ގާޒާގެ ރައްޔިތުންނަށް ކާމިޔާބު ލިބުނީ ހިތްވަރާއި އީމާންތެރިކަމުގެ ވަރުގަދަކަމުން: ހުތުބާ
ގާޒާގެ ރައްޔިތުންނަށް ނަސްރު ލިބުމުގެ ފަހަތުގައި ވަނީ އީމާންކަމާއި ހިތްވަރާއި ކެތްތެރިކަމާއި އުހުއްވަތްތެރިކަމާއި ނުގުޑާ ފަދަ އަޒުމެއްގައި ބަދަހިކަމާ އެކު ތިބެ، މާތް ﷲ އަށް ވަކީލުކޮށްގެން ކުރި ވަރުގަދަ ހަނގުރާމަ ކަމުގައި މިއަދުގެ ހުކުރު ހުތުބާގައި ބުނެފި އެވެ.
ގާޒާގެ ރައްޔިތުންގެ ކާމިޔާބީގެ މައްޗަށް އަލިއަޅުވާލައި ހުތުބާގައި ބުނީ މިއަދު އިވެމުންދަނީ އެތައް ދުވަހެއް ވަންދެން ފަލަސްތީނުގައި ހިންގަމުން ދިޔަ ނަސްލު ނައްތައިލުމުގެ އަނިޔާވެރި ހަނގުރާމަ މެދުކަނޑައިލި ވާހަކަ ކަމަށެވެ. އެ ގައުމުގެ ރައްޔިތުންނާ ދެކޮޅަށް ހިންގަމުން ދިޔަ އަނިޔާވެރި ހަނގުރާމައަކީ އިންސާނީ ތާރީހު ދެކެފައިނުވާ ފަދަ އަނިޔާވެރިކަން ބޮޑު ހަނގުރާމައެއް ކަމަށެވެ. މި ހަނގުރާމަ ހުއްޓައިލުމަށް ސަހްޔޫނީ ނިޒާމަށް މަޖުބޫރުވީ އެހެން އެއްވެސް ގޮތެއް ނެތިގެން ކަމަށެވެ.
ހަނގުރާމަ ހުއްޓާލުމަކީ ގާޒާގެ ރައްޔިތުންނަށް ލިބުނު މަތިވެރި ނަސްރެއް ކަމަށެވެ. އެ ނަސްރުގެ ފަހަތުގައި ވަނީ އީމާންކަމާއި ހިތްވަރާއި ކެތްތެރިކަމާއި އުހުއްވަތްތެރިކަމާއި ނުގުޑާ ފަދަ އަޒުމެއްގައި ބަދަހިކަމާ އެކު ތިބެ، ﷲ އަށް ވަކީލުކޮށްގެން ކުރި ވަރުގަދަ ހަނގުރާމަ ކަމަށެވެ.
ހުކުރު ހުތުބާގައި ބުނި ގޮތުގައި ހަނގުރާމަތަކުގައި ނަސްރު ލިބެނީ ލަޝްކަރުގެ އަދަދު ގިނަކަމާއި ހަތިޔާރުގެ މޮޅުކަމުގެ މައްޗަކަށް ނޫން ކަމުގަ އެވެ. ނަމަވެސް އީމާންކަމާއި ކެތްތެރިކަމުގެ މައްޗަށް ކަމުގަ އެވެ.
އެތައް ދުވަހެއް ވަންދެން ދެމިގެން ދިޔަ މި ހަނގުރާމައިގައި މުޅި ގާޒާ ފަނާވެގެން ދިޔަ ނަމަވެސް، މި ހަނގުރާމައިން އެތައް އިބުރަތެއް ލިބިދޭ ކަމުގަ އެވެ. ފުރަތަމަ އިބުރަތަކީ ﷲ އަށް ނަސްރުދޭ ބަޔަކަށް، ﷲ ނަސްރު ދެއްވާނެކަން ކަމުގަ އެވެ. ހަނގުރާމައިގެ ހާލަތުގައި ގާޒާގެ ރައްޔިތުން އަމަލުކުރީ ރިވެތި އަހުލާގުން ކަމަށާއި އަނިޔާވެރިވުމެއް ނެތި ކަމުގަ އެވެ. އެ ރައްޔިތުން ވަނީ މި ހަނގުރާމައިގައި އިސްލާމީ އަހުލާގުން ނަމޫނާ ދައްކައިފައި ކަމުގަ އެވެ.
