ވެބް ސަމިޓަށް ސިނެޓެކްސް ހޮވިއްޖެ
މޯލްޑިވިއަން އާޓިފިޝަލް އިންޓެލިޖެންސް (އޭއައި) ސްޓާޓްއަޕް 'ސިނެޓެކްސް' ވެބް ސަމިޓަށް ފުރަތަމަ ފަހަރު ހޮވިއްޖެ އެވެ.
ސިނެޓެކްސްއިން ނެރުނު ނޫސްބަޔާނެއް ބުނީ މޯލްޑިވްސްގައި ގާއިމްކުރެވިފައިވާ އޭއައި ސްޓާޓްއަޕް ސިނެޓެކްސްއަށް ވެބް ސަމިޓްގެ އެލްފާޕްރޮގްރާމަށް ހޮވުމުން ވަނީ މުހިންމު މަރުހަލާއެއް ހާސިލްކުރެވިފައި ކަމަށެވެ.
ބައިނަލްއަގްވާމީ ފެންވަރުގައި ދިވެހިރާއްޖެ ތަމްސީލްކުރާ ފުރަތަމަ ފަހަރުގެ މި އިވެންޓް އޮންނަނީ މި އަންނަ މަހުގެ 23 އިން 26 އަށް ގަތަރުގެ ދޯހާގަ އެވެ.
ސިނެޓެކްސްއިން ބުނީ ސިނެޓެކްސްގެ އަމާޒަކީ އާޓިފިޝަލް އިންޓެލިޖެންސް އާންމުކޮށް، އެންމެންނަށް ހަމަހަމަ ޑިޖިޓަލް މުސްތަގްބަލެއް ގާއިމްކުރުން ކަމަށެވެ. އަދި ދުނިޔޭގެ ބަހުގެ ތަފާތުތަކުގެ ދެބައިކުޅައެއްބަޔަށް ނުރައްކާވެފައިވާއިރު، މި ސްޓާޓްއަޕްގެ އަމާޒަކީ އަގުހެޔޮ، ރަށްވެހި މާހައުލާ ގުޅޭ، އަދިބަސްތަކުގެ ތަފާތުތައް ދެމެހެއްޓުމަށް ފަރުމާކުރެވިފައިވާ އާ އޭއައި ޓޫލްތަކެއް މެދުވެރިކޮށް މުޖުތަމައުތައް ބާރުވެރިކުރުވުން ކަމަށެވެ.
މީގެ އިތުރުން ބަހުގެ ހުރަސްތައް ނައްތާލުމަށްފަހު ސިނެޓެކްސްގެ އަމާޒަކަށްވެފައިވަނީ 1.2 ބިލިއަން މަދު ވަސީލަތްތަކެއް ލިބިފައިވާ ބަހުގެ ވާހަކަދައްކާ މީހުންނަށް އެމީހުންގެ ސަގާފަތާއި، އަގުތަކާއި އަދި ތަރިކަ ރައްކާތެރިކުރުމަށް އެހީތެރިވުން ކަމަށްވެސް ސަމިޓުން ބުންޏެވެ. އަދި މި މަސައްކަތުން ސްޓާޓްއަޕްގެ ތަސައްވަރަކަށްވެފައިވަނީ ދިރުންހުރި ރަށްވެހި ޑިޖިޓަލް އިގްތިސާދުތަކެއް އުފެއްދުމާއި، ތަފާތުތަކުން މުއްސަނދިވެފައިވާ ގްލޯބަލް ޑިޖިޓަލް މުޖުތަމައެއް ބިނާކޮށް، އެއްވެސް މީހަކު ފަހަތަށް ނުޖެހޭ ގޮތައް މަސައްކަތްކޮށް އެކަން ކަށަވަރުކުރުން ކަމަށްވެސް ބަޔާނުގައި ވެއެވެ.
