އިހުސާން ހައްޔަރު ނުކުރިއްޔާ މުލިއާގެ ދޮށަށް އެއްވާނެ ކަމަށް ޝިފާޒު ވިދާޅުވެއްޖެ
ހޯމް މިނިސްޓަރު އަލީ އިހުސާން ހައްޔަރު ނުކޮށްފިނަމަ މުލިއާގެ ދޮށަށް އެއްވާނެ ކަމަށް އިދިކޮޅު އެމްޑީޕީގެ ހިނގައިލުމުގެ ތެރޭގައި އެ ޕާޓީގެ ކުރީގެ ނައިބު ރައީސް މުހައްމަދު ޝިފާޒު ވިދާޅުވެއްޖެ އެވެ.
އޭނާ އެ އިޝާރާތް ކުރެއްވީ މީހުނަށް ނޭނގޭ ގޮތަށް ވެރިކަންކުރާ ޕީއެންސީގައި ދަފްތަރުކުރި މައްސަލަ ފެންމަތިވި އިރު ހޯމް މިނިސްޓަރު އަލީ އިހުސާން ވެސް ހުންނަވައިގެން ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރު) ގެ މީޓިން ރޫމުގައި ޕީއެންސީއަށް ގިނަ އަދަދެއްގެ ފޯމުތައް ފުރާ މަންޒަރު ފެންނަ ފޮޓޯތަކެއް ސޯޝަލް މީޑިއާގައި ދައުރުވި ކަންކަމަށެވެ.
އެމްޑީޕީން ތުހުމަތުކުރަނީ ވަގު ފޯމުތަކެއް ހުށަހަޅަން މިނިސްޓަރު އިހުސާންގެ ބައިވެރިވުމެއް އޮތް ކަމަށެވެ. އިހުސާން އެ ކަން ދޮގު ކުރައްވަ އެވެ.
"ފުލުހުން ކުރަންވީ ކަމަކީ ފުލުހުންގެ އިސްވެރިޔަކަށް ހުންނެވި ހޯމް މިނިސްޓަރު އިހުސާން ހައްޔަރު ކުރަންވީ. އިހުސާން މިނިސްޓަރަކަށް ހުންނަވާ ހިނދަކު ރައްޔިތުންގެ ޒާތީ މައުލޫމާތުން ވައްކަން ކުރި މައްސަލައެއް ނުބެލޭނެ. އިހުސާން ހައްޔަރުނުކޮށްފިއްޔާ މިސްރާބު ޖަހަން ޖެހޭނީ މުލިއާގެ ދޮށަށް އެއްވަން. މިއީ އެއްވުމުގެ ހައްގު ދިވެހި ރައްޔިތުންނަށް ހޯދައިދިން ޕާޓީއޭ،" ޝިފާޒު ވިދާޅުވި އެވެ.
Ads by STO
