ސަރުކާރުން މި އެއްވުން ރަނގަޅަށް ބަލައި އަޑުއަހަން ޝާހިދު ގޮވާލައިފި
އިދިކޮޅު އެމްޑީޕީން މިރޭ ފަށައިގެން ކުރިއަށް ގެންދާ އެއްވުން ސަރުކާރުން ރަނގަޅަށް ބަލައި އަޑުއަހަން އެ ޕާޓީގެ ރައީސް އަބްދުﷲ ޝާހިދު ގޮވާލައްވައިފި އެވެ.
ގާނޫނު އަސާސީ މިހާރު ނުހިނގާ ކަމަށް ބުނެ "ފުދިއްޖެ، ފުނޑިއްޖެ" ނަމުގައި އެމްޑީޕީން މިރޭ ހިނގާލުން ފެށީ އާޓިފިޝަލް ބީޗުންނެވެ. މިރޭ އަށެއް ޖެހިއިރު ފެށި އެ ހިނގާލުމަށް އެމްޑީޕީއަށް ތާއިދުކުރާ ރަށްރަށުގެ މީހުން ވެސް ވަނީ މާލެއަށް އައިސްފަ އެވެ.
"ސަރުކާރުން މި ވާހަކަތައް އަޑުއައްސަވާ، މި މަންޒަރުތައް [ރަނގަޅަށް] ބައްލަވާ، ރައްޔިތުންގެ ޝުއޫރުތައް ހުރި ގޮތް. ރައްޔިތުން ވަރަށް ބޮޑަށް ނިކަމެތިވެ، އިގުތިސޯދު ދަށްވެ، ސަރުކާރުގެ ވައުދުތައް ނުފުއްދޭތީ، ގާނޫނު އަސާސީގެ ރޫހާ ހިލާފަށް އެތައް ކަމެއް ކުރަމުންދާތީ މި ނުކުމެ މި ތިބީ،" ރައްޔިތުންގެ މަޖިލީހުގެ ރައީސްކަމާއި ފޮރިން މިނިސްޓަރުކަން ކުރައްވާފައިވާ ޝާހިދު ހިނގައިލުމުގެ ތެރެއިން ޓީވީއަކަށް އިންޓަވިއު ދެއްވަމުން ވިދާޅުވި އެވެ.
އެއްވުުމުގައި ބައެއް ފަރާތްތަކުން ދަނީ ރައީސް ޑރ. މުހައްމަދު މުއިއްޒުގެ އިސްތިއުފާއަށް ވެސް ގޮވަމުން ނެވެ.
ގާނޫނޫ އަސާސީގެ ދިފާއުގައި އެމްޑީޕީން މިރޭ މަގު މައްޗަށް ނުކުތީ ރައްޔިތުންގެ މަޖިލީހަށް އިންތިހާބުވާ ޕާޓީން ވަކިކުރުމުން މެމްބަރުކަމުގެ ގޮނޑި ގެއްލޭ ގޮތަށް ގާނޫނު އަސާސީއަށް ގެނައި އިސްލާހުތަކާއެކު އޮތް ކަންބޮޑުވުމާ އެކު އެވެ.
އެމްޑީޕީން ބުނާ ގޮތުގައި ގާނޫނު އަސާސީ އިސްލާހުކޮށްފައި ވަނީ އެ ގާނޫނުގެ 90 ވަނަ މާއްދާ އާ މުޅިން ހިލާފަށެވެ. އެކަންބޮޑުވުން އޮތަތީވެ އިސްލާހުތައް ބާތިލުކުރަން ސަރުކާރަށް ގޮވާލައި، ބާތިލުކުރަންދެން މުޅި ރާއްޖޭގައި އިހުތިޖާޖުކުރަން ހުސްވި ޑިސެމްބަރު މަހު ކާނިވާ ސަރަހައްދުގައި ބޭއްވި ގައުމީ މަޖިލީހުގެ ޖަލްސާގައި އޮތީ ފާސްކޮށްފަ އެވެ.
މެމްބަރެއްގެ ގޮނޑި ގެއްލި އަލުން ވާދަކުރާނަމަ އެ މެމްބަރަކަށް ތާއިދުކުރަންވެސް އެރޭ ފާސްކުރި އެވެ.
މަޖިލީހުގެ މެންބަރުން އިންތިހާބުވުމަށްފަހު ސިޔާސީ ޕާޓީ ބަދަލުކޮށްފި ނަމަ ނުވަތަ ޕާޓީން ވަކިކޮށްފި ނަމަ މަޖިލީހުގެ މެންބަރުކަން ގެއްލޭ ގޮތަށް ގާނޫނު އަސާސީއަށް އިސްލާހު ގެންނަން ސަރުކާރުން މަޖިލީހަށް ހުށަހެޅި ބިލު ފާސްކޮށް ތަސްދީގުކުރީ ނޮވެމްބަރު މަހުގެ 20 ވަނަ ދުވަހު އެވެ.
އެހެން ނަމަވެސް ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން އެ މަހުގެ 24 ވަނަ ދުވަހު ވަނީ ގާނޫނު އަސާސީއަށް ގެނައި އިސްލާހުތައް ބާތިލުކުރަން ސުޕްރީމް ކޯޓަށް މައްސަލަ ހުށަހަޅައިފަ އެވެ.
Ads by STO
