ޑީއެންއާރުގައި އައިޑީ ކާޑު ފޮޓޯ ކޮޕީއެއް ނުހުރޭ، ޑޭޓާ ރައްކާތެރި
ބޮޑު ވާހަކައެކެވެ. ކުޑަކޮށް ދެއްކޭނެ ވާހަކައެއް ނޫނެވެ. ޝަހްސު ވަގަށް ނެގި ވާހަކައެކެވެ. ކުރަނީ ބޮޑެތި ތުހުމަތު ތަކެކެވެ. ހެއްކެއް ނެތެވެ. ނަމަވެސް ވާހަކަ ބޮޑެވެ. ގަބޫލު ކުރާ މީހުން ވެސް ގިނަ އެވެ. އެހެންވެ، "ދެން" ގެ ޓީމުން ބޭނުންވީ ކަން ހިނގާ ގޮތް ބަލާލާށެވެ. ދައްކަން މިއުޅެނީ، ދިވެހިންގެ ހުރިހާ މައުލޫމާތެއް މަތިކޮށްފައި އޮންނަ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) އިން 'ވައްކަން' ކުރިއޭ ކިޔާފައި ދެކެވޭ ވާހަކައަށެވެ.
ކީބޯޑް ވާރިއާކަށް ވާާން ބޭނުން ނުވާތީ، އަހަރެންނާއި އަހަރެންނާއެކު މަސައްކަތް ކުރާ ނޫސްވެރިޔަކާ ދެމީހުން ދިޔައީ ވެލާނާ ގޭގެ ހަތަރުވަނަ ފަންގިފިލާގައި ހިންގަމުން އަންނަ ޑީއެންއާރުގެ އޮފީހަށެވެ. ދައުވަތެއް ލިބިގެނެއް ނޫނެވެ. ހަމަ ކަން ހިނގާ ގޮތް ބަލާށެވެ.
އެ ތަނަށް ގޮސް އެތަން ހިންގަން ހަވާލުވެ ހުންނެވި އަހްމަދު އާލީއަށް ގުޅާލީމެވެ. ކަން ދިމާކުރި ގޮތުން އޭނާ މިއަދު ހުރީ ވަޒީފާގެ އިތުރު މަސްއޫލިއްޔަތެއް އަދާކުރުމަށް އޮފީހުން ބޭރުގަ އެވެ. ނަމަވެސް އަހަރެމެންގެ ޓީމަށް ބޭނުންވާ ހުރިހާ މައުލޫމާތެއް އެ ތަނުގެ މުވައްޒަފުން ދޭނެ ކަމުގެ ޔަގީންކަމާ އެކު، އޮފީހުން ފޯކަލް ޕޮއިންޓެއް ހިއްސާކުރި އެވެ.
ޕިއްޒާ ރޫމް
އޭރު ގަޑިން ގާތްގަނޑަކަށްވާނީ 1:30 އެވެ. ވެލާނާގޭގެ ލިފްޓުން ހަތަރު ވަނަ ފަންގިފިލާއަށް އަހަރެމެން އަރައިފީމެވެ. މާ ޖާގަ ތަނަވަސް އޮފީހެއް ނޫނެވެ. އަހަރެމެން ރިސީވް ކުރަން އޮފީހުން ކުއްޖަކު ނިކުމެ ހުއްޓެވެ. ހަނި ދޮރަކުން ލާފައި ދިޔައިރު، ފެނުނީ އެއްކަލަ ޕިއްޒާ ކާން ތިބި ރޫމެވެ. އޭރު އެތަނުގައި މީޓިންއެއް ހިނގަމުންދެ އެވެ.
ފުރަތަމަ ސުވާލު ކުރީ އެހިސާބުންނެވެ. "މިއީ ޑީއެންއާރުގެ މީޓީން ރޫމްތަ؟" އެ ވާހަކަތައް އޭނާ ކިޔައިދިން ގޮތަށް ހިއްސާކޮށްލާނަމެވެ.
