ރާއްޖެ ޑިޖިޓަލް ކުރަނީ ކޮރަޕްޝަނަށް ފުރުސަތު ނުދެވޭނެ ގޮތަކަށް: ރައީސް
މި ފަހުން އެސްޓޯނިއާއަށް ކުރެއްވި ދަތުރުފުޅުގެ ތެރެއިން ރާއްޖެ ޑިޖިޓަލައިޒް ކުރުމުގެ މަޝްރޫއުތައް ހަމަޖެހިފައިވާ ކަމަށާއި ރާއްޖެ ޑިޖިޓަލައިޒް ކުރާނީ ކޮރަޕްޝަނަށް ފުރުސަތު ދެވޭ ވަރު ނައްތައިލެވޭނެ ގޮތަކަށް ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ރ. އަތޮޅުގެ ރަށްރަށަށް ކުރައްވާ ދަތުރުފުޅުގެ ތެރެއިން މިރޭ އުނގޫފާރުގައި ވާހަކަ ދައްކަވަމުން ރައީސް މުއިއްޒު ވިދާޅުވީ އެސްޓޯނިއާއަކީ މިހާރު ކޮރަޕްޝަން އެންމެ ދަށް އެއް ގައުމު ކަމަށެވެ. ދަތުރުގެ ބޭނުމަކީ، އެމަނިކުފާނު ވިދާޅުވި ގޮތުގައި ހިދުމަތްތައް ޑިޖިޓަލް ކޮށްގެން ކޮރަޕްޝަން ނައްތައިލެވިފައިވާ ގޮތް ރާއްޖެއަށް ވެސް ގެނައުން ކަމަށެވެ.
"މުޅި ދައުލަތުގެ ހުރިހާ ހިދުމަތެއް ޑިޖިޓަލައިޒް ކުރުމުން ކޮންމެ ކަމެއް ރެކޯޑު ކުރެވޭނެ ނިޒާމެއް ގާއިމު ކުރުމުން ވަރަށް ބޮޑަށް އެ ކަން ހުއްޓުވޭނެ. އެސްޓޯނިއާއަކީ މި ވަގުތު ދުނިޔޭގައި ޕަބްލިކް ސާވިސް 100 ޕަސެންޓް ޑިޖިޓަލައިޒުކޮށް އެ ކަން ކުރި ގައުމަށް ވާތީ އަޅުގަނޑު އެ ދަތުރުކުރީ،" ރައީސް ވިދާޅުވި އެވެ.
"ހިދުމަތް ދޭ އިރު އެ މީހަކު ބޭނުންވާ ގޮތަކަށް މީހުން އަތުން ރިޝްވަތު ނަގައިގެން. ކަންކަން އަވަސް ކޮށްދިނުމާއި، ކަންކަމުގައި ވަކި އިސް ކަމެއް ދިނުމާއި މި ކަންކަން އެބަ ނައްތައިލެވޭ،"
އެމަނިކުފާނު ވިދާޅުވީ އެސްޓޯނިއާއާ އެކީ މެމަރަންޑަމް އޮފް އަންޑަސްޓޭންޑިން (އެމްއޯޔޫ)ތަކެއްގައި ވެސް މިހާރު ސޮއިކުރެވިފައިވާ ކަމަށެވެ. ރައީސްގެ އަމާޒަކީ އެސްޓޯނިއާއިން ފޯރުކޮށްދޭ އެހީގެ ތެރެއިން ރާއްޖެ ވެސް ހުރިހާ ހިދުމަތެއް ޑިޖިޓަލައިޒުކޮށް ކޮރަޕްޝަނަށް އޮންނަ ފުރުސަތުތައް ކުޑަކުރުމެވެ.
"..އެހެންވީމާ ކުރިއަށް އޮތް ދުވަސްތަކުގައި، ކައުންސިލްތަކުގައި ވެސް، އަދި މިނިސްޓްރީތަކުގައި ވެސް، ކުންފުނިތަކުގައި ވެސް، އަދި އެކި ކަހަލަ ސާވިސް ޕްރޮވައިޑަރުން ވެސް ހިދުމަތް ދޭނެ އަދި މި ކަމަށް ހާއްސަ ގާނޫނެއް ވެސް ހަދައި، ރާއްޖޭގެ ނިޒާމު ބަދަލު ކުރާނީ،" ރައީސް ވިދާޅުވި އެވެ.
