ލައްކައަށްވުރެ ގިނަ ޑޮލަރު ބޭރުކުރަން އުޅުނު މީހަކު ޖޫރިމަނާކޮށް، ފައިސާ ދައުލަތަށް ނަގައިފި
ރާއްޖެއިން ބޭރަށް ގިނަ އަދަދެއްގެ ޑޮލަރާއި ޔޫރޯ ބޭރުކުރަން އުޅުނު އިންޑިއާ މީހަކު 12،000 ރުފިޔާއިން ޖޫރިމަނާކޮށް، އޭނާ ބޭރުކުރަން އުޅުނު ފައިސާ ދައުލަތަށް ނަގަން ކްރިމިނަލް ކޯޓުން މިއަދު ހުކުމް ކޮށްފި އެވެ.
ރާއްޖެއިން ސިއްރުން މުދާ ބޭރުކުރަން އުޅުމުގެ ކުށް ސާބިތުވެ، ކޯޓުން އެ ހުކުމްކުރީ އިންޑިއާގެ އަބްދުލް ރަގޫބް ނިސްތާރު ހަލީލް ރަހުމާން (27އ) ގެ މައްޗަށެވެ.
އެ ދައުވާ އޭނާގެ މައްޗަށް އުފުލާފައިވަނީ ސެޕްޓެމްބަރު 2، 2024 ގައި ވެލާނާ އިންޓަނޭޝަނަލް އެއާޕޯޓު (ވީއައިއޭ) އިން ސްރީލަންކާ އަށް ފުރަން އޮތް ފްލައިޓަށް އެރުމުގެ ކުރިން ޗެކިން ކުރުމުގެ ތެރޭގައި އޭނާގެ ލަގެޖު ޗެކްކުރިއިރު ފައިސާ އަޅާފައިވާ 14 ސިޓީ އުރައެއްގެ ތެރެއިން 104،977 ޔޫއެސް ޑޮލަރާއި، 31،585 ޔޫރޯ އާއި 180 ސްވިސް ފްރޭންކުގެ އިތުރުން 100 ދިރުހަމް ފެނިފައިވާ މައްސަލާގަ އެވެ.
އޭގެ އިތުުރުން ރަގޫބްގެ ބެކްޕެކް ތެރެއިން އަންނައުނު އޮޅާ ފޮރުވާފައިހުރި 7 ސިޓީއުރައެއްވެސް ފެނުނެވެ. ކޯޓު ހުކުމްގައި ބުނާ ގޮތުން އެ ސިޓީ އުރަތަކުގެ ތެރޭގައި 32،395 ޑޮލަރާއި 18،790 ޔޫރޯ އޮތެވެ. ކަސްޓަމުން ކްރިމިނަލް ކޯޓުގައި އެދުނީ ޑީކްލެއާ ކުރުމެއް ނެތި އެ ފައިސާ ރާއްޖެއިން ބޭރުކުރަން އުޅެފައިވާތީ ފައިސާ ދައުލަތަށް ނަގައި ދިނުމަށެވެ.
ދައުވާތަކެއް އިއުތިރާފުވެ، ރައުގޫބް ވަނީ ޕްރޮސެކިއުޓާ ޖެނެރަލް (ޕީޖީ) އާ އެކު އިއުތިރާފުގެ އެއްބަސްވުމެއް ހަދާފަ އެވެ.
އޭނާގެ މައްޗަށް އުފުލި ދައުވާ ސާބިތުވެ 12،000ރ އިން ޖޫރިމަނާކޮށް މިއަދުން ފެށިގެން ދެ މަސް ދުވަހުގެ ތެރޭގައި އެ ފައިސާ މީރާއަށް ދައްކަން ގާޒީ ހުސެއިން ފާއިޒް ރަޝީދު ހުކުމްކޮށްފައިވެ އެވެ.
އަދި ބޭރުކުރަން އުޅުނު ފައިސާ (3 މިލިއަނެއްހާ ދިވެހި ރުފިޔާ) ކަސްޓަމަށް ނެގުމަށް ކޯޓުން ވަނީ އަމުރުކޮށްފަ އެވެ.
Ads by STO