ޑީއެންއާރުގެ ހިދުމަތަކީ ހުއްޓުމެއް ނެތި މަސައްކަތްކުރާ އޮފީހަކަށްވާ ފަދައިން، ތަނާ ގުޅިފައިވާ "މީޓިން ރޫމް" އަކީ ވެސް އެފަދަ ތަނެކެވެ.
ޑީއެންއާރުގައި ހާއްސަ މީޓީން ރޫމެއް ހުންނައިރު، ޑިޕާޓްމަންޓުގެ ބެލެނިވެރި ފަރާތް، ހޯމްލޭންޑް މިނިސްޓްރީގައި ވެސް މީޓިން ރޫމެއް ހުރެ އެވެ. އެހެންނަމަވެސް އެތަނުގައި ބޮޑަށް ހިނގަނީ މިނިސްޓްރީ އާ ގުޅުންހުރި ބައްދަލުވުންތަކެވެ.
އެއާ ހިލާފަށް ޑީއެންއާރުގެ މީޓިން ރޫމަށް އޮންނަ ޑިމާންޑް ބޮޑެވެ. ސަބަބަކަށް ވަނީ ތަނަކީ އެކި ބޭނުންތަކަށް ދޫކުރަމުން އަންނަ ތަނަކަށް ވާތީ އެވެ. ބައްދަލުވުންތަކަށާއި އިދާރީ އެކި މަސައްކަތްތައް ކުރުމަށް މިނިސްޓްރީތަކަށާއި އެކި މުއައްސަސާތަަކަށް އެ ތަން ދޫކުރެ އެވެ.
މީޓިން ރޫމަކީ ޑީއެންއާރުގެ އޮފީހާ މުޅިން ވަކި ކުރެވިފައިވާ ތަނެކެވެ. ތަން ދޫކުުރުމަށް ފަހު، ތަނުގައި ހިނގާ ކަމެއް ނުބަލަ އެވެ. ކުރާ ކަމަކާ އެ ޑިޕާޓްމަންޓަކުން ނުބެހެ އެވެ.
ސޯޝަލް މީޑިއާގައި ދައުރުވެ، ގިނަ ބައެއްގެ ސަމާލުކަން ދަމައިގަތް ފޮޓޯތަކުން ފެންނަނީ އެ ރޫމެވެ. ނަމަވެސް ތަނުގައި އެ ވަގުތު ހިނގަމުން ދިޔައީ ޑީއެންއާރާ އެއްވެސް ގޮތަކުން ގުޅުމެއް ހުރި މަސައްކަތެއް ނޫނެވެ. އެކަން ކުރުމުގައި ތަނުގައި ހުރި މައުލޫމާތެއް އަދި ވަސީލަތެއްގެ ބޭނުން ވެސް ކޮށްފައެއް ނުވެ އެވެ. މީޓިން ރޫމް ނަގައި، މަސައްކަތް ކުރުމުގައި ޝާމިލުވެ އުޅުނީ ސިޔާސީ އެކި މަގާމުތައް ފުރަމުންދާ މުވައްޒަފުންނެވެ.
މަސައްކަތް ހިނގާ ނުހިނގާ ގޮތް ބައްލަވައި، ކަމާ ގުޅުންހުރި އިރުޝާދު ދެއްވަން ހޯމްލޭންޑް މިނިސްޓަރުގެ ހައިސިއްޔަތުން މިވަގުތު ހުންނެވީ އަލީ އިހްސާނެވެ. މިނިސްޓަރުގެ ބެއްލެވުމުގެ ދަށުން މަސައްކަތް ވިލަރެސް ކުރުމުގައި ސިޔާސީ މުވައްޒަފުން ހަރަކާތްތެރިވަމުން އައި ނަމަވެސް އެ ޑިޕާޓްމަންޓުން ކުރަމުން ދަނީ ސިޔާސީ މަސައްކަތެއް ނޫނެވެ.
