ހޮޅިއެއް ފަޅައިގެން ގޮސް ހިޔާ ފްލެޓްތަކުން ފެން ކެނޑިއްޖެ
ހުޅުމާލޭ ދެވަނަ ފޭސްގައި އިމާރާތްކޮށްފައިވާ ހިޔާ ފްލެޓުގައި ހޮޅިއެއް ފަޅައިގެން ގޮސް ފެނުގެ ހިދުމަތް މެދުކެނޑިޖެ އެވެ.
އެޗްޑީސީން މިއަދު ހަވީރު ބުނީ ފެނުގެ ހިދުމަތް މެދުކެނޑުނީ ދިމާވި ކުއްލި މައްސަލައަކާ ގުޅިގެން ކަމަށެވެ.
އެހެންވެ އެ މައްސަލަ ވީ އެންމެ އަވަހަކަށް ހައްލުކުރުމަށް އެމްޑަބްލިއުއެސްސީއާއެކު މަސައްކަތް ކުރަމުންދާ ކަމަށް އެޗްޑީސީން ބުންޏެވެ.
އޭގެ ފަހުން އެމްޑަބްލިއުއެސްސީން ބުނީ ހިޔާ ފްލެޓްތަކުގެ 1 ނަންބަރު ޓަވަރުން ފެށިގެން 8 ވަނަ ޓަވަރާ ހަަމައަށް ހުރިހާ ފަންގިފިލާތަކުން ފެނުގެ ހިދުމަތް މެދުކެނޑިފައިވާ ކަމަށެވެ.
"ދެން" އަށް އެނގިފައިވާ ގޮތުން ފެނުގެ ހިދުމަތް މެދުކެނޑީ ހޮޅިއެއް ފަޅައިގެން ދިއުމުގެ ސަބަބުންނެވެ.
"މި މައްސަލަ އަވަސް ގޮތެއްގައި ހައްލު ކުރުމުގެ މަސައްކަތް އެމްޑަބްލިއުއެސްސީގެ ޓީމުން ދަނީ ކުރަމުން ނެވެ. އަދި މިކަމުގެ ސަބަބުން ކަސްޓަމަރުންނަށް ދިމާވާނެ ދަތިތަަކަށް ކުންފުނީގެ ފަރާތުން ނިހާޔަތަށް މާފަށް އެދެމެވެ"އެމްޑަބްލިއުއެސްސީން އެކްސްގައި ބުންޏެވެ.
