ޒަކާތު ހައުސްއިން ހުޅުމާލޭގައި 10 ފަންގިފިލާގެ އިމާރާތެއް އަޅަނީ
ދިވެހިރާއްޖޭގެ ޒަކާތު ހައުސްގެ ބިލްޑިން (ބައިތުއްޒަކާތު) ނަމުގައި ހުޅުމާލޭގައި 10 ފަންގިފިލާގެ އިމާރާތެއް އެޅުމުގެ މަސައްކަތް ކުރަމުން އަންނަ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ރާއްޖޭގައި ޒަކާތުގެ ހަރުދަނާ ނިޒާމެއް ގާއިމު ކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. އެގޮތުން 2023 ވަނަ އަހަރުގެ ޑިސެމްބަރު 18 ވަނަ ދުވަހު މޯލްޑިވްސް ޒަކާތު ހައުސްގެ ނަމުގައި އިދާރާއެއް ވަނީ އުފައްދަވާފަ އެވެ. އިސްލާމިކް މިނިސްޓްރީގެ ދަށުން ހިނގަމުންދާ ތަނެއްގެ ގޮތުގައި ހަމަޖައްސައި އުފެއްދި އިދާރާގެ ބޭނުމަކީ ރާއްޖޭގެ ޒަކާތުގެ ނިޒާމު ހަރުދަނާ ކުރުމުގެ މަސައްކަތާއި ޒަކާތުގެ ނަފާ އޭގެ ބެހެނިވެރިންނަށް ފުޅާ ދާއިރާއެއްގައި ލިބޭނެ ގޮތަށް ޒަކާތު ފަންޑު ތަރައްގީ ކުރުމުގެ މަސައްކަތް ކުރުމެވެ.
ޝަހީމް ވިދާޅުވީ އެ އިމާރާތް އެޅުމުގެ އަމަލީ މަސައްކަތް މި އަހަރުގެ ތެރޭގައި ފެށޭނެ ކަމަށް އުންމީދު ކުރައްވާ ކަމަށެވެ.
"މި އިމާރާތް ވެގެންދާނީ ޒަކާތު އިދާރާގެ އިތުރުން އޮފީސް ބައިތަކަށް ކުއްޔަށް ދެވޭ ޒަކާތު ފަންޑުގެ 10 ބުރީގެ ފުރަތަމަ އިންވެސްޓްމަންޓަށް. މި އިމާރާތުގެ އޮފީސް ބައިތަކުން ލިބޭ ނަފާ ބެހިގެން ދާނީ ޒަކާތުގެ ހައްގުވެރިންނަށް،"
މީގެކުރިން މިނިސްޓަރު ވިދާޅުވެފައިވާ ގޮތުގައި ޒަކާތު ހައުސްގެ ބިލްޑިން އެޅުމަށް ބޭނުންވާ ބިން ހުޅުމާލެއިން ހަމަޖެހިފައިވާ ކަމުގަ އެވެ. އެކަން މިނިސްޓްރީއަށް އަންގާފައިވާ ކަމަށާއި ބިން މިލްކު ކުރުމުގައި ކުރިއަށްދާ މަރުހަލާތަކުގެ މަސައްކަތް ފަށާފައިވާ ކަމަށެވެ.
ރާއްޖޭގެ ޒަކާތު ހައުސް ވެގެން ދާނީ ކުރިއަށް އޮތް ތަނުގައި މުހިންމު ގައުމީ އިދާރާއަކަށް ކަމަށް ވިދާޅުވި އެވެ. އިދާރާ ވާނީ ޒަކާތު ހައުސް ވާނީ ރާއްޖޭގައި ހުރި އެންމެ ހަރުދަނާ، ރައްޔިތުންނާ ގާތުން ހިދުމަތްދޭ އިޖުތިމާއީ މުއައްސަސާއަށް ކަމަށެވެ.
އިސްލާމީ ދުނިޔޭގައި ފާހަގަކޮށްލެވޭ މުހިންމު މުއައްސަސާއަކަށް ޒަކާތު ހައުސް ހެދުމަކީ އަމާޒެއް ކަމުގައި ވެސް ފާހަގަކުރައްވާފައިވެ އެވެ.
މިނިސްޓަރު އިތުރަށް ވިދާޅުވީ ހުސްވި އަހަރަކީ ރާއްޖޭގެ ތާރީހުގައި އެންމެ ގިނަ އަދަދަކަށް މުދަލު ޒަކާތް ލިބުނު އަހަރު ކަމަށެވެ. އެގޮތުން 101 މިލިއަނަށް ވުރެ ގިނަ ރުފިޔާ ޒަކާތު ފަންޑަށް ލިބިފައިވާ ކަމަށެވެ.
Ads by STO