ވެބް ސަމިޓްއާ ގުޅިގެން ސިނެޓެކްސްގެ ސީއީއޯ އިސްމާއީލް ކަލީމް ވިދާޅުވީ އެލްފާ ޕްރޮގްރާމަށް ހޮވުމުން ސިނެޓެކްސްއަށާއި ރާއްޖޭގެ ޓެކް އިކޯސިސްޓަމަށް މިހާތަނަށް ނުލިބޭފަދަ ފުރުސަތުތަކެއް ހުޅުވިގެންދާނެ ކަމަށެވެ. އަދި މި ފެންވަރުގެ ބޮޑު ޕްލެޓްފޯމެއްގައި ރާއްޖެ ތަމްސީލްކުރާ ފުރަތަމަ ސްޓާޓްއަޕްގެ ގޮތުގައި، މި ކުންފުނީގެ އީޖާދުތައް ދުނިޔޭގެ މަންސަބެއްގައި ދެއްކުމަށާއި، ރާއްޖޭގެ ކުރިމަގުގެ ޓެކް އާންޓްރެޕްރެނިއުރުންނަށް މަގުފަހިކުރުމަށް ޝައުގުވެރިވާކަމަށްވެސް ކަލީމް ފާހަގަކުރެއްވި އެވެ.
"އަޅުގަނޑުމެން އަލްފާ ޕްރޮގްރާމަށް ހޮވުމަކީ ސިނެޓެކްސް އަދި ދިވެހިރާއްޖޭގެ ޓެކްއިކޯސިސްޓަމަށް ކުރިން ލިބިފައިނުވާ ފުރުސަތުތަކެއް ހުޅުވިގެން ދިއުން. މި ފުރުސަތު ލިބުނު ފުރަތަމަ ދިވެހި ސްޓާޓްއަޕްގެ ގޮތުގައި، އަޅުގަނޑުމެންގެ އައު އީޖާދުތައް ދުނިޔޭގެ މަސްރަހަށް ގެނެސް، ދިވެހިރާއްޖޭގެ ކުރިމަގުގެ ޓެކް އާންޓްރެޕްރެނިއުރުންނަށް މަގުފަހިކޮށްދިނުމަށް ފޮނި އުންމީދުގައި މިތިބީ."
ވެބް ސަމިޓްގެ އަލްފާ ޕްރޮގްރާމަކީ އިސްތިސްނާ ގާބިލުކަން ހުރި އަލަށް ފަށާ ސްޓާޓްއަޕްތައް ފާހަގަކޮށް ކުރިއެރުވުމަށް ދުނިޔޭގައި ގަބޫލުކުރެވޭ ޕްރޮގްރާމެކެވެ.
ސިނެޓެކްސް ހޮވިފައިވަނީ އީޖާދީ ކަންކަމާއި މާކެޓް ޕޮޓެންޝަލް އަދި ވެލިއު ޕްރޮޕޮޒިޝަން އަށް ބަލައި، ވަރަށް ދަތި އިވެލުއޭޝަން ޕްރޮސެސްއަކަށް ފަހުގައި ކަމަށް ސިނެޓެކްސްއިން ބުންޏެވެ.
އަލްފާ ޕްރޮގްރާމްގައި ބައިވެރިވުމުން ސިނެޓެކްސް އަށް ލިބޭ ހާއްސަ ފުރުސަތުތަކުގެ ތެރޭގައި ހިމެނެނީ:
• ދުނިޔޭގެ އިންވެސްޓަރުންނާއި އިންޑަސްޓްރީގެ އިސްވެރިންނާ ގުޅުން އުފެއްދުން
• ހާއްސަ މާސްޓާކްލާސްތަކާއި މެންޓާޝިޕް
• ފަހުރުވެރި ޕިޗް މުބާރާތުގައި ބައިވެރިވުމުގެ ފުރުސަތު
• ބައިނަލްއަގްވާމީ މީޑިއާގެ ސަމާލުކަމާއި ނެޓްވޯކިންގް
ނިމިދިޔަ އަހަރު ވެބް ސަމިޓްގައި 118 ގައުމަކުން 15,000 އަށްވުރެ ގިނަ ބައިވެރިން ބައިވެރިވިެފައި ވެއެވެ. މީގެ ތެރޭގައި 81 ގައުމަކުން 1,000 އަށްވުރެ ގިނަ ސްޓާޓްއަޕް ހިމެނެއެވެ. މިއީ މި ސަރަހައްދުގައި ބޭއްވުނު ބައިނަލްއަގްވާމީ ސްޓާޓްއަޕްތަކުގެ އެންމެ ބޮޑުއެއްވުމެވެ.
ސިނެޓެކްސް އިން ދުނިޔޭގެ މުވާސަލާތުގައި ހުރި އެންމެ މުހިއްމު މައްސަލަތަކަށް އާމާޒުކޮށްފައި ވެއެވެ.
