެޓް ސްކޫލުތަކުގައި ދަނީ ތައުލީމު ހާސިލުކުރަމުންނެވެ.
ޖުމްލަ 217 ސްކޫލުގައި ކިޔަވައިދެމުން އަންނައިރު، އޭގެ ތެރެއިން 162 ސްކޫލެއްގައި ކިޔަވައިދެނީ އެއް ދަންފަޅިއަށެވެ. އަދި 55 ސްކޫލެއްގައި ކިޔަވައިދެމުން ދަނީ ދެ ދަންފަޅިއަށެވެ.
