ހުޅުމާލޭ މުނިސިޕަލް ހިދުމަތްތައް ކައުންސިލް ދަށަށް ބަދަލުކުރަށް އަލުން މަޝްވަރާތައް ފަށައިފި
ހުޅުމާލޭ މުނިސިޕަލް ހިދުމަތްތައް މާލެ ސިޓީ ކައުންސިލު ދަށަށް ބަދަލުކުރުމާ ގުޅޭ ގޮތުން، ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީޑީ) އާއެކު އަލުން މަޝްވަރާތައް ފަށައިފައި އެވެ.
ހުޅުމާލޭގެ މުނިސިޕަލް ހިދުމަތްތައް ކައުންސިލާ ހަވާލުކުރަން ކެބިނެޓުން ނިންމާފައިވާކަން ޑިސެމްބަރު 31، 2023 "އެކްސް" ގައި ރައީސް ޑރ. މުހައްމަދު މުއިއްޒު ވަނީ ވިދާޅުވެފަ އެވެ.
ސިޓީ ކައުންސިލުން ބުނީ، މިއަދު ބޭއްވީ މުނިސިޕަލް ހިދުމަތްތައް ކައުންސިލުގެ ދަށަށް ބަދަލުކުރުމަށް ކުރެވޭ މަޝްވަރާ ބައްދަލުވުންތަކުގެ ތެރެއިން އެޗްޑީސީއާއެކު ބޭއްވުނު 4 ވަނަ މަޝްވަރާ ބައްދަލުވުން ކަމަށެވެ.
މިއަދު ކުރިއަށް ދިޔަ މަޝްވަރާ ބައްދަލުވުމުގައި މާލެ ސިޓީގެ މޭޔަރު އާދަމް އާޒިމް ވިދާޅުވީ ހުޅުމާލެ މުނިސިޕަލް ހިދުމަތްތައް ކައުންސިލުގެ ބެލުމުގެ ދަށަށް ބަދަލުކުރުމުގައި ގާނޫނީ އެއް ވެސް ހުރަހެއް ނެތް ކަމަށާއި އެކަންކޮޅެއްގައި ނުޖެހި ދިގު ދެމިގެންދާތީ ކަންބޮޑުވެވަޑައިގަންނަވާ ކަމަށެވެ.
އަދި އެކަން ކައުންސިލުގެ ދަށަށް ބަދަލުވުން ލަސްވަމުން ދާދިއުމާ މެދު އާޒިމް ސުވާލު އުފައްދެވި އެވެ.
އެޗްޑީސީގެ އެމްޑީ މައުރޫފް ޖަމީލު ވިދާޅުވީ، ހުޅުމާލޭގެ މުނިސިޕަލް ހިދުމަތްތައް ކައުންސިލުގެ ދަށަށް ބަދަލުކުރުމާ ގުޅޭގޮތުން އިތުރަށް މަޝްވަރާކުރެވިދާނެ ކަމަށެވެ. އެގޮތުން އިދާރީ ގޮތުން ހަމަޖައްސަން ޖެހޭ ބައެއްކަންކަން ހުރިކަމަށް ވެސް މައުރޫފް ވިދާޅުވި އެވެ.
މޭޔަރު އާޒިމްގެ އިތުރުން އެ ބައްދަލުވުމުގައި ޑެޕިއުޓީ މޭޔަރު އަހުމަދު ނަރީޝާއި ހުޅުމާލެ ދާއިރާގެ ކައުންސިލަރު އަލީ އައިމަން ބައިވެރިވެ ވަޑައިގެންނެވި އެވެ.
ހުޅުމާލޭ މުނިސިޕަލް ހިދުމަތް ކައުންސިލަށް ދަށް ބަދަލުކުުރުމަށް އަލުން މަޝަވަރާތައް ފަށާފައިވައިރު، އެޗްޑީސީގެ ކުރީގެ މެނޭޖިން ޑިރެކްޓަރު (އެމްޑީ) އިބްރާހިމް ފަޒުލް ވިދަޅުވެފައިވާ ގޮތުން މީގެ ކުރިން މުނިސިޕަލް ހިދުމަތްތައް ކައުންސިލާ ހަވާލުނުކުރެވިގެން އުޅެނީ އެކަމަށް ބޭނުންވާ ވަސީލަތްތަކުގެ އިތުުރުން މާލީ ތަނަވަސްކަން ނެތުމުންނެވެ.
Ads by STO