ސިނެޓެކްސްގެ ދަތުރު ފެށިފައިވަނީ ދިވެހިރާއްޖޭގެ ގައުމީ ބަހާއެކުގަ އެވެ. ދިވެހި ބަސް މަދުން ބޭނުންކުރެވޭ އިރު، ލިބުނު ތަޖުރިބާއިން އެމީހުންގެ މިޝަން އެކުލަވާލެވިފައިވަނީ އާޓިފިޝަލް އިންޓެލިޖެންސް މެދުވެރިކޮށް މުޖުތަމައުތައް ގުޅުވާލުމަށާއި، ތަރިކަ ދެމެހެއްޓުމަށާއި އަދި ހަރުދަނާކަން އިތުރުކުރުން ހިމެނޭ ކަމަށް ސިނެޓެކްސް އިން ބުންޏެވެ.
ސިނެޓެކްސްގެ ހައްލުތައް މިހާރުވެސް ރައީސް އޮފީސް، އެންޓި-ކޮރަޕްޝަން ކޮމިޝަން، ސިވިލް ސާވިސް ކޮމިޝަން އަދި ނެޝަނަލް އިންޓެގްރިޓީ ކޮމިޝަން ފަދަ މުހިންމު މުއައްސަސާތަކުގައި ބޭނުންކުރަމުންދާކަމަށްވެސް ބަޔާނުގައި ވެއެވެ.
މީގެއިތުރުން އެމީހުންގެ މެއިން ޕްރަޑަކްޓް thaana.ai އިން ދިވެހި ބަހަށް އޭއައި ޓޫލްތައް އާންމުންނަށް ފަސޭހައިން ލިބެން ފަށާފައިވެ އެވެ. އޭގެތެރޭގައި ދިވެހި ވާހަކަ އޭއައި ޓޫލް، ދިވެހިޓޭލްސް، މިހާރު ބޭނުންކުރާ ފަރާތްތަކަށް ލިބެމުންދާ ކަމަށް ސިނެޓެކްސްއިން ފާހަގަކުރެ އެވެ.
ސިނެޓެކްސް އިން ބުނީ މި ދެ މަޝްރޫއުގެ މަގްސަދަކީ ސަގާފީ ތަރިކަ ދެމެހެއްޓުމުގައި ހުރި މައިގަނޑު ގޮންޖެހުންތަކަށް ހައްލު ހޯދުން ކަމަށެވެ. އަދި މި ކުއާޓާގައި އިތުރު ކުރިއެރުންތަކެއް ތައާރަފުކުރުމަށް ހަމަޖެހިފައިވާކަމަށްވެސް ސިނެޓެކްސް އިން ބުންޏެވެ.
ވެބް ސަމިޓްގައި ބައިވެރިވުމުގެ ބައެއްގެ ގޮތުން، ސިނެޓެކްސްގެ މަގްސަދަކީ އެހެން މަދުން ބޭނުންކުރެވޭ ބަސްތަކަށް އެމީހުންގެ ފޯރުން އިތުރުކޮށް، އެމީހުންގެ މިޝަން ކުރިއެރުވުމަށް އެކުވެރިކަން ބިނާކުރުމެވެ.
މިކަމާ ގުޅިގެން ސިނެޓެކްސްގެ މެނޭޖިން ޑިރެކްޓަރު މުހައްމަދު ޖިނާސް ވިދާޅުވީ އުންމީދަކީ ޑިޖިޓަލް މުސްތަގްބަލަކަށް މި ކުންފުނީގެ ވިޝަން ހިއްސާކުރާ ދުނިޔޭގެ އިންވެސްޓަރުންނާއި، އިންޑަސްޓްރީގެ ލީޑަރުންނާއި، އަދި އެކުވެރިވާނެހެން ހީވާ ފަރާތްތަކާ ގުޅުން ބަދަހިކުރުން ކަމަށެވެ.
ސިނެޓްކްސްއިން ބުނީ މިއީ ހަމައެކަނި އިވެންޓެއް ނޫން ކަމަށެވެ. މިއީ ޓެކް ދުނިޔޭގައި ފުޅާ ކުރުމަށް އެޅޭ ފިޔަވަޅެއް ކަމަށެވެ. ވެބް ސަމިޓް ގަތަރު 2025 އަށް ތައްޔާރުވަމުންދާއިރު، ސިނެޓެކްސް ދަނީ ދިވެހިރާއްޖޭގެ އައު އީޖާދުތައް ދުނިޔެއަށް ދައްކުވައިދިނުމަށް ތައްޔާރީތައް ވަމުން ކަމަށް ސިނެޓްކްސްއިން ބުންޏެވެ.