އަހަރެމެން ޑީއެންއާރަށް ދިޔައިރު، އެ ތަނުގައި ހިނގަމުން ދިޔައީ ހޯމް ލޭންޑްގެ ފޮރިން ލޭބާ ޑިޕާޓްމެންޓްގެ މީޓިންއެކެވެ.
ހަމައެކަނި ޑީއެންއާރުން ލިބޭ މައުލޫމާތެއް ނޫން
އާންމު މީހާގެ ޒާތީ އެތައް މައުލޫމާތެއް ރައްކާކުރެވޭ އަދި ރައްކާކުރެވިފައިވާ ތަނަކީ މިއީ އެވެ. ނަމަވެސް ނޭނގޭ ވާހަކައަކީ އެ މައުލޫމާތުތަކީ އިތުރު އިދާރާތަކާ ހިއްސާކުރެވިފައި ހުންނަ މައުލޫމާތުތަކެއް ކަމެވެ. އޭޕީއައި މެދުވެރިކޮށް، ޑީއެންއާރުގެ ޑޭޓާބޭސްއަށް 53 އިދާރާއަކުން އެކްސެސް ވެވެ އެވެ. އެއީ ހިދުމަތް ދޭން ކޮންމެހެން ބޭނުންވާ މައުލޫމާތު ކަށަވަރުކުރުމަށް ދޫކޮށްފައިވާ އޭޕީއައި ތަކެކެވެ.
ޑޮކްޓަރަށް ދައްކާ ކޮންމެ ފަހަރަކު، ބޭސް ނަގާ ކޮންމެ ފަހަރު މި އައިޕީތަކުން ޑީއެންއާރުގެ ޑޭޓާ ބޭސްއަށް އެކްސެސްވެ އެވެ.
އެ ތަންތަނުން އެ މައުލޫމާތު އިތުރު އެތައް ބަޔަކަށް ލިބޭނެހެން ފަހިވެފައި ހުންނާނެ ކަމަށް ބެލެވެ އެވެ. އާސަންދަ އާއި ކަމާ ގުޅުންހުރި އެކި ވިއުގަތައް މެދުވެރިކޮށް ސިއްހީ ހިދުމަތްދޭ އެކި މަރުކަޒުތަކުންނާއި ފާމަސީތަކާ އަދި ފުލުހުންގެ ހިދުމަތުގެ ތެރެއިންނެވެ.
ކްލިނިކްތަކަށް ޑޮކްޓަރަށް ދައްކަން ދިއުމުން ނުވަތަ ފާމަސީތަކުން ބޭސް ނަގަން ޖެހޭ ފަހަރުތަކުގައި ބައެއް ތަންތަނުން އައިޑީކާޑުގެ ނަގަ އެވެ. ތަނުގައި މައުލޫމާތު ރައްކާ ކުރަން ޖެހޭތީ، އެކަމަށް ކޮޕީއެއް ބޭނުންވާތީ އެވެ. އޭގެ އިތުރުން އާންމު ދިރިއުޅުމުގެ އެކި ހާޖަތްތައް ފުއްދުމަށް އައިޑީކާޑުގެ ބޭނުން ޖެހުމުން އޭގެ ކޮޕީ ތަންތަނަށް ދީގެން ނަގައި އުޅެމު އެވެ.
އެކަން އެގޮތަށް ކުރާއިރު އަހަރެމެންގެ ހިތަށް ޒައްރެއްގެ މިންވަރަށް ގޯހެއް ހިނގާފާނެ ކަމަކަށް ނުދެކެމު އެވެ. ކަމުގެ އަސްލަކީ ވެސް އެއީ އެވެ. ހިދުމަތް ހޯދަނީ ހިދުމަތަށް އެދެން ޖެހިގެނެވެ. މަޖުބޫރީ ހާލަތެއް މެދުވެރިވެގެނެވެ. ކަމުގެ ފައިދާ ޖާއިޒު ނޫން ގޮތުގައި ފަހަރެއްގައި ވެސް ނަގާފާނެ ކަމަކަށް ހީއަކަށް ވެސް ވިސްނިފައި ނުވާތީ އެވެ.
