ސްޓިކާ ޖެހީ މަނާ ތަނެއްގައި ސައިކަލު ޕާކު ކޮށްފައި ހުރީމަ: ފުލުހުން
ހުޅުމާލޭ ފްލެޓެއްގެ އެތެރޭގައި ޕާކު ކޮށްފައި ހުރި ސައިކަލެއްގައި ސްޓިކާ ޖެހި މައްސަލައިގައި، ފުލުހުން ޖަވާބު ދެއްވައިފިއެވެ.
ފްލެޓު އެތެރޭގައި ބަހައްޓާފައި ހުރި ސައިކަލެއްގައި ސްޓިކާ ޖެހި ވީޑިއޯއަކާއި، އެކަމާއި ގުޅުން ހުރި ފޮޓޯތަކެއް މީސްމީޑިއާ ގައިވެސް އާއްމުވެ ގިނަ ބަޔަކު ވަނީ އެކަމަށް ފާޑު ކިޔާފައެވެ.
މިކަމާއި ގުޅޭގޮތުން ފުލުހުންގެ މީޑިއާ އޮފިޝަލަކު މިއަދު ވިދާޅުވީ، އެއީ ހުޅުމާލޭ ސޯޝަލް ހައުސިންގ ފްލެޓެއްގެ ސިޑި ކައިރީގައި، ސިޑިން އަރާފައިބާ މީހުންނަށް ދަތިވާނޭހެން ބަހައްޓާފައިހުރި ސައިކަލެއް ކަމަށެވެ.
ފުލުހުން އިތުރަށް ވިދާޅުވީ އެއީ ވަކި އެޕާޓްމަންޓަކަށް ނިސްބަތް ނުވާގޮތަށް އެބިލްޑިންގައި އުޅޭ އެންމެން ބޭނުން ކުރުމަށް އޮންނަ ތަނެއް ކަމަށާއި އެޗްޑީސީން ވެސް އޮންނާނީ އެތަނުގައި ޕާކު ކުރުން މަނާކަމަށް ބުނެފައި ކަމަށެވެ.
"ފިޔަވަޅު އަޅަމުން އެދަނީ ހުރިހާ ފްލެޓެއްގަައި އުޅޭ މީހުންނަށް ވެސް އެތަނުގައި ޕާކު ނުކުރުމަށް އަންގާފައި، އެއީ ފްލެޓަށް ވަންނަން އޮންނަ ވޯކްވޭ ވީމަ އެތަނުގައި ތިރީ ފްލެޓު ބޭނުން ކުރާ މީހުން ޕާކުކޮށް އެއްޗެހި ބެހެއްޓީމަ މަތީ ފްލެޓުތަކަށް އަރާފޭބުމަށް ދަތިވާތީ" ފުލުހުން ވިދާޅުވިއެވެ.
ފުލުހުންގެ މިކޮމެންޓާއި ގުޅިގެން އެހެން މީޑިއާއަކުން ވަނީ، ސިޑި ހުރީ ސައިކަލު ޕާކު ކޮށްފައިހުރި ތަނާއި މާދުރުގައިކަން ފާހަގަ ކުރައްވާ ސުވާލު ކޮށްފައެވެ. އެކަމަށް ޖަވާބު ދެއްވަމުން ފުލުހުން ވިދާޅުވީ އެސަރަޙައްދުތަކަކީ އެއްގަމު އުޅަނދު ވަނުން މަނާ ސަރަޙަައްދުތަކެއްކަން އެނގޭ ގޮތަށް މީގެ ތިންމަސް ކުރިން ބޯޑު ޖަހާފައިވާ ސަރަޙައްދުތަކެއް ކަމަށެވެ.
"އޭގެ އިތުރުން އެތަންތަނުގައި ޕާކު ކުރުން މަނާކަން އެސަރަޙައްދުގައި ދިރިއުޅޭ މީހުންނަށް އަންގާފައި ވެސް ވާނެ" ކަމަށް ފުލުހުން ވިދާޅުވިއެވެ.
Ads by STO
