އިންޑިއާއިން ރާއްޖެއަށް ދިފާއީ އާލާތްތަކެއް ދީފި
އިންޑިއާއިން ރާއްޖޭގެ ގައުމީ ދިފާއި ބާރު (އެމްއެންޑީއެފް) އަށް ދިފާއީ އާލާތްތަކެއް ދީފި އެވެ.
ރާއްޖޭގެ ޑިފެންސް މިނިސްޓަރު ގައްސާނު މައުމޫން އިންޑިއާއަށް ކުރައްވަމުން ގެންދަވާ ދަތުރާ ގުޅިގެން އިންޑިއާާގެ ޑިފެންސު ވިންގުން ނެރުނު ބަޔާނެއްގައި ބުނީ، ރާއްޖެއިން އެދިގެން ދިފާއީ އާލާތްތަކެއް ދީފައިވާ ކަމަށެވެ.
އިންޑިއާާ އިން ދިން އާލާތްތަކުގެ ތަފްސީލެއް އިންޑިއާ ސަރުކާރުން ނުވަތަ ދިވެހި ސަރުކާރުން ހާމަކޮށްފައެއް ނުވެ އެވެ. އަދި އެއީ ލޯނުގެ ގޮތުގައި ނުވަތަ ހަދިޔާކުރި އެއްޗެއްކަން އަދި މިހާތަނަށް ޔަގީންވެފައިނުވެ އެވެ.
''ދިވެހި ސަރުކާރުގެ އެދިގެން، ދިފާއީ އާލާތްތަކެއް ރާއްޖެއަށް ވަނީ ދީފައި" ބަޔާނުގައި ބުންޏެވެ.
ރަސްމީ 3 ދުވަހުގެ ދަތުރެއްގައި ރާއްޖޭގެ ޑިފެންސް މިނިސްޓަރު ގައްސާނު މައުމޫނު ވަނީ އިންޑިއާއަށް މިއަދު ވަޑައިގެންފަ އެވެ. ވެރިރަށް ދިއްލީން ގައްސާނަށް ރަތް ދޫލައިގެ މަރުހަބާއެއް ކިޔާފައިވާއިރު، ދެ ގައުމުގެ ޑިފެންސް މިނިސްޓްރީގެ އިސް ބޭފުޅުންގެ ދެމެދުގައި މަޝްވަރާތަކެއް ވަނީ ކުރިއަށް ގެންގޮސްފަ އެވެ.
ރާއްޖެ-އިންޑިއާ ދެމެދު ކުރެވުނު ބައްދަލުވުން ފައްޓަވައި ވާހަކަ ދައްކަވަމުން އިންޑިއާގެ ޑިފެންސް މިނިސްޓަރު ރަޖްނާތު ވިދާާޅުވީ ރާއްޖޭގެ ގައުމީ ދިފާއީ ބާރުގެ ގާބިލުކަން އިތުރުކުރުމުގެ ގޮތުން، ތަމްރީނާއި، ގަވާއިދުން ކުރިއަށްގެންދާ ޑްރިލްތަކާއި، ވޯކްޝޮޕްތައް އަދި ސެމިނާތަކުގެ އިތުރުން ދިފާއީ އާލާތްތައް ސަޕްލައި ކުރުން ފަދަ ހުރިހާ ދާއިރާއަކުން ވެސް އިންޑިއާއިން ރާއްޖެއަށް ކެޕޭސިޓީ ބިލްޑިން އިތުރުކުރަން މަގުތައް ފަހިކޮށްދެމުންދާ ކަމަށެވެ.
''އިތުބާރުކުރެވޭ ބައިވެރިއެއްގެ ހައިސިއްޔަތުން އަދި ގާތް ރަހުމަތްތެރިއެއްގެ ހައިސިއްޔަތުން، އަޅުގަނޑު ދޭނެ ޔަގީންކަމަކީ ރާއްޖޭގެ ތަރައްގީއަށާއި ދިވެހި ރައްޔިތުންގެ ދުޅަހެޔޮކަމަށް އިންޑިއާއިން އަބަދުވެސް އެހީތެރިކަން ފޯރުކޮށްދެމުން ގެންދާނެ ކަމަށް،'' އެ ބައްދަލުވުމުގައި ކުރެވުނު މަޝްވަރާތަކުގައި ރަޖްނާތު ވިދާޅުވި ކަމަށް އިންޑިއާގެ ނޫހަކުން ބުންޏެވެ.
ރަޖްނާތު ވިދާޅުވި ގޮތުގައި އޮކްޓޫބަރު މަހު ރައީސް ޑރ މުހައްމަދު މުއިއްޒު އިންޑިއާއަށް ކުރެއްވި ދަތުރުފުޅުގެ ސަބަބުން ދެގައުމުގެ ދެމެދުގައި އޮތް ގުޅުމަށް ކުރިއެރުންތަކެއް ލިބިގެން ގޮސްފައިވާ ކަމަށެވެ.
Ads by STO