ދެން ދައްކަނީ ކުރީގެ ފޮޓޯ ޖަހާ ވާހަކަ އެވެ. ކުރީގެ ފޮޓޯއަކީ ހަމައެކަނި ޑީއެންއާރުގައި ހުންނަ މައުލޫމާތެއް ނޫނެވެ. ޑީއެންއާރުގެ އޭޕީއައި ބޭނުންކުރާ ފަރާތްތަކުން، މައުލޫމާތު ކޭޝް ކުރާ ނަމަ، ކުރީގެ ފޮޓޯތައް ލިބެ އެވެ. އަހަރެންގެ ޕެންޝަން ވެބްސައިޓްގައި ހުރި ފޮޓޯއަކީ، ކުރީގެ ފޮޓޯއެކެވެ. އެކަން އަހަރެމެން ވާނީ ޔަގީންކޮށްފަ އެވެ.
ޑީއެންއާރުގެ އޭޕީއައި ބޭނުންކުރާ ޕެންޝަން އޮފީހުގެ ޕޯޓަލްއާއި ޑީއެންއާރުގެ ޑޭޓާ ބޭސް، ޕެންޝަން އޮފީހުގެ ޕޯޓަލްގައި ހުރީ ކުރީގެ އައިޑީ ކާޑުގެ ފޮޓޯ. ދެން އިމޭޖްސް
އެންމެފަހުން ހަދާ އައިޑީ ކާޑުގެ ކޮޕީއެއް ޑީއެންއާރަކު ނޯވޭ
ޑީއެންއާރުގައި ކޮންމެ މީހެއްގެ ވެސް މައުލޫމާތު ރައްކާކުރެވިފައި ހުރެ އެވެ. އުފަންދުވަހުގެ ސެޓްފިކެޓުން ފެށިގެން އައިޑީކާޑު އާކުރާ ކޮންމެ ފަހަރަކު، ކުރީގެ ކާޑާ އަދި ކަމާ ގުޅުންހުރި ފޯމު ތަނުގައި ރައްކާކުރެ އެވެ. އެހެންނަމަވެސް ކަމުގެ ހާއްސަ ކަމަކީ އެންމެފަހުން ހައްދާ އައިޑީކާޑު ރައްކާނުކުރާ ކަމެވެ.
ވުމާ އެކު ޑީއެންއާރުން މީހާގެ އަަތަށް ކާޑު ދޫކުރުމަށްފަހު، އޭގައިވާ ހުރިހާ މައުލޫމާތަކަށް ބާރުފޯރުވޭނެ ގޮތެއް ނޯވެ އެވެ. އެނގުމަކައި ނުމެލައި، އެކަން ކުރެވޭނެ އެއްވެސް އިހުތިޔާރެއް ލިބިދީފައެއް ނުވެ އެވެ. އެއީ އިނގިލީގެ ނިޝާން ތަފާތުވާ ފަދައިން ކޮންމެ އައިޑީކާޑެއްގެ ނުފުށުގައިވާ ސީރިއަލް ނަމްބަރު ތަފާތުވާތީ އެވެ. ދެ ކާޑެއްގައި އެއް ނަމްބަރެއް ތަކުރާރު ނުވާތީ އެވެ.
ތަނުގައި އެ މައުލޫމާތު ރައްކާކުރެވިފައި ނުހުންނަ ފަދައިން މަސައްކަތްކުރާ މުވައްޒަފުންނަށް ތަނުން ކާޑާ ބެހޭ މައުލޫމާތުގެ ކޮޕީ ނެގޭކަށް ނުހުރެ އެވެ.
ޑީއެންއާރުގައި ވަޒީފާ އަދާކުރަމުން އައި ނަމަވެސް، އައިޑީ ކާޑު ޕްރިންޓްކުރަން ހާއްސަކޮށްފައިވާ ތަނުގެ "އެކްސެސް" ކޮންމެ އޮންނަނީ ކަމާ ގުޅުންހުރި ދެތިން މުވައްޒިފެއްގެ އަތުގަ އެވެ. ތަނުގައި މަސައްކަތް ކުރަން ހާއްސަ މުވައްޒަފުން ތިބޭއިރު، މަސައްކަތް ކުރުމުގައި އަމަލުކުރާ ވަކި ހާއްސަ އިންތިޒާމެއް ރޭވިފައި އޮވެ އެވެ.
