ތަރމޯމީޓަރު ކަމަށް ހީކޮށް ވީބީ މާޓުގައި ހުރި ބިދޭސީއަކު ސައީދުގެ މޫނަށް ފިތާލީ ސެނިޓައިޒަރ ފުޅި

ޖުމްހޫރީ ޕާޓީގެ ކައުންސިލު މެންބަރު މުޙައްމަދު ސައީދު (ބޮކި ސައީދު) ގެ ލޮލަށް ބިދޭސީއަކު ސެނިޓައިޒަރ ޖެހިގޮތަކުން އޭނާގެ ހާލު ދެރަވެ އައިޖީއެމްއެޗުން ފަރުވާ ހޯދައިފިއެވެ.

Ads by STELCO

"ދެން" އަށް މައުލޫމާތު ދެއްވަމުން ސައީދު ވިދާޅުވީ މިހާދިސާ ހިނގާފައިވަނީ މިއަދު 17:45 ހާއިރު ވީބީ މާޓުގައި ކަމަށެވެ.

އެފިހާރައަށް ވަތްއިރު ބިދޭސީ މީހާ ހުރީ އެއް އަތަށް ސެނިޓައިޒަރ ފުޅިއެއް ލައިގެން ކަމަށާއި އަނެއް އަތުގައި އޮތީ ތަރމޯމީޓަރު ކަމަަށް ސައީދު ބުންޏެވެ.

"ގިނަ ފިހާރަތަކުގައި މިހާރު ވަންނަތަނުން ތަރމޯމީޓަރު ދިއްކޮށްލާފަ، ދެން އަތަށް ސެނިޓައިޒަރ ޖަހާ. އިންސާނަކަށް އޮޅިދާނެ ދެއްތޯ. ތަރމޯމީޓަރު ދިއްކޮށްލާފަ ދެން ކަސްޓަމަރ ކައިރީގައި ބުނެލަން އެންމެ ރަނގަޅު ސެނިޓައިޒް ކޮށްލާފަ ދާން. އެކަަމު އޭގެ ބަދަލުގައި ދެއަތަށް ދޭތި ލައިގެން އުޅެންވީމަ މީހުންނަށް އޮޅޭނެ ނޫންތޯ. ބިދޭސީ މީހާ ސެނިޓައިޒާ ފުޅި ނެގި ގޮތަށް ނަގާފައި ފިތާލީމަ ގާތްގަނޑަކަށް މުށެއްހާ ވަރަށް ސެނިޓައިޒަރ ޖެހުނީ މޫނަށާއި ވާތު ލޮލަށް" ސައީދު ކިޔައިދެއްވިއެވެ.

ވަގުތުން އައިޖީއެމްއެޗަށް ސައީދު ގެންދިޔަ ކަމަށާއި، އެމަޖެންސީ ރޫމުގައި ފަރުވާ ދިނުމަަށްފަހު މިވަގުތު އޮންނެވީ ގޭގައި ކަމަށް ވެސް ވިދާޅުވިއެވެ.

މިއީ ވީބީ މާޓުން މިފަދަ ހާދިސާއެއް އޭނާއަށް ދިމާވި ދެވަނަ ދުވަސްކަން ވެސް ސައީދު ފާހަގަ ކުރެއްވިއެވެ.

"ފުރަތަމަ ދުވަހުވެސް ދިއްކޮށްލީ ސެނިޓައިޒަރ ފުޅި. އެދުވަހު ހުރީ އެހެން ބިދޭސީއެއް. އެދުވަހު އެފުޅިއަަށް ފިތާލުމުގެ ކުރިން އަަޅުގަނޑަށް ހަޅޭލަވައި ގަނެވުނީމަ ސަލާމަތްވީ." ސައީދު ވިދާޅުވިއެވެ.