މަކިޓާ ބްރޭންޑްގެ ފޭކު އުފެއްދުންތައް އުޅޭތީ ސަމާލުވާން އިލްތިމާސްކޮށްފި
މަކިޓާ ބްރޭންޑްގެ ފޭކު އުފެއްދުންތައް އުޅޭތީ ސަމާލުވާން އިލްތިމާސްކޮށްފި އެވެ.
އެސްޓީއޯއިން މިއަދު ނެރުނު ބަޔާނުގައި ބުނީ އެ ކުންފުންޏަކީ ރާއްޖޭގައި "މަކިޓާ" ބްރޭންޑުގެ އުފެއްދުންތަކުގެ އެކްސްކްލޫސިވް ޑިސްޓްރިބިއުޓަރު ކަމަށެވެ.
އެގޮތުން "މަކިޓާ" ބްރޭންޑުގެ ކަނޑައެޅިފައިވާ މިންގަނޑުތަކާ އެއްގޮތްވާ، ފެންވަރު ރަނގަޅު އޮރިޖިނަލް އުފެއްދުންތައް ރާއްޖެ އެތެރެކޮށް ކަސްޓަމަރުންނަށް ފޯރުކޮށްދެމުން އަންނަތާ ގިނަ އަހަރުތަކެއްވެފައިވާކަން އެސްޓީއޯއިން ފާހަގަކޮށްފައިވެ އެވެ.
ނަމަވެސަ ފަހަކަށް އައިސް އެކިގޮތްގޮތަށް "މަކިޓާ" ބްރޭންޑުގެ އުފެއްދުންތައް ރާއްޖެ އެތެރެކުރާ މިންވަރު އިތުރުވެ ބާޒާރުގައި އެ ބްރޭންޑްގެ ފޭކު އުފެއްދުންތައް ދައުރުވަމުންދާކަން ފާހަގަކުރެވިފައިވާ ކަމަށް އެސްޓީއޯއިން ބުނެފައިވެ އެވެ.
އެގޮތަށް ދައުރުވަމުންދާ އަސްލު ނޫން އުފެއްދުންތަކަކީ ކަސްޓަމަރުންނަށް އޭގެ ބޭނުން އެދެވޭ ގޮތުގައި ހިފޭނެކަމުގެ ޔަގީންކަން ނެތް، ރައްކާތެރިކަމުގެ އެއްވެސް ގެރެންޓީއެއް ނެތް އުފެއްދުންތަކެއް ކަމަށް އެސްޓީއޯއިން ބުނެ އެވެ.
އެހެންވެ ދިމާވެދާނެ ނުރައްކާތެރި ހާދިސާއަކުން ރައްކާތެރިވުމަށް ބައްލަވައިގަންނަވާ އުފެއްދުންތައް ގަތުމުގެ ކުރިން އެ އުފެއްދުންތަކަކީ އޮރިޖިނަލް އުފެއްދުންތައްކަން ކަށަވަރުކުރުމަށްފަހު ނޫނީ ނުގަތުމަށް އެސްޓީއޯއިން ވަނީ އިލްތިމާސްކޮށްފަ އެވެ.
"އެސްޓީއޯގެ އައުޓްލެޓްތަކުން އަދި އެސްޓީއޯއިން ހުއްދަ ލިބިފައިވާ ފަރާތްތައް މެދުވެރިކޮށް "މަކިޓާ" ބްރޭންޑުގެ އޮރިޖިނަލް އުފެއްދުންތައް ކަސްޓަމަރުންނަށް ފޯރުކޮށްދެމުންދާއިރު، "މަކިޓާ" ބްރޭންޑުގެ އުފެއްދުންތަކުގެ ފެންވަރު ހިފެހެއްޓުމަށް، އެސްޓީއޯ ސާވިސް ސެންޓަރުން އާފްޓަ ސޭލްސް ހިދުމަތް ފޯރުކޮށްދޭނީ އެސްޓީއޯއިން ނުވަތަ އެސްޓީއޯގެ ހުއްދަ ލިބިފައިވާ ފަރާތްތައް މެދުވެރިކޮށް ބައްލަވައިގަންނަ "މަކިޓާ" ބްރޭންޑުގެ އުފެއްދުންތަކަށް އެކަނިކަމުގައި ކަސްޓަމަރުންގެ މަޢުލޫމާތަށްޓަކައި ދަންނަވަމެވެ." އެސްޓީއޯއިން ބުނެފައިވެ އެވެ.
އެހެންކަމުން، "މަކިޓާ" ބްރޭންޑުގެ ފޭކު އުފެއްދުންތަކާމެދު ސަމާލުވުމަށާއި އަދި "މަކިޓާ" ބްރޭންޑުގެ އުފެއްދުންތަކުގެ އަސްލުކަން ކަށަވަރުކުރުމަށް އެހީތެރިކަމެއް ބޭނުންފުޅުވާނަމަ، އެސްޓީއޯ "މަކިޓާ" ޝޯރޫމަށް ވަޑައިގަތުމަށް ވެސް ވަނީ އިލްތިމާސްކޮށްފަ އެވެ.
Ads by STO