ޑީއެންއާރު އައިޑީ ކާޑު ޕްރިންޓިން ރޫމްގައި ‘ދެން’ގެ ނޫސްވެރިން، އެތަނުން އައިޑީ ކާޑުގެ ފޮޓޯ ކޮޕީ ނެގޭކަށް ނުހުރޭ. ދެން އިމޭޖްސް.
ޕްރިންޓްކުރާ ކާޑުތައް ދުވަހުގެ ތަރުތީބުން އަތުރާފައިވާއިރު، ޕްރިންޓްކުރާއިރު އޭގެން ކޮޕީ ނެގޭނެ ގޮތެއް ނޯވެ އެވެ. ޕްރިންޓިން ރޫމުގައި އަހަރެމެންނަށް ސިސްޓަމް މަސައްކަތް ކުރާ ގޮތް މުވައްޒިފުން ވަނީ ދައްކާލާފަ އެވެ.
އޮޅުވާލައިގެން ކުރިނަމަ މެމްބަރުޝިޕް އިތުރުވާނެ
ޕާޓީ މެމްބަރުޝިޕް ޑްރައިވްގައި ހޯމް މިނިސްޓްރީން ޖުމްލަ ފުރާފައިވަނީ 1،736 ފޯމެވެ. ފޮޓޯ ނަގައި އެކަން އެ މީހުން ސެލެބްރޭޓް ކުރި އެވެ. ޓްވީޓްކޮށް، ހަބަރުތަކަށް ވެސް އެރި އެވެ. މިހާރު ވާހަކަ ދެކެވޭ ގޮތަށް ޑީއެންއާރުގެ ޑޭޓާ ބޭސް ވަގަށް ނަގައިގެން އެ ތަނުގައި އެކަންކުރި ނަމަ، ހޯމް މިނިސްޓްރީން ހުށަހަޅާނީ 1،730 ފޯމެއް ނޫނެވެ.
ވަގަށް އޮޅުވާލައިގެން ފޯމު ފުރުވާ ނަމަ އެ ނަމްބަރު އޮންނަނީ މާ މަތީގަ އެވެ. ހޯމް މިނިސްޓްރީން ފުރި ފޯމުތަކަކީ ވަކިވަކި ސިޔާސީ މުވައްޒިފުން ފުރައިގެން ގެނައި ފޯމުތަކެވެ. އެ ފޯމު ސެޓުތައް ގެނެސް، ވިހި ފޯމުން، ދިހަ ފޯމުން ފުރި ވާހަކަތައް ހިމެނޭ ވަޓްއަޕް ޗެޓެއް އަހަރެމެންގެ ޓީމާ، ހޯމް މިނިސްޓްރީގެ ސިޔާސީ މުވައްޒިފަކު ވަނީ ހިއްސާކޮށްފަ އެވެ.
ޑީއެންއާރުގެ މުވައްޒަފުން ހަރަކާތްތެރި ވަނީ ވަޒީފާގެ މަސްއޫލިއްޔަތާއި ޒިންމާތައް ފުރިހަމަ ކުރުމުގަ އެވެ. އަހަރެމެން އެންމެންގެ މައުލޫމާތު ރައްކާކޮށް، ބަލަހައްޓައި އަދި ގުޅިފައިވާ 174 ކަލެކްޓިން ސެންޓަރު މެދުވެރިކޮށް ހިދުމަތް ފޯރުކޮށްދިނުމުގަ އެވެ. އާދެ! މަތިކުރެވިފައިވާ ގައުމީ ވާޖިބު އަދާކުރުމުގަ އެވެ. އެކަމުގައި ފަސްޖެހުމެއް ނެތެވެ.
