އަހަރެއް ތެރޭ 17 މެގަވޮޓުގެ އިއާދަކުރަނިވި ހަކަތަ އިތުރުކޮށްފިން: ތޯރިގު
ފާއިތުވެދިޔަ އެއް އަހަރު ދުވަހުގެ ތެރޭގައި ރާއްޖޭގައި ގާއިމުކުރެވިފައިވާ އިއާދަކުރަނިވި ހަކަތައިގެ ގާބިލިއްޔަތަށް 17 މެގަވޮޓު އިތުރު ކުރެވިފައިވާ ކަމަށް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ މިނިސްޓަރު ތޯރިގު އިބްރާހިމް ވިދާޅުވެއްޖެ އެވެ.
ތޯރިގު އެހެން ވިދާޅުވީ އަބޫދާބީގައި މިހާރު ކުރިއަށްދާ އިންޓަނޭޝަނަލް ރިނިއުވަބަލް އެނާޖީ އެޖެންސީ (އައިރީނާ) އެސެމްބްލީގެ 15 ވަނަ ޖަލްސާގައި ވާހަކަ ދައްކަވަމުންނެވެ.
މިނިސްޓަރު ވަނީ ރާއްޖޭގައި ގާއިމުކުރެވިފައިވާ އިއާދަކުރަނިވި ހަކަތައިގެ ގާބިލިއްޔަތު ނިމިދިޔަ އަހަރު ދުވަހުގެ ތެރޭގައި 53 މެގަވޮޓުން 70 މެގަވޮޓަށް އިތުރުކުރެވިފައިވާކަން ފާހަގަކުރައްވާފަ އެވެ. އަދި 2023 ވަނަ އަހަރުގެ ޑިސެމްބަރު މަހު ދުބާއީގައި ބޭއްވި ކޮޕް ސަމިޓުގައި ރައީސް ޑރ. މުހައްމަދު މުއިއްޒު އިއުލާނުކުރެއްވި 33 އިންސައްތަ އިއާދަކުރަނިވި ހަކަތައިގެ އަމާޒަށް ވާސިލުވުމަށް ރާއްޖެއިން ކާމިޔާބު މަސައްކަތްތަކެއް ކުރަމުންދާކަން ފާހަގަކުރެއްވި އެވެ.
އެގޮތުން 170 މެގަވޮޓުގެ އިއާދަކުރަނިވި ހަކަތައިގެ މަޝްރޫއުތައް އެކި މަރުހަލާތަކުގައި މިހާރު ވެސް ކުރިއަށްދާ ކަމަށް ތޯރިގު ވިދާޅުވި އެވެ.
އިތުރަށް ވިދާޅުވީ މޫސުމަށް އަންނަ ބަދަލުތަކަކީ ރާއްޖެ ފަދަ ކުދި ޖަޒީރާ ގައުމުތަކަށް ދިމާވެފައިވާ އެންމެ ނުރައްކާތެރި މައްސަލަތަކުގެ ތެރެއިން އެއް މައްސަލަ ކަމަށެވެ. ދުނިޔޭގެ ގައުމުތަކުން އެއްބަސްވެފައިވާ 1.5 ޑިގްރީގެ އަމާޒަށް ވާސިލުވުމަށް އަވަސް ފިޔަވަޅުތަކެއް އަޅަން ޖެހިފައިވާކަން ވެސް ފާހަގަކުރެއްވި އެވެ.
އަބޫދާބީގައި ކުރިއަށްދާ އައިރީނާ އެސެމްބްލީގައި، މިނިސްޓަރުގެ އަރިހުގައި ޔޫއޭއީއަށް ރާއްޖެއިން ކަނޑައަޅާފައި ހުންނަވާ ސަފީރު މުހައްމަދު ހުސައިން ޝަރީފާއި އެންވަޔަރަންމަންޓް މިނިސްޓްރީގެ ޑިރެކްޓަ ޖެނެރަލް އަހްމަދު އާލީ ބައިވެރިވެ ވަޑައިގަންނަވަ އެވެ.
Ads by STO
