އީސީގެ އިދާރާ ހުސްކުރަން އަންގައިފި
ޕޯޓް ކޮމްޕޮލެކްސް ގައި ހިންގާ އިލެކްޝަން ކޮމިޝަން (އީސީ) ގެ އިދާރާ ހުސްކުރަން އެމްޕީއެލުން އަންގައިފި އެވެ.
ޕޯޓް ކޮމްޕްލެކްސްގެ 4 ފްލޯއެއްގައި އީސީގެ އޮފީސް ހިންގަތާ 21 ވަރަކަށް އަހަރުވެއްޖެ އެވެ. އެއީ ކޮންމެ 5 އަހަރަކުން އެއްބަސްވުން އާކުރާ ގޮތަށެވެ. މަސައްކަތްކުރެވޭ ވަރަށްވުރެ ބޮޑަށް ބާވެފައިވާތީ އީސީން ހިންގާ ފްލޯތައް ހުސްކުރަން އެމްޕީއެލުން އެންގި ހުސްވި އަހަރުގެ އޮކްޓޫބަރު މަހު އެވެ.
އެހެންވެ އިމާރާތެއް ހޯދަން ފިނޭންސް މިނިސްޓްރީގެ ލަފާއަކަށް އެދުމުން ވަކި ގޮތެއް ހަމަނުޖެހުނު ކަމަށް އީސީގެ މެންބަރު ހަސަން ޒަކަރިއްޔާ "ދެން" އަށް މިއަދު ވިދާޅުވި އެވެ.
ތަނެއް ހަމަނުޖެހުމުން 10 އަހަރުގެ މުއްދަތަށް ކުއްޔަށް ދޭނެ އިމާރާތެއް ހޯދަން އޮކްޓޫބަރު 16 ގައި އީސީން އިއުލާން ކުރި އެވެ.
އެކަމަކު ބިޑަށް ކުރިމަތި ފަރާތްތަކުން ކޮންޓްރެކްޓުގެ ގޮތުގައި ހުށަހެޅި އަގު 5 މިލިއަން ރުފިޔާއަށްވުރެ ބޮޑުވުމުން އަލުން ތަނެއް ހޯދުމަށް އިއުލާންކުރަން ޓެންޑަ ބޯޑުގައި އީސީން އެދުނުވެ.
އޭގެ ޖަވާބުގައި ފިނޭންސުން އީސީގައި ބުނީ ސަރުކާރުގެ އޮފީސްތައް ހިންގުމުގެ ޖާގައިގެ ދަތިކަން ހައްލުކުރުމަށްޓަކައި ކުރިއަށް 2 އަހަރު ދުވަހުގެ ތެރޭގައި ހައްލެއް ހޯދާތީވެ އެ އިމާރާތުގައި އީސީއަށް ތިބެވޭނެ ގޮތް ހަމަޖައްސައިދޭން ކަމަށެވެ. އެކަމަކު އިތުރު 2 އަހަރު ދުވަހަށް އެތަން ދޫނުކުރެވޭނެ ކަމަށް އެމްޕީއެލުން އީސީއަށް އެންގި އެވެ.
"އެގޮތަށް އެކަން ހަމަޖައްސައިދެވެން ނެތް ވާހަކައާ އިމާރާތް މަރާމާތްކުރުމާ މިކަންކަމަށް ކޮންޓްރެކްޓަރެއް ހަމަޖެހުނުހާ އަވަހަކަށް ތަން ހުސްކުރަން ޖެހޭނެ ކަމަށް" އެމްޕީއެލުން އީސީއަށް ދިން ޖަވާބުގައި ބުންޏެވެ.
ޒަކަރިއްޔާ ވިދާޅުވީ އެމްޕީއެލުން އެހެން އަންގާފައިވާތީ މިހާރު ކުރިއަށްދަނީ އެކަމުގައި ފިނޭންސުގެ ބަހެއް ހޯދުމުގެ މަސައްކަތް ކަމަށެވެ.
އީސީގެ އޮފީހުގައި ދާއިމީ ގޮތެއްގައި 60 ވަރަކަށް މުވައްޒަފުން މަސައްކަތް ކުރެ އެވެ.
