ހިޖުރަ ގްރޫޕުގެ ހުއްދަ ހިފަހައްޓައި، އެއް ލައްކަ ރުފިޔާއިން ޖޫރިމަނާކުރަނީ
ރާއްޖެއިން އުމުރާއަށް ގެންދިޔަ ބަޔަކު ހާލުގައި ޖެއްސި މައްސަލައިގައި އަލްހިޖްރަ ޓްރެވަލް އެންޑް ޓްއާސް ޕްރައިވެޓް ލިމިޓެޑުން އުމްރާއަށް މީހުން ގެންދަން އިސްލާމިކް މިނިސްޓްރީން ދީފައިވާ ހުއްދާ ބާތިލުކޮށް، އެއް ލައްކަ ރުފިޔާއިން ޖޫރިމަނާކުރަން ނިންމައިފި އެވެ.
ހިޖްރަ ގްރޫޕުގެ ހަވާލުގައި އުމުރާގެ އަޅުކަމަށް ގޮސް އުޅެނިކޮށް ރާާއްޖެ ނާދެވި ސައުދީ އަރަބިއްޔާގައި 23 މީހަކު ވަނީ ތާށިވެފަ އެވެ.
އެ މީހުން އުމްރާއަށް ފުރުމުގައި ވެސް މައްސަލަތަކެއް ދިމާވި އެވެ. އޭރު ދިމާވީ ޓިކެޓާއި ވިސާގެ މައްސަލަ ކަމަށް އެ ގްރޫޕުގެ ޑިރެކްޓަރު, މުސްތަފާ މުހައްމަދު ވަނީ "ދެން" އަށް ވިދާޅުވެފަ އެވެ.
ހިޖްރަ ގްރޫޕުން އާންމުކުރި ބަޔާނެއްގައި ބުނީ އުމްރާވެރިން ރާއްޖެ ގެނައުމަށް ކުންފުނިން މަސައްކަތް ކުރަމުންދާ ކަމަށެވެ. އެހެންނަމަވެސް އެ ކަމުގައި ކުރިމަގެއް ފެނިފައިނުވާ ކަމަށް ބުނެފައިވެ އެވެ.
އިސްލާމިކް މިނިސްޓްރީން މިއަދު ނެރުނު ނޫސް ބަޔާނެއްގައި ބުނީ ހިޖްރަ ގްރޫޕުން މިދިޔަ ޑިސެމްބަރު އުމްރާ ދަތުރުގައި ދިއުމަށް ހަމަޖެހިފައިވާ އުމްރާވެރިން ދަތުރަށް ފައިސާ ދައްކާފައިވާ ކަމަށެވެ.
ނަމަވެސް އެ ފައިސާއިން އުމްރާވެރިންގެ ދެކޮޅު ޓިކެޓު ހަމަނުޖައްސައި، އެ ފައިސާ ކުންފުނީގެ އެހެން ކަންކަަމަށް ބޭނުންކޮށްފައިވާ ކަމަށް އެ ކުންފުނިން އިއުތިރާފުވެފައިވާ ކަމަށެވެ. މައްކާއިން ރާއްޖެ އައުމަށް ޓިކެޓު ނަގާފައި ނެތުމުގެ ސަބަބުން ރާއްޖެ ނާދެވިގެން އެ އުމްރާވެރިން މިނިސްޓްރީގެ އެހީތެރި ކަމަށް އެދިފައިވުމުން ހާލުގައި ޖެހިފައި ތިބި އުމްރާވެރިން މިއަދު އެ މިނިސްޓްރީގެ އިރުޝާދުގެ ދަށުން މޯލްޑިވްސް ހައްޖު ކޯޕަރޭޝަނުގެ ބެލުމުގެ ދަށަށް ގެންގޮސްފައިވާ ކަމަށް އިސްލާމިކް މިނިސްޓްރީން ބުންޏެވެ.
ދިވެހިރާއްޖެއިން އުމްރާއަށް މީހުން ގެންދިޔުމާ ބެހޭ އުސޫލާ ހިލާފުވެފައިވާތީ އެ އުސޫލުގެ ދަށުން ހިޖްރަ ގްރޫޕާ މެދު ފިޔަވަޅުއަޅަން މިނިސްޓްރީން ވަނީ ނިންމާފަ އެވެ. އެގޮތުން؛
- ހިޖްރަ ގްރޫޕަށް ދޫކޮށްފައިވާ ހުއްދަ ހިފެހެއްޓުން
- އެއްލައްކަ ރުފިޔާއިން ޖޫރިމަނާކުރުން
- ހިޖްރަ ގްރޫޕަށް އަދި އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާއަށް މީހުން ގެންދިއުމުގެ ހުއްދަ ނުދިނުން
- ހިޖްރަ ގްރޫޕުގެ ފަރާތުން އުމްރާއަށް ގެންގޮސް ހާލުގައި ޖެހުނު މީހުން ރާއްޖެއަށް ގެނައުމަށް މިނިސްޓްރީން ކުރި ހަރަދު އެ ކުންފުނިން ހޯދުން
- އުމްރާއަށް މީހުން ގެންދިއުމުގެ އުސޫލާ ގްރޫޕުން ހިލާފުވެފައިވާތީ މައްސަލަ ތަހުގީގުކޮށް، ގާނޫނީ ފިޔަވަޅު އެޅުމަށް ފުލުހުންނަށް ހުށަހެޅުން
އެ ފިޔަޅުތައް އެޅުމުގައި އިދާރީ ގޮތުންނާއި ގާނޫނީ ގޮތުން ކުރަން ޖެހޭ ކަންކަން ފަސްޖެހުމެއް ނެތި ކުރާނެ ކަމުގެ ޔަގީންކަން އިސްލާމިކް މިނިސްޓްރީން ވަނީ ދީފަ އެވެ.
ހައްޖު ކޯޕަރޭޝަނުގެ މެނޭޖިން ޑިރެކްޓަރު މުހައްމަދު ޝަކީލް "ދެން" އަށް މިއަދު ވިދާޅުވީ ހާލުގައި ޖެހިފައި ތިބި މީހުންނާ ރޭގެ ވަގުތެއްގައި އެ ކޯޕަރޭޝަނުގެ މައްކާގައި ތިބި ޓީމުން ބައްދަލުކުރުމުން މައްކާ ގަޑިން މިއަދު 1 ޖަހާއިރު، އެ މީހުން ތިބި ހޮޓަލުން ނިކުންނަން ޖެހޭ ކަމަށް ބުނެފައިވާ ކަމަށެވެ.
އެ މީހުން ހައްޖު ކޯޕަރޭޝަންގެ މީހުން ތިބޭ ހޮޓަލަށް ގެނައުމުގެ މަސައްކަތް ކުރަމުންދާ ކަމަށާއި ރެއިން ފެށިގެން ކެއުމުގެ އިންތިޒާމް ހަމަޖައްސައިދީފައިވާ ކަމަށް ވިދާޅުވި އެވެ. އުމްރާވެރިން މާލެ އައުމަށް މާދަމާ މައްކާއިން ފުރުމަށް ހަމަޖެހިފައިވާކަން ވެސް ޝަކީލް ފާހަގަކުރެއްވި އެވެ.
