އޭލެވެލް ދަރިވަރުން އިމްތިހާނު ހަދާ ސެންޓަރު ހުރި ރަށަކަށް އަވަހަށް ދިއުމަށް އިލްތިމާސްކޮށްފި
އޭލެވެލް އިމްތިހާނު އަންނަ މަހު ފެށުމުގެ ކުރިން، އެ އިމްތިހާނު ހަދާ ސެންޓަރު ހުރި ރަށަކަށް އަވަހަށް ދިއުމަށް ޑިޕާޓްމަންޓް އޮފް ޕަބްލިކް އެގްޒަމިނޭޝަނުން އިލްތިމާސް ކޮށްފައެވެ.
މީގެކުރިން އޭލެވެލް ދަރިވަރުންގެ އެޑެކްސެލް އިމްތިހާނު ބާއްވަން ތާވަލްކޮށްފައި އޮތީ މެއި/ޖޫން ގައެވެ. ނަމަވެސް ކޮވިޑް-19ގެ ބަލިމަޑުކަމުގެ ސަބަބުން ސްކޫލްތައް ބަންދުކޮށް ގިނަ ދުވަސްތަކެއްް ވަމުން ދާތީ ޑިޕީއީ އިން ވަނީ މި އަހަރުގެ އޮކްޓޯބަރު/ނޮވެމްބަރ އަށް އިމްތިހާން ފަސްކޮށްފައެވެ.
ކޮވިޑް-19ގެ ސަބަބުން މާލޭ ސަރަހައްދުގެ ހުރިހާ ސުކޫލެއްވެސް ބަންދު ކުރިއެވެ. އަދި ސުކޫލްތައް ބަންދު ކުރުުމުން ގިނަ ދަރިވަރުންތަކެއް ވަނީ އެ ދަރިވަރުންގެ ރަށްރަށަށް ގޮސްފައެވެ. އަދި ބައެއް ދަރިވަރުން އޭލެވެލްގެ އިމްތިހާނު ދިގުލައިގެން ދާތީ އޭލެވެލް ކިޔެވުން ދޫކޮށްލާފައި ވެސް އެބަހުއްޓެވެ.
ޑީޕީއީ އިން ކުރި އިއުލާނެއްގައި އެދިފައިވަނީ އަންނަ މަހު ފަށާ އައިއޭއެލް އެޑެކްސެލް އޭލެވެލް އިމްތިހާނު ހެދުމަށްޓަކައި، އެ ދަރިވަަރަކު އިމްތިހާން ހަދާ ސެންޓަރު ހުރި ރަށަކަށް އަންނަ އާދިއްތަ ދުވަހުގެ ކރިން ދިއުމަށެވެ.
ރާއްޖޭގައި މިއަހަރު އޭލެވެލް އިމްތިހާނު ހަދާނީ ގުރޭޑް 11 ގެ ދަރިވަރުން އެކަންޏެވެ. ގްރޭޑް 12 ގެ ދަރިވަރުން މިދިޔަ އަހަރުގެ އޮކްޓޯބަރު ނޮވެމްބަރުގައި އިމްތިހާނު ހެދުމުން އެ ދަރިވަރުން މިހާރު ތިބީ ޓްރާންސްސިޝަން މަރުހަލާގައެވެ.
މިއަހަރުގެ ގްރޭޑް 10ގެ ދަރިވަރުންގެ ކެމްބްރިޖް އޯލެވެލް އިމްތިހާނުވެސް ވަނީ ކޮވިޑް-19ގެ ބަލިމަޑުކަމުގެ ސަބަބުން އަންނަ އަހަރުގެ މެއި/ޖޫން އަށް ފަސްކޮށްފައެވެ.
