އީސީއަށް ޒާހިދާއި ސޮލާހު އައްޔަންކުރަން ރުހުން ދީފި
އިލެކްޝަންސް ކޮމިޝަން (އީސީ) ގެ ހުސްވެފައިވާ ދެ މެމްބަރުގެ މަގާމަށް މުހައްމަދު ޒާހިދާއި އަބްދުއްރަހްމާން ސޮލާހު ރަޝީދު އައްޔަންކުރަން ރައްޔިތުންގެ މަޖިލިހުން ފާސްކޮށްފި އެވެ.
އެ ދެ މަގާމަށް އައްޔަންކުރަން ނިމިދިޔަ މަހުގެ 12 ވަނަ ދުވަހު ރައީސް ޑރ. މުހައްމަދު މުއިއްޒު، މަޖިލިހަށް ނަން ފޮނުއްވި މުހައްމަދު ޒާހިދު ވަނީ ހިއުމަން ރައިޓްސް ކޮމިޝަން (އެޗްއާރުސީއެމް) ނައިބު ރައީސްކަން ކުރައްވާފަ އެވެ. ސޮލާހު ވަނީ ހޯމްލޭންޑް މިނިސްޓްރީގެ ޕާމަނަންޓް ސެކްރެޓަރީގެ މަގާމު އަދާކުރައްވާފަ އެވެ.
ދައުރުން ބޭރުން މިއަދު ބޭއްވި ޖަލްސާގައި އީސީއަށް އައްޔަން ކުރަން ރައީސް މަޖިލިހަށް ފޮނުއްވި މައްސަލަ، މިނިވަން މުއައްސަސާތަކުގެ ކޮމިޓީން ދިރާސާކޮށް ނިންމި ގޮތުގެ ރިޕޯޓު ވަނީ އިއްވާފަ އެވެ.
ކޮމިޓީން ޒާހިދަށް 93.80 އިންސައްތަ މާކްސް ދީފައިވާއިރު، ސޮލާހަށް ލިބިފައި ވަނީ 91.40 އިންސައްތަ މާކްސްއަށެވެ.
އީސީގެ މެމްބަރު ކަމަށް ޒާހިދާއި ސޮލާހު އައްޔަންކުރަން ފެންނަ ކަމަށް ފާސްކޮށްފައި ވަނީ ޖަލްސާގައި ބައިވެރިވަޑައިގެންނެވި މެމްބަރުންގެ އިއްތިފާގުންނެވެ. އެއީ 68 މެމްބަރުންގެ ވޯޓާ އެކުގަ އެވެ. ނުފެންނަ ކަމަށް އަދި ވަކި ގޮތަކަށް އެއްވެސް މެމްބަރެއް ވޯޓު ދެއްވާފައެއް ނުވެ އެވެ.
އީސީގެ ދެ މެމްބަރެއްގެ މަގާމު ހުސްވެފައި ވަނީ ކޮމިޝަނުގެ ނައިބު ރައީސް އަލީ ނަޝާތާ އަދި މެމްބަރު މުހައްމަދު އާސިފުގެ މައްޗަށް އިތުބާރު ނެތް ކަމުގެ ވޯޓެއް މަޖިލިހުން ނެގުމާ ގުޅިގެންނެވެ. މަގާމުން ދުރުކޮށްފައި ވަނީ އީސީގެ ޑާޓާބޭސްގައި ހުރި މައުލޫމާތު ނަހަމައިން ބޭނުންކޮށް، މަގާމުގެ ނާޖާއިޒު ފައިދާ ނެގި ކަމުގެ ތުހުމަތުގަ އެވެ.
އިލެކްޝަންސް ކޮމިޝަނުގައި މިހާރު ތިއްބަވަނީ ހަސަން ޒަކަރިއްޔާ އާއި އަބްދުލްހަސީބު އިސްމާއިލުގެ އިތުރުން ޑރ. މުހައްމަދު ޒާހިރެވެ.
