އެޗްއާރުސީއެމްގެ ނައިބަކަށް މޫމިނާ އައްޔަންކުރަން ރުހުން ދީފި
ހުސްވެފައިވާ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) ގެ ނައިބު ރައީސްގެ މަގާމަށް އެ ކޮމިޝަނުގެ މެމްބަރު މޫމިނާ ވަހީދު އައްޔަންކުރަން ފެންނަ ކަމަށް ރައްޔިތުންގެ މަޖިލިހުން މިއަދު ފާސްކޮށްފި އެވެ.
އެޗްއާރުސީއެމްގެ ނައިބު ރައީސްގެ މަގާމަށް އައްޔަންކުރެއްވުމަށް، އެ ކޮމިޝަނުގެ މެމްބަރު ކަމަށް އައްޔަންކުރައްވާފައިވާ މޫމިނާގެ ނަން މަޖިލިހަށް ރައީސް ޑރ. މުހައްމަދު މުއިއްޒު މަޖިލިހަށް ފޮނުއްވީ ދައުރުން ބޭރުން މިދިޔަ ބުރާސްފަތި ދުވަހު ބޭއްވި ޖަލްސާއަށެވެ.
އެ މައްސަލަ ދިރާސާ ކުރުމަށް މަޖިލިހުގެ ހިއުމަން ރައިޓްސް އެންޑް ޖެންޑާ ކޮމިޓީއަށް އެ ދުވަހު ފޮނުވި އެވެ.
މައްސަލަ ދިރާސާކުރަން ބުރާސްފަތި ދުވަހު ބޭއްވި ކޮމިޓީގެ ބައްދަލުވުމުގައި އިންޓަވިއުއަކާ ނުލައި ނައިބު ރައީސް ކަމަށް މޫމިނާ އައްޔަންކުރުމަށް ފެންނަ ކަމަށް ފާސްކުރަން ހުށަހެޅުއްވީ ވައިކަރަދޫ ދާއިރާގެ އެމްޑީޕީ މެމްބަރު ހުސައިން ޒިޔާދު (ފިއްޓެ) އެވެ. ފިއްޓެގެ ހުށަހެޅުމަށް ތާއީދު ކުރެއްވީ ދާންދޫ ދާއިރާގެ ކޮންގްރެސް ޕާޓީ މެމްބަރު މުހައްމަދު ފަޒީލް އެވެ.
އެޗްއާރުސީއެމްގެ ނައިބު ރައީސްގެ މަގާމަށް މޫމިނާ އައްޔަންކުރަން ކޮމިޓީން ފާސްކޮށްފައި ވަނީ ބައްދަލުވުމުގައި ބައިވެރިވެވަޑައިގެންނެވި ހުރިހާ މެމްބަރުންގެ އިއްތިފާގުންނެވެ.
މިއަދު ބޭއްވި ޖަލްސާގައި ވަނީ ހިއުމަން ރައިޓްސް އެންޑް ޖެންޑާ ކޮމިޓީން ނިންމި ގޮތުގެ ރިޕޯޓު އިއްވާފަ އެވެ. ކޮމިޓީން ނިންމި ގޮތުގެ ރިޕޯޓު ތަޅުމަށް އިއްވައިދެއްވީ އެ ކޮމިޓީގެ ނައިބު މުގައްރިރު ކުޑަހުވަދޫ ދާއިރާގެ ކޮންގްރެސް ޕާޓީ މެމްބަރު ހުސައިން ހަމީދެވެ.
އެޗްއާރުސީއެމްގެ ނައިބު ރައީސްގެ މަގާމަށް މޫމިނާއަށް އައްޔަންކުރަން ފެންނަ ކަމަށް ފާސްކޮށްފައި ވަނީ ވޯޓުގައި ބައިވެރިވެވަޑައިގެންނެވި 67 މެމްބަރުންގެ އިއްތިފާގުންނެވެ.
އެޗްއާރުސީއެމްގެ މެމްބަރު ކަމަށް މޫމިނާ އައްޔަންކުރެއްވީ 2020 ވަނަ އަހަރުގެ ސެޕްޓެމްބަރު މަހުގެ 8 ވަނަ ދުވަހު އެވެ. އޮސްޓްރޭލިއާގެ ޔުނިވާސިޓީ އޮފް ސިޑްނީން ހިއުމަން ރައިޓްސް އެންޑް ޑިމޮކްރަޓައިޒޭޝަންއިން މާސްޓާސް ހާސިލުކުރައްވާފައިވާ މޫމިނާ ވަނީ އިކޮނޮމިކް މިނިސްޓްރީގެ އިތުރުން ޓްރީޓޮޕް ހޮސްޕިޓަލުގައި ވެސް މަސައްކަތް ކުރައްވާފަ އެވެ.
އިކޮނޮމިކް މިނިސްޓްރީގައި ކޮންސަލްޓެންޓެއްގެ ގޮތުގައި މަސައްކަތް ކުރެއްވިއިރު، ޓްރީޓޮޕްގެ ހިއުމަން ރިސޯސް މެނޭޖަރުގެ މަގާމުގެ އިތުރުން އެސިސްޓެންޓް މެނޭޖަރުގެ މަގާމު އޭނާ އަދާކުރެއްވި އެވެ.
އެޗްއާރުސީއެމްގެ މެމްބަރަކަށް ވެވަޑައިގެންނެވުމުގެ ކުރިން، އެ ކޮމިޝަނުގެ އެސިސްޓެންޓް ރިސާޗް އޮފިސަރުގެ މަގާމާއި ޕްލޭނިން އޮފިސަރުގެ މަގާމު އަދި ކޯޕަރޭޓް އެފެއާޒް ޑިޕާޓްމެންޓުގެ ޑިރެކްޓަރުގެ މަގާމު ވެސް އަދާކުރައްވާފައިވެ އެވެ.
އެޗްއާރުސީއެމަށް ނައިބަކު އައްޔަންކުރަން މަޖިލިހަށް ނަން ފޮނުވާފައިވަނީ އެ ކޮމިޝަނުގެ ކުރީގެ ނައިބު ރައީސް ޑރ. އަހުމަދު އަދުހަމް އަބްދުﷲ އިސްތިއުފާދެއްވުމުންނެވެ.
އެޗްއާރުސީއެމްގެ ރައީސަކީ މަރްޔަމް މުނާ އެވެ. މުއުމިނާގެ އިތުރުން ކޮމިޝަނުގެ މެމްބަރުންގެ ގޮތުގައި ތިއްބަވަނީ އިސްމާއީލް ހަބީބް އަބްދުއްރަހީމާއި އާމިނަތު ޝިފާއަތު އަބްދުއްރައްޒާގުގެ އިތުރުން ސަމާއު އަހްމަދު ނަޖީބެވެ.