ހުތުބާގައި ބުނީ ފަލަސްތީނާއި ބައިތުލްމަގްދިސާއި އަލްމަސްޖިދުލްއަގްސާގެ ވާހަކަ ދެކެވޭއިރު، އިސްރާ އާއި މިއުރާޖުގެ މަތިވެރި މުއުޖިޒާތުގެ ވާހަކަ ހަނދާނަށް އަންނަ ކަމަށެވެ. އެ ދަތުރުފުޅުން ބުނެދެނީ ދުވަހަކު ވެސް އިސްލާމީ އުންމަތާއި ފަލަސްތީނު ވަކިވެގެން ނުދާނެކަން ކަމަށެވެ. މައްކާ އާއި ބައިތުލްމަސްދިސަކީ ގުޅި ލާމެހިފައިވާ، ތައުހީދުގެ ރިސާލަތުގެ ދެ ދަންމަރު ކަމަށެވެ. އަލްމަސްޖިދުލްހަރާމާއި އަލްމަސްޖިދުލްއަގްސާ އާ ދެމެދުގައި އޮތީ، ދުނިޔެ ދެމިއޮތްހައި ހިނދަކު ނިމުމެއް ނުވާ ވަރުގަދަ ގުޅުމެއް ކަމަށެވެ.
އަލްއަގްސާގެ ވަށައިގެން ވަނީ ބަރަކާތްލެއްވިގެންވާ ތަންތަން ކަމަށެވެ. އަގްސާ މިސްކިތަކީ ބިންމަތީގައި މާތް ﷲ އަށް އަޅުކަންކުރުމަށް ބިނާކުރެވުނު ދެވަނަ ގެކޮޅު ކަމަށާއި މުސްލިމުންގެ ފުރަތަމަ ގިބްލަ ކަމަށެވެ. އެ މިސްކިތް، ސަހްޔޫނީ އިސްތިއުމާރުގެ ދަށަށް ދިޔަކަމީ މި އުންމަތަށް ކުރިމަތިވެފައިވާ އެންމެ ބޮޑު ހިތާމަ ކަމަށެވެ. އަގްސާ މިސްކިތް، މިނިވަންކުރުމަށް މަސައްކަތްކުރުމަކީ މުޅި އިސްލާމީ އުންމަތުގެ މައްޗަށް އޮތް ދީނީ ވާޖިބެއް ކަމަށެވެ.
އިސްލާމީ އުންމަތުގެ ކަންކޮޅުތަކުގައި ހިންގަމުންދާ ހަމަނުޖެހުންތަކާއި މުސްލިމުންނާ ދެކޮޅަށް ކުރެވެމުންދާ ހަނގުރާމަތަކާއި އިސްލާމީ ސަގާފަތާއި އުންމަތުގެ ހަޟާރަތު ފުނޑުފުނޑުކޮށްލަން ހިންގަމުންދާ ފިކުރީ ހަނގުރާމަތަކަކީ، އިސްލާމީ އުންމަތް ނިކަމެތިވެގެން ދިއުމުގެ ނަތީޖާއެއްގެ ގޮތުން ކުރިމަތިވެފައިވާ ކަންކަމުގައި ހުތުބާގައި ބުންޏެވެ. އެކަން އެގޮތަށް މެދުވެރިވީ އިސްލާމްދީނުގެ އުސޫލުތަކުގައި ސާބިތުވާން ޖެހޭ މިންވަރަށް ސާބިތުނުވުމުންނާއި ދީނުގެ ކަންކަމުގެ މައްޗަށް ދުނިޔޭގެ އެދުންތަކާއި މާއްދިއްޔަތު އިސްކުރުމުންކަން ފާހަގަކުރި އެވެ.
