4،000 ފްލެޓް ލިބޭ މީހުންގެ ލިސްޓް އަލުން ވެރިފައިކުރަނީ
ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފަހުކޮޅު "ގެދޮރުވެރިޔާ" ސްކީމުގެ ދަށުން ހުޅުމާލޭގައި އަޅަން ފެށި 4،000 ފްލެޓު ލިބޭ މީހުންގެ ލިސްޓު އަލުން ވެރިފައި ކުރުމުގެ މަސައްކަތް ކުރަމުން އަންނަ ކަމަށް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބް ވިދާޅުވެއްޖެ އެވެ.
ފްލެޓް ލިސްޓާ ގުޅޭ އެންމެފަހުގެ މައުލޫމާތު ހާމަކުރުމަށް ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މުއްތޮލިބު ވިދާޅުވީ ސަރުކާރުން ހަވާލުވިއިރު، 4،000 ފްލެޓުގެ ލިސްޓުގެ މަސައްކަތް އޭސީސީން ހުއްޓުވާފައިވާ ކަމަށެވެ. އެ ކޮމިޝަނުން އަންގާފައި ވަނީ އުސޫލާ ހިލާފަށް ހުރި ފޯމުތައް ރިވިއުކުރުމަށް ކަމަށާއި މިނިވަން ކޮމިޓީއެއް އެކުލަވާލައިގެން އެ މަސައްކަތް ކުރެވުނު ކަމަށެވެ.
ރައީސް ޑރ. މުހައްމަދު މުއިއްޒު އިއުލާނުކުރައްވާފައިވާ ސިޔާސަތުތަކާ އެއްގޮތަށް ކުރިއަށް ދިއުމަށާ އަދި އޭސީސީ އާއި އެހެނިހެން އިދާރާތަކުން ފާޅުކޮށްފައިވާ ކަންބޮޑުވުންތައް ބެލުމަށް ފަހު، މިހާރު ނިންމާފައި ވަނީ ފްލެޓަށް އެދި ފޯމު ހުށަހަޅާފައިވާ ހުރިހާ ފަރާތްތައް އަލުން އިވެއުލޭޓް ކުރުމުގެ ބަދަލުގައި ލިސްޓު ވެރިފައި ކުރުމުގެ މަސައްކަތް ކުރުމަށް ކަމުގައި މުއްތޮލިބް ވިދާޅުވި އެވެ. އެގޮތުން 2023 ވަނަ އަހަރުގެ ނޮވެމްބަރު މަހުގެ 15 ވަނަ ދުވަހު ގެެޒެޓުކޮށްފައިވާ ލިސްޓުގެ "ވެރިފިކޭޝަން ޕްރޮސެސް" އެއް ކުރިއަށް ގެންދިއުމަށް ނިންމާފައިވާކަން ފާހަގަކުރެއްވި އެވެ.
"މި ވެރިފިކޭޝަން ޕްރޮސެސް ކުރިއަށް ގެންދާއިރު ބަލާނީ 26 ޖޫން 2022 ގައި ގެޒެޓް ކުރެވުނު ގެދޮރުވެރިޔާ ސްކީމުގެ ދަށުން ފްލެޓު ދޫކުރާ އުސޫލަށް. އެ އެޕްލިކޭޝަން އަދި އެޕްލިކޭޝަން ހުށަހެޅުމަށް ތައްޔާރުކޮށްފައިވާ ގެދޮރުވެރިންގެ ޕޯޓަލްގައި ދީފައިވާ އިރުޝާދުތަކަށް،" މުއްތޮލިބް ވިދާޅުވި އެވެ.
މާލޭގައި ދިރިއުޅޭތާ 15 އަހަރުވިކަން ސާބިތުކުރަން ހުށަހެޅިދާނެ ލިޔުންތައް ކަމަށް ޕޯޓަލްގައި ބަޔާންކޮށްފައިވާ ލިޔުންތައް:
- ވޭތުވެދިޔަ 15 އަހަރުގެ ތެރޭގައި ހުށަހަޅާ ފަރާތުން މާލޭގައި ވަޒީފާ އަދާކުރި، މިހާރު ވަޒީފާ އަދާކުރަމުންދާ ތަނުގެ ލިޔުން
- ހުށަހަޅާ ފަރާތުން އަނބިމީހާ ނުވަތަ ފިރިމީހާ ކައިވެންޏަށް ފަހު ވޭތުވެދިޔަ 15 އަހަރު ތެރޭގައި ވަޒީފާ އަދާކުރި، މިހާރު ވަޒީފާ އަދާކުރަމުންދާ ތަންތަނުގެ ލިޔުން
- މާލޭގެ ސްކޫލު ކޮލެޖު ޔުނިވާސިޓީއެއްގައި ކިޔެވިކަން، ކިޔަވަމުންދާކަން އަންގައިދޭ ލިޔުން
- އަނބިމީހާ ނުވަތަ ފިރިމީހާ ފްލެޓަށް ހުށަހަޅާތާ ވޭތުވެދިޔަ 15 އަހަރުގެ ތެރޭގައި މާލޭގެ ކޮލެޖުގައި ކިޔެވިކަން ނުވަތަ ކިޔަވަމުންދާކަން އަންގައިދޭ ލިޔުން
- ހުށަހަޅާ ފަރާތުން ދަރިން ވޭތުވެދިޔަ 15 އަހަރުގެ ތެރޭގައި މާލޭގެ ސްކޫލު ކޮލެޖު ނުވަތަ ޔުނިވާސިޓީއެއްގައި ކިޔެވިކަން ނުވަތަ ކިޔަވަމުންދާކަމުގެ ލިޔުން
- ހުށަހަޅާ ފަރާތުގެ ޕެންޝަނާ ބެހޭ ލިޔުންތައް
މިނިސްޓަރު ވިދާޅުވި ގޮތުގައި އެ ޕޯޓަލްގައި ނުހިމެނޭ ލިޔުންތައް ގާނޫނީ ގޮތުން ބަލައި ނުގަނެވޭނެ ކަމުގަ އެވެ.
އިތުރަށް ވިދާޅުވީ މަސައްކަތް ކުރަމުންދަނީ ރޯދަ މަސް ފެށެންވާއިރަށް ލިސްޓު އާންމުކުރުމަށް ކަމަށެވެ. އެކަން ކުރާނީ ލިބުނު ޕޮއިންޓުގެ އަދަދާއި ފްލެޓަށް ހޮވުނުކަން ނުވަތަ ނޫންކަން ތަފުސީލާ އެކު އެނގޭނެ ގޮތަށް ކަމުގައި ފާހަގަކުރެއްވި އެވެ. އަދި ލިސްޓު އާންމުކުރުމުން ޝަކުވާ ހުށަހެޅުމުގެ ފުރުސަތަށް ހުޅުވާލެވޭނެ ކަމަށް ވެސް މުއްތޮލިބް ވިދާޅުވި އެވެ.
ޕާޓީ ކޔދިްނަށަ ދީފަ ބާކި ހުރިޔާ އަޅުގަންޑަށް ދެއްވާތި!