57 ރަށުގައި 12،000 އަށް ވުރެ ގިނަ ހައުސިން ޔުނިޓު އަޅައިދޭނެ ކޮންޓްރެކްޓަރުން ހޯދަނީ
ރާއްޖޭގެ 57 ރަށެއްގައި ޕަބްލިކް ހައުސިން ޕްރޮޖެކްޓުގެ ދަށުން ބޯހިޔާވަހިކަމުގެ މަޝްރޫއުގެ ދަށުން 12،000 އަށް ވުރެ ގިނަ ހައުސިން ޔުނިޓު އަޅައިދޭނެ ބަޔަކު ހޯދަން އިއުލާނުކޮށްފި އެވެ.
ފިނޭންސް އެންޑް ޕްލޭނިން މިނިސްޓްރީން މިއަދު އާންމުކުރި އެންގުމެއްގައި ބުނީ އެ މަޝްރޫއު ހިންގުމަށް ހަމަޖެހިފައި ވަނީ ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓްރީގެ އެދުމުގެ މަތިން ކަމަށެވެ. ރަށްތަކުގައި ހައުސިން ޔުނިޓު އިމާރާތް ކުރުމުގެ މަޝްރޫއު ކުރިއަށް ގެންދާނީ ޑިޒައިން އެންޑް ބިލްޑް އުސޫލުން ކަމަށެވެ.
މި މަޝްރޫއުގެ ދަށުން އިއުލާނު ކުރުމަށް ހަމަޖެހިފައިވާ ކޮންޓްރެކްޓްތަކުގެ މަސައްކަތްތައް ކުރިއަށް ގެންދިއުމަށް ހަމަޖެހިފައި ވަނީ އިންޓަނޭޝަނަލް ކޮމްޕެޓިޓިވް ބިޑިން (އައިސީބީ) އާއި ނޭޝަނަލް ކޮމްޕެޓިޓިވް ބިޑިން (އެންސީބީ) އުސޫލުތަކާއި ދައުލަތުގެ މާލިއްޔަތުގެ ގަވާއިދުގައި ބަޔާންކުރާ ހަމަތަކުގެ މަތިން ކަމަށް ޕްލޭނިން މިނިސްޓްރީން ބުންޏެވެ.
މިނިސްޓްރީން ބުނި ގޮތުގައި ޝައުގުވެރިވާ ފަރާތްތަކަށް ކަނޑައަޅާފައިވާ ކެޓަގަރީތަކަށް އެކި ބާވަތުގެ ފައިނޭންޝަލް މޮޑެލް އޮޕްޝަންތައް މެދުވެރިކޮށް ބީލަން ހުށަހެޅުމުގެ ފުރުސަތު ދެވޭނެ ކަމުގަ އެވެ. ފައިނޭންޝަލް މޮޑެލްތަކާއި އެ މޮޑެލްތަކުގެ ތަފުސީލީ މައުލޫމާތު މި މަޝްރޫއުގެ ދަށުން ކުރެވޭ އިއުލާންތަކުގެ ސްޕެސިފިކް ޕްރޮކިއުމަންޓް ނޯޓިސްތަކާ އެކު ފޯރުކޮށްދެވޭނެ ކަމުގަ އެވެ.
ފައިނޭންސިން މޮޑެލްތަކަށާއި ބީލަން ހުށަހެޅުމަށް ގައުމީ އަދި ބައިނަލްއަގުވާމީ ބީލަންވެރިންގެ ޝަރުތު ހަމަވުން ބިނާވާނީ ކަނޑައަޅާފައިވާ ކޮންޓްރެކްޓް ކެޓަގަރީތަކަށެވެ.
ޕްރީ-ކޮލިފިކޭޝަން ޕްރޮސެސްއެއް މެދުވެރިކޮށް އޯޕަން ނޭޝަނަލް އަދި އިންޓަނޭޝަނަލް ކޮމްޕެޓިޓިވް ބިޑިންއަށް ހުޅުވާލެވޭ ކޮންޓްރެކްޓްތަކަށް ހާއްސަ ޕްރޮކިއުމަންޓް ނޯޓިސްތައް އަންނަ މަހު އިއުލާން ކުރެވޭނެ ކަމަށް ޕްލޭނިން މިނިސްޓްރީން ބުންޏެވެ.
ޕްރީ-ކޮލިފިކޭޝަނަށް ދައުވަތު ދިނުމަށް މެއިލިން ލިސްޓުގައި ހިމެނުމަށް އެދޭ ޝަރުތު ހަމަވާ އަދި ޝައުގުވެރިވާ ބީލަންވެރިން ނުވަތަ އިތުރު މައުލޫމާތު ބޭނުންވާ ފަރާތްތަކުން [email protected] އީމެއިލް ކުރުމަށް ބަޔާނުގައި ވަނީ އެދިފަ އެވެ.
Ads by STO
