ސިޔާސީ ޕާޓީތަކުގެ ދަފްތަރު އާންމުކޮށް، ޝަކުވާއަށް އަންނަ ހަފްތާގައި ހުޅުވާލަނީ
ސައްހަ ނޫން ފޯމުތަކެއް ފުރައިގެން ސިޔާސީ ޕާޓީތަކަށް މީހުން ވައްދާ މައްސަލަ ބޮޑުވުމުން، ޕާޓީތަކުގެ ދަފްތަރު އާންމުކޮށް ލިސްޓަށް އަލުން ޝަކުވާ ހުށަހަޅަން ހުޅުވާލަން އިލެކްޝަންސް ކޮމިޝަން (އީސީ) އިން ނިންމައިފި އެވެ.
ވަގު ފޯމުތަކުގެ މައްސަލަ ފެންމަތިވީ މިދޭތެރެއިން ވެރިކަންކުރާ ޕީއެންސީ އަށް މެންބަރުން އިތުރުކުރުމަށް ހިންގި ހަރަކާތް ކުރިއަށް ދަނިކޮށް އެމްޑީޕީގެ މެންބަރުންތަކެއް، އެ މީހުންނަށް ނޭނގި ޕީއެންސީއަށް ވައްދާފައިވާކަން ތިލަވުމުންނެވެ. އޭގެ ތެރޭގައި އެމްޑީޕީގެ ގައުމީ މަޖިލީހުގެ މެންބަރުންނާ، ޕީއެންއެފް، ޑިމޮކްރެޓްސްގެ އިތުރުން އުވާލާފައިވާ ޕީޕީއެމްގެ މެންބަރުންވެސް އެ މީހުންނަށް ނޭނގި ޕީއެންސީގައި ދަފުތަރު ކޮށްފައިވާކަން ފެންމަތިވި އެވެ.
ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދު (ފިއްޓޭ) އާއި މިދިޔަ ސަރުކާރުގެ އާޓްސް އެންޑް ކަލްޗާގެ ސްޓޭޓް މިނިސްޓަރު މުހައްމަދު ތޯރިގު ވެސް އޮތީ ޕީއެންސީއަށް ވައްދާފަ އެވެ. މެމްބަޝިޕް ޑްރައިވް ކުރިއަށް ގެންދިޔައިރު މަދުން ނަމަވެސް ސައްހަ ނޫން ފޯމުތަކެއް ހުށަހެޅިފައިވާ ކަމަށް ޕީއެންސީން އެއްބަސްވެ އެވެ. މައްސަލަ މާބޮޑަށް ގޯސްވެ، އީސީން ވަނީ ސިޔާސީ ޕާޓީތަކުގައި މެމްބަރުން ދަފުތަރުވުމަށް ބޭނުންކުރާ ސިމަދަ ޕޯޓަލް ހުއްޓާލާފަ އެވެ.
އީސީގެ މެންބަރު ހަސަން ޒަކަރިއްޔާ "ދެން" އަށް މިއަދު ވިދާޅުވީ ހުސްވި 2024 ވަނަ އަހަރުގެ ޑިސެމްބަރުގެ ނިޔަލަށް ސިޔާސީ ޕާޓީތަކުން އެ ކޮމިޝަނަށް ހުށަހެޅުނު ފޯމްތަކުގެ ސައްހަކަން ކަށަވަރުކުރެވެން އޮތް އެންމެ ރަނގަޅު ގޮތަކީ މުޅި ސިޔާސީ ޕާޓީގެ ދަފްތަރަށް ޝަކުވާ ހުށަހަޅަން ހުޅުވާލުން ކަމަށެވެ. ކޮންމެ އަހަރަކުވެސް ޕާޓީގެ ދަފްތަރަށް ޝަކުވާ އަށް ހުށަހަޅަން ހުޅުވާލަ އެވެ.
"ހުރިހާ ޕާޓީއެއްގެ ދަފްތަރަށް އާއްމުކޮށް ހުޅުވާލާފައި އާންމު އިއުލާނެއް ކުރުން ހުރިހާ ރައްޔިތުން ބަލައިދޭށޭ، ބަލައިދީފައި އެއްވެސް ރައްޔިތެއްގެ ޝަކުވާ އެއް އޮތް ނަމަ" ޒަކަރިއްޔާ ވިދާޅުވި އެވެ. އޭނާ ވިދާޅުވީ ފެށޭ ހަފްތާގައި ޝަކުވާ އަށް ހުށަހަޅަން ހުޅުވާލާނެ ކަމަށެވެ. ވަކި ދުވަހެއް ވިދާޅެއްނުވެ އެވެ. ދައުލަތުގެ ބަޖެޓުން ސިޔާސީ ޕާޓީތަކަށް ދޭން ޖެހޭ ފައިސާގެ އަދަދުތައް ކަނޑައަޅާނީ މެމްބާޝިޕް އިތުރަށް ކަށަވަރުކުރުމަށް ފަހު ކަމަށް އީސީން ނިންމާފައިވެ އެވެ.
ނޭނގި ޕާޓީތަކަށް މީހުން ވެއްދުމުގައި އީސީގެ އެއްވެސް މުވައްޒަފެއްގެ ދައުރެއް އޮވެދާނެތޯ ސުވާލުކުރުމުން ޒަކަރިއްޔާ ވިދާޅުވީ މިހާރު އޮންނަ ގޮތުން ފޯމްތަކުގައި ޖަހާ ފިންގާ ޕްރިންޓާ މޯބައިލް ނަންބަރުތަކުގެ ސައްހަކަން ޔަގީންކުރެވޭނެ ގޮތެއް އީސީއަށް ނެތް ކަމަށެވެ. އެކަމަކު އިދާރީ ބައެއް ކުށްތައް ފޯމުތަކުގައި ހުރި ކަމަށް ވިދާޅުވި އެވެ.
"އޭގައި ވަކި މުވައްޒަފަކު ވަކިކަމެއް ކުރިކަން އަދި އަޅުގަނޑުމެންނަށް ފާހަގަކުރެވިފައެއް ނެތް.. މިސާލަކުން 4 މީހަކު ބަލަންޏާ ފޯމުގައި ނުހުންނާނެތާ އެއްގޮތެއް" އޭނާ ވިދާޅުވި އެވެ.
ވަގަށް ޕާޓީތަކަށް މީހުން ވައްދާ މައްސަލަ އެމްޑީޕީއާ އީސީން އޮތީ ފުލުހަށް ހުށަހަޅާފަ އެވެ. އެ މައްސަލައި ބަލައިދޭން އެމްޑީޕީން ވަނީ އޭސީސީގައިވެސް އެދިފަ އެވެ.
