އަންދާޒާކުރި ވަރަށް ރިސޯޓުތަކުން ކުއްޔެއް ނުލިބުނު
ރިސޯޓުތަކުން ކުލީގެ ގޮތުގައި 2 ބިލިއަން ރުފިޔާގެ އާމްދަނީއެއް ދައުލަތަށް ލިބޭނެ ކަމަށް އަންދާޒާކުރި ނަމަވެސް، ހުސްވި އަހަރު އެ އަދަދަށް އާމްދަނީ ލިބިފައިނުވާކަން ތަފާސް ހިސާބުތަކުން ދައްކައިފި އެވެ.
ފިނޭންސް މިނިސްޓްރީން އާންމުކުރި ވީކްލީ ފިސްކަލް ރިޕޯޓުގައިވާ ގޮތުން ނިމުނު ޑިސެމްބަރު މަހުގެ 31 ވަނަ ދުވަހުގެ ނިޔަލަށް ރިސޯޓުތަކުން ކުލީގެ ގޮތުގައި ލިބިފައި ވަނީ 1.8 ބިލިއަން ރުފިޔާ އެވެ. މި އަހަރަށް ކަނޑައެޅި ބަޖެޓުގައި 2 ބިލިއަން ރުފިޔާ ލިބޭނެ ކަމަށް އަންދާޒާކޮށްފައިވެ އެވެ.
ބަޖެޓުގައި ލަފާކުރި އަދަދަށް ނުލިބުނު ނަމަވެސް ނިމިދިޔަ އަހަރު ރިސޯޓު ކުލިން ލިބުނު އަދަދަކީ 2023 ވަނަ އަހަރާ އަޅާބަލާއިރު އިތުރުވުމެކެވެ. އެ އަހަރު ކުލީގެ ގޮތުގައި ލިބިފައި ވަނީ 1.7 ބިލިއަން ރުފިޔާ އެވެ.
ކުލިން ލިބުނު އާމްދަނީ ދަށަށް ދިޔަ ނަމަވެސް ލޭންޑް އިކުއިޒިޝަން އެންޑް ކޮންވާޝަން ފީގެ ގޮތުގައި ބަޖެޓުކޮށްފައިވާ އަދަދަށް ވުރެ އިތުރަށް ވަނީ ލިބިފަ އެވެ. ބަޖެޓުގައި 335.3 މިލިއަން ރުފިޔާ ލިބޭނެ ކަމަށް އަންދާޒާކުރި ނަމަވެސް 448.6 މިލިއަން ރުފިޔާ ލިބިފައިވެ އެވެ.
ރައްޔިތުންގެ މަޖިލިހުގެ މާލިއްޔަތު ކޮމިޓީން މީރާގެ 2022 އަދި 2023 ވަނަ އަހަރުގެ އަހަރީ ރިޕޯޓު ދިރާސާކުރަން މިދިޔަ އަހަރުގެ އޮގަސްޓް މަހު ބޭއްވި ބައްދަލުވުމެއްގައި ކޮމިޓީގެ މެމްބަރުން ވަނީ ބިމު ކުލީގެ ގޮތުގައި ލިބެމުން އަންނަ އާމްދަނީ ދަށްވަމުން ދިއުމާ ގުޅިގެން އެކަމުގެ ކަންބޮޑުވުން ފާޅުކޮށްފަ އެވެ.
އެ ރިޕޯޓުތަކުގައިވާ ގޮތުން 2023 ވަނަ އަހަރު 3 ބިލިއަން ރުފިޔާ، 2022 ވަނަ އަހަރު 5 ބިލިއަން ރުފިޔާ އަދި 2021 ވަނަ އަހަރު 5.5 ބިލިއަން ރުފިޔާ ނުލިބިވާކަން ފާހަގަކޮށްފައިވެ އެވެ.
ދައުލަތަށް ނުލިބި ހުރި އާމްދަނީގެ ބޮޑު ބައެއް ހިއްސާކުރަނީ ރިސޯޓުތަކުގެ ކުއްޔާއި ކުލި ނުލިބުމުން އަރާފައިވާ ޖޫރިމަނާ އެވެ.
ބައެއް ރިސޯޓުތަކުން ކުލި ނުދައްކާ މައްސަލައަކީ އަހަރުތަކެއް އެކަމަށް ހޭދަވެފައިވާ ބޮޑު މައްސަލައެކެވެ. މައްސަލަ ހައްލު ކުރުމަށް ސަރުކާރުތަކުން އެކި މަސައްކަތްތައް ކުރަމުން އައި ނަމަވެސް އެ މައްސަލައަށް ހައްލެއް ހޯދިފައެއް ނުވެ އެވެ.
