ބިދޭސީން އާންމުކޮށް ހަމަނުޖެހުން ހިންހާ ތަންތަން އިމިގްރޭޝަނުން ބަލަހައްޓަން ފަށައިފި
ބިދޭސީން މަސްލަހަތު ގެއްލޭ ކަންކަން ކުރާ ކަމަށް ފާާހަގަކުރެވޭ ސަރަހައްދުތައް އިމިގްރޭޝަންއިން މޮނީޓާކުރަން ފަށައިފި އެވެ.
އިމިގްރޭޝަންއިން މިރޭ އެކްސްގައި ބުނީ އެ ސަރަހައްދުތައް މޮނީޓާކުރަމުން ދަނީ އިމިގްރޭޝަންގެ އެންފޯސްމަންޓް އެންޑް ކޮމްޕްލަޔަންސް ޑިވިޝަންގެ އޮފިސަރުން ކަމަށެވެ.
އަދި އާއްމު މަސްލަހަތައް ނުރައްކާވާފަދަ މިފަދަ އަމަލުތައް ތަކުރާރުވިޔަ ނުދިނުމަށްޓަކައި އެ ހަރަކާތް ސިލްސިލާކޮށް ކުރިއަށް ގެންދިއުމަށް ނިންމާގައިވާ ކަމަށް ވެސް އިމިގްޜޭޝަންއިން ބުނެފައި ވެއެވެ.
"އަދި މި ހަރަކާތްތައް ކުރިއަށްދާއިރު ގަވާއިދާ ހިލާފަށް އުޅޭ ބިދޭސީންގެ މައްސަލައެއް ފާހަގަވެއްޖެނަމަ ޓާސްކުފޯހުން އެފަދަ ބިދޭސީންނާ މެދު ފިޔަވަޅު އަޅާނެ." އިމިގްރޭޝަންއިން އެކްސްގައި ބުނެފައި ވެއެވެ.
ފަހަކަށް އައިސް ބިދޭސީން ހަމަނުޖެހުން ހިންގަމުންދާ އެއް ސަަރަހައްދަކީ އާޓިފިޝަލް ބީޗު ސަރަހައްދެވެ
އެގޮތުން ދެ ރެއެއްގެ މަތިން އެ ސަރަހައްދުގައި ވަނީ މާރާމާރީ ހިންގައިފަ އެވެ. އަދި މި މަހު ބިދޭސީ ތިން މީހުންގެ މެދުގައި މާރާމާރީ ހިނގަމުން ދަނިކޮށް އެ މާރާމާރީގެ މަންޒަރު ރެކޯޑު ކުރި ދިވެއްސަކަށް ވެސް ހަމަލާ ދިނެވެ
މި މަހު ހިންގި މާރާމާރީއާ ގުޅިގެން ތިން މީހަކު ޑީޕޯޓްކުރަން ނިންމާފައިވާ ކަމަށް ވެސް އިމިގްރޭޝަންއިން ބުނެފައި ވެއެވެ.
އިމިގްރޭޝަންއިން ބުނެފައިވާ ގޮތުން އެފަދަ އަމަލުތައް ހިންގާ ބިދޭސީންނަށް އިތުރު ފުރުސަތެއް ނުދޭނެ އެވެ،
Ads by STO