މުސްލިމުންގެ އަދަދު ގިނަވެފައި ތަނަވަސްކަން ކިތަންމެ ބޮޑު ނަމަވެސް، އުހްރަވީ ހަޔާތުގެ މައްޗަށް ދުންޔަވީ ހަޔާތުގެ އެދުން އިސްކޮށްފި ނަމަ، މުސްލިމުން ބަލިކަށިވާނެ ކަމަށެވެ. ނަސްރު ލިބުން އޮތީ އަގީދާ ވަރުގަދަކޮށް، ހައްގު ގޮތުގައި ﷲ އަށް އީމާންވެ، ގުރްއާނާއި ސުންނަތުގައި ހިފައިގެން ކަމަށެވެ. އެކުވެރިވެ، އެއްބައިވަންތަވެ، ހަސަދަވެރިކަމާއި ރުޅިވެރިކަމުން އެއްކިބާވެގެން ކަމަށެވެ.
މިއަދުގެ ހުތުބާގައި ބުނި ގޮތުގައި މުސްލިމުންގެ ހައިސިއްޔަތުން ފަލަސްތީނުގެ ރައްޔިތުންނާ މެދު އަދާކުރަން ޖެހޭ އަހުލާގީ ވާޖިބުތަކެއްވާ ކަމުގަ އެވެ. އެގޮތުން ފަލަސްތީނުގެ ދިފާއުގައި އަޑުއުފުލުމާއި އެ ގައުމުގެ ރައްޔިތުންނަށް ހެޔޮ ދުއާ ކުރުމާ އަދި އިންސާނީ ގޮތުން އެހީތެރިވުމަށް އެންމެން އަތުގުޅާލާން ޖެހޭ ކަމުގަ އެވެ. މާތް ﷲ އަށް ޓަކައި ހޭދަކުރެވޭ އެއްޗަކީ ގެއްލިގެންދާނެ އެއްޗެއް ނޫން ކަމުގަ އެވެ.
އިތުރަށް ބުނީ ފަލަސްތީނާއި އެ ގައުމުގެ ރައްޔިތުންނަށް އެހީތެރިވުމުގައި ރާއްޖެއިން އަދާކުރަމުންދަނީ ނަމޫނާ ދައުރެެއް ކަމަށެވެ. ފަލަސްތީނުގެ ރައްޔިތުންނާ ދެކޮޅަށް ސަހްޔޫނީ ނިޒާމުން ހިންގި އުދުވާނާ ގުޅިގެން ރާއްޖެއިން ވަނީ އިސްލާމީ އުހުއްވަތްތެރިކަން ދައްކައި ގިނަގުނަ މަސައްކަތްތަކެއް ކޮށްފައި ކަމަށެވެ.
ރާއްޖޭގެ ރައްޔިތުން ވަނީ ގާޒާގެ ރައްޔިތުންނާ ބައިވެރިވުމުގެ ގޮތުން، މުދަލުން ހޭދަކޮށްފައި ކަމަށެވެ. އަދި ބައިނަލްއަގުވާމީ މުޖުތަމައުގައި ގާޒާގެ ރައްޔިތުންގެ ދިފާއުގައި އަޑުއުފުލާފައި ކަމަށެވެ. ގާޒާގެ ރައްޔިތުންނަށް ލިބުނު ނަސްރަކީ އެ ނަސްރުގައި ރާއްޖޭގެ ރައްޔިތުން ބައިވެރިވާ ނަސްރެއް ކަމުގައި ވެސް ހުކުރު ހުތުބާގައި ފާހަގަކުރި އެވެ.
