މުސްލިމް ވޯލްޑް ލީގުގެ ކޮންފަރެންސަކަށް ޝަހީމް ޕާކިސްތާނަށް
މުސްލިމް ވޯލްޑް ލީގު (ރާބިތަތުލް އާލަމިލްއިސްލާމީ) އިން ބާއްވާ ކޮންފަރެންސެއްގައި ބައިވެރިވެ ވަޑައިގަތުމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ޕާކިސްތާނަށް ވަޑައިގަންނަވައިފި އެވެ.
އިސްލާމިކް މިނިސްޓްރީން ބުނީ ރަސްމީ ދަތުރުގައި ޝަހީމް އެ ގައުމަށް ވަޑައިގެންނެވީ މިއަދު ކަމަށެވެ. މިނިސްޓަރު ޕާކިސްތާނަށް ކުރައްވާ ދަތުރަކީ ދެ ދުވަހުގެ ދަތުރެކެވެ.
މި ދަތުރަކީ މުސްލިމް ވޯލްޑް ލީގުގެ ދައުވަތަކަށް، އިސްލާމީ މުޖުތަމައުތަކުގައި އަންހެންދަރީންނަށް ތައުލީމު ދިނުމާ ބެހޭގޮތުން ބާއްވާ ބައިނަލްއަގުވާމީ ކޮންފަރެންސްގައި ބައިވެރިވެ ވަޑައިގަތުމަށް ކުރައްވާ ދަތުރެއް ކަމަށެވެ.
މި ކޮންފަރެންސްގެ އިިލްމުވެރިންގެ ސެޝަންގައި މިނިސްޓަރު ވާހަކަ ދައްކަވާ ގޮތަށް ވަނީ ހަމަޖެހިފައި ކަމަށް އިސްލާމިކް މިނިސްޓްރީން ބުންޏެވެ.
ޝަހީމަކީ މުސްލިމް ވޯލްޑް ލީގުގެ ސުޕްރީމް ކައުންސިލުގެ މެމްބަރެކެވެ.
މި ކޮންފަރެންސްގައި އިސްލާމީ ގައުމުތަކުގެ އިސްވެރިންނާއި ކަމާ ގުޅުންހުރި ސަރަހައްދީ އަދި ބައިނަލްއަގުވާމީ އެކިއެކި ޖަމިއްޔާ ޖަމާއަތްތަކުންނާ ބައިވެރިވާނެ އެވެ. އޭގެ އިތުރުން ރިސާޗް ސެންޓަރުތަކާއި ފަތުވާ ކައުންސިލްތަކުންނާއި ބޮޑެތި އިސްލާމީ ޔުނިވާސިޓީތަކުންނާއި އިސްލާމީ ޔުނިވާސިޓީތަކުގެ ލީގުން ބައިވެރިވާ ގޮތަށް ވަނީ ހަމަޖެހިފަ އެވެ.
