އިހްސާނުގެ އިތުބާރު ނެތްކަމުގެ މައްސަލަ މަޖިލީހަށް ވައްދައިފި
ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހްސާނުގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ވައްދައިފި އެވެ.
އެ މައްސަލަ މަޖިލީހަށް ވެއްދިކަން އެމްޑީޕީގެ މެމްބަރަކު ވަނީ "ދެން" އަށް ކަށަވަރު ކޮށްދެއްވާފަ އެވެ.
މެމްބަރު ވިދާޅުވީ އެ މައްސަލަ މަޖިލީހަށް ވެއްދީ އެމްޑީޕީގެ 12 މެމްބަރުންގެ ސޮޔާ އެކުގައި ކަމަށެވެ. އެހެންނަމަވެސް އިތުރު ތަފްސީލެއް އޭނާ ނުދެއްވަ އެވެ.
ހޯމް މިނިސްޓަރުގެ މައްޗަށް އިތުބާރު ނެތްކަމުގެ ވޯޓެއް ނަގަން ހުށަހެޅި ނަމަވެސް މަޖިލީހުގެ މެޖޯރިޓީ ވެރިކަން ކުރާ ޕީއެންސީއަށް އޮތުމުން އެ މައްސަލަ ކާމިޔާބުވާނެ ކަމަކަށް ނުބެލެވެ އެވެ.
މިނިސްޓަރުގެ އިތުބާރު ނެތް ކަމުގެ މައްސަލަ މަޖިލީހަށް ވެއްދިއިރު، ވައިކަރަދޫ ދާއިރާގެ މެމްބަރު ހުސައިން ޒިޔާދު (ފިއްޓެ) ހިމެނޭހެން އެމްޑީޕީގެ ބައެއް މެމްބަރުންނަށް ނޭނގި ޕީއެންސީއަށް ވެއްދި މައްސަލައިގައި އެމްޑީޕީން ދަނީ ވަރަށް ބޮޑަށް ނުރުހުން ފާޅުކުރަމުންނެވެ.
އެ މައްސަަލަ ފުލުހުން ވެސް ބަލަމުންދާއިރު، ޕީއެންސީން ވަނީ މަދުން ނަމަވެސް ސައްހަ ނޫން ފޯމުތަކެއް ހުށަހެޅިފައިވާކަން ފާހަގަކުރެވިފައިވާ ކަމަށް ބުނެފަ އެވެ.
އެ މައްސަލައިގައި މިނިސްޓަރާ ސުވާލުކުރަން ވެސް އެމްޑީޕީއަށް ނިސްބަތްވާ ގަލޮޅު ދެކުނު ދާއިރާގެ މެމްބަރު މީކާއިލް އަހްމަދު ނަސީމް ވަނީ ހުށަހަޅުއްވާފަ އެވެ.
އެމްޑީޕީން ބުނެފައިވާ ގޮތުން ޕީއެންސީއަށް ވަނުމަށް ފޯމު ފުރާފައި ނުވާ އެ ޕާޓީގެ ބައެއް އާންމު މެމްބަރުންނާއި ގައުމީ މަޖިލީހުގެ މެމްބަރުން ވެސް އެމްޑީޕީގެ ދަފްތަރުން އުނިކޮށް ޕީއެންސީގެ ހިމަނާފައިވާތީ އެ މައްސަލަ އިލެކްޝަންސް ކޮމިޝަން (އީސީ) ގެ ސަމާލު ކަމަށް އެކި ފަހަރު މަތިން ގެންގޮސްފައިވާ ކަމަށެވެ.
އެމްޑީޕީން ތުހުމަތުކޮށްފައިވާ ގޮތުން ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގެ މުވައްޒަފުންނާއި ވަސީލަތްތަކާއި އެ އިދާރާގައި ހުރި މައުލޫމާތު ބޭނުންކޮށްގެން ޕީއެންސީއަށް މީހުން ވެއްދުމުގެ މުޅި އިޖުރާއަތު ހިނގައި ދިޔައީ މިނިސްޓަރު އިހްސާނުގެ ސީދާ ބެއްލެވުމުގެ ދަށުން ކަމަށެވެ.
