ދިރިއުޅުމުގެ ގޮންޖެހުންތަކާ ކުރިމަތިލާން ދަސްކޮށްދޭ ސެޝަނުގައި ބައިވެރިވުމުގެ ފުރުސަތު
"ދަ ކޯޗިން ކޯ" އިން މި އަންނަ މަހުގައި ބާއްވާ ދަތި އުދަނގޫތައް ކުރިމަތިލާއިރު ވަރުގަދަކޮށް ދެމިތިބުމުގެ ހުނަރު ދަސްކޮށްދޭ ސެޝަންތެއްގައި ބައިވެރިވުމުގެ ފުރުސަތު ހުޅުވާލައިފި އެވެ.
މި ސެޝަން ކުރިއަށް ގެންދަނީ "ކޮންސިސްޓެންސީ ތްރޫ ރެސިލިއެންސް: ސްޓޭއިންގ ސްޓްރޯންގް އިން ދަ ފޭސް އޮފް އެޑްވާސިޓީ" މި ނަމުގަ އެވެ.
10 މީހުންގެ ޖާގައަށް ހުޅުވާލައިގެން ކުރިއަށްގެންދާ މި ސެޝަންގައި ބައިވެރިވާން ބޭނުންވާ ފަރާތްތަކުން " ދަ ކޯޗިން ކޯ. އެމްވީ" ގެ ފޭސްބުކް ޕޭޖްގައިވާ ލިންކުގައިވާ ފޯމު ފުރާލައިގެން ބައިވެރިވެވޭނެ ކަމަށް އެ ޖަމިއްޔާއިން ބުންޏެވެ.
ދަ ކޯޗިން ކޯ އިން މި މައުލޫމާތު ހިއްސާ ކުރުމަށް ކުރި ޕޯސްޓެއްގައި ބުނީ މި އަންނަ މަހު 15 ވަނަ ދުވަހު ރޭގަނޑު 20:00 އިން ފެށިގެން 10:00 އަށް ކުރިއަށްދާ މި ސެޝަންގައި މައުލޫމާތު ހިއްސާކުރާނީ އައި.ސީ.އެފްގެ ސެޓިފައިޑް ޕްރޮފެޝަނަލް ކޯޗް އަދި ސެޓިފައިޑް ގްރޫޕް ކޯޗް މަރިޔަމް މުހައްމަދު ކަމަށެވެ.
އެ ޖަމިއްޔާއިން ބުނީ މި ސެޝަން ކުރިއަށް ގެންދިއުމުގެ މަގްސަދަކީ ކޯޗިން އަށް ގިނަ ބަޔަކު އަހުލުވެރިކޮށް، އޭގެ ފައިދާ މުޖުތަމައުގެ ގިނަ ބަޔަކަށް ފޯރުކޮށްދިނުން ކަމަށެވެ. އަދި އަމިއްލަ ދިރިއުޅުމުގައި ކަމެއް ހާސިލުކުރަން ނުވަތަ އުފާވެރިކަން ހޯދުމަށް، ނުވަތަ ކުރާ މަސައްކަތާ ގުޅިގެން ކަމެއް ހާސިލުކުރަން ބޭނުންވާ ކޮންމެ ފަރާތަކަށްވެސް މި ޕްރޮގްރާމުން ފައިދާ ކުރާނެ ކަމަށް އެ ޖަމިއްޔާއިން ބުންޏެވެ.
މިއީ އެއިން ކޮންމެ ފަރާތަކަށްވެސް ވަރަށް ރަނގަޅު ތަޖުރިބާއަކަށް ވެގެންދާނެ ކަމަށް އެ ޖަމިއްޔާއިން ވަނީ ފާހަގަކޮށްފަ އެވެ.
ދަ ކޯޗިން ކޯ އިން ބުނީ މި ސެޝަނުގައި ބައިވެރިންނަށް އެމީހުންގެ ލަނޑުދަނޑިތައް ހާސިލް ކުރުމަށް ދިމާވާ ގޮންޖެހުންތަކާ ކުރިމަތިލުމުގެ ހުނަރު ދަސްކޮށްދީ، އަމިއްލަ ގާބިލުކަން އިތުރުކޮށް، ކާމިޔާބީއާ ދިމާއަށް ދަތުރުކުރުމަށް ބޭނުންވާ އަމަލީ ފިޔަވަޅުތައް އެޅުމަށް މަގުފަހިކޮށްދެވޭނެ ކަމަށެވެ.
މީގެ އިތުރުން، ބައިވެރިންނަށް އެކަކު އަނެކަކާ ވާހަކަދައްކައި، ހިޔާލު ބަދަލުކޮށް، އެކަކު އަނެކެއްގެ ތަޖުރިބާ ހިއްސާކުރުމުގެ ފުރުސަތު ލިބިގެންދާއިރު، މިއީ ގޮންޖެހުންތަކާއި ކުރިމަތި ލުމަށް އެކި މީހުން ގެންގުޅޭ އުކުޅުތައް ދަސްވެ، އެކަމުގެ ގިނަ ފައިދާ ތަކެއް ލިބިދޭނެ ކަމެއް ކަންކަންވެސް ދަ ކޯޗިން ކޯ އިން ފާހަގަކުރެ އެވެ.
މި ސެޝަންއާ ބެހޭ އިތުރު މައުލޫމާތު "ދަ ކޯޗިން ކޯ" ގެ ފޭސްބުކް ޕޭޖް އަދި އިންސްޓަގްރާމްއިން ލިބެން ހުންނާނެ ކަމަށް އެ ޖަމިއްޔާއިން ބުންޏެވެ. އަދި [email protected] އަށް އީމެއިލްކޮށްގެން ނުވަތަ 9446363 ނަންބަރަށް ގުޅައިގެން މައުލޫމާތު ސާފުކުރެވޭނެ ކަމަށްވެސް އެ ޖަމިއްޔާއިން ވަނީ ފާހަގަކޮށްފަ އެވެ.
ދަ ކޯޗިން ކޯއިން މި ސެޝަންތައް ސިލްސިލާކޮށް ބާއްވާއިރު މި މަހުގެ 18 ވަނަ ދުވަހުގައި މީގެ ފުރަތަމަ ސެޝަންވަނީ ބާއްވާފަ އެވެ.
Ads by STO
