ދޮގަކުން ހިތްހަމަ ޖައްސާލުމަށް ވުރެން ހަގީގަތް އަޑުއަހައި އެކަމާ މާޔޫސްވުން ވެސް މާ ހެވެއެވެ.
ދޮގު ހަދަނީ ކޮން ބޭނުމެއްގައި ހެއްޔެވެ؟ ތެދަށް ބުނަން ނުކެރެނީ ހެއްޔެވެ؟ އެހެންކަމަށްވާ ނަމަ އެވާހަކަ ނުބުނެ ހުންނާށެވެ. ނަމަވެސް ދޮގު ނުހަދާށެވެ. ދޮގަކުން ހިތްހަމަ ޖައްސާލުމަށް ވުރެން ހަގީގަތް އަޑުއަހައި އެކަމާ މާޔޫސްވުން ވެސް މާ ހެވެއެވެ.
އެކުގައި އުޅޭ ރައްޓެއްސަކު، އެހާ ގާތްކޮށް ގެންގުޅުމުން އެފަދަ ކަމެއް އޭނަ ފަރާތުން އެނގުމަކީ ހާދަހާ ދެރަ ކަމެކެވެ. ދޮގު ހެދުމަކީ ފިތުނަ އުފެދުމަށް ކުރިމަތިވާ ވަރަށް ބޮޑު ކަމެކެވެ. ތިބާ އަހަންނަށް ދޮގުހަދައިފިނަމަ އަހަންނަށް ވިސްނެނީ އަހަންނަކީ ތިބާގެ އިތުބާރު ނުހިފޭ މީހެއް ފަދައިންނެވެ.
އާދޭހެވެ. ބުނެދޭން ނޭނގުނަށް ހިތަށް ވަރަށް އަސަރު ކުރެއެވެ. އެކަމާ މެދު ވިސްނެއެވެ. އަދި ބައެއް ފަހަރު އަމިއްލަ ނަފުސު ދެކެވެސް ރުޅި އާދެވެއެވެ. އަހަރެންނަށް ދޮގު ހަދަނީ އަހަރެންގެ ކިބައިގައި ވާ ކޮން ސިފައެއްގެ ސަބަބުން ހެއްޔެވެ؟ ވަފާތެރި އެކުވެރި އެއް ގޮތުގައި އަހަރެން ހުރެދިނީތީ ހެއްޔެވެ؟
އަހަރެން އެހާ ގާތްކޮށްގެން ގެންގުޅުނު ރަޙުމަތްޔެރިޔާ އަހަންނަށް ކަންކަން ފޮރުވާނެ ކަމަކަށް ހީ އެއް ނުކުރަމެވެ. އަދި ނުވެސް ކުރާނަމެވެ. އެހެން ނަމަވެސް ތިބާގެ ފަރާތުން އަހަންނަށް އެނގެން ޖެހޭ ކަމެއް އެހެން ފަރާތަކުން އެނގި، ތިބާ ގާތު އެހުމުން އެއީ ދޮގެއް ކަމަށް ބުނާ ދުވަހަކީ އަހަރެންނަށް ކެތް ކުރެވޭނެ ދުވަހެއް ނޫނެވެ.
ތިބާގެ ޙަޔާތުގައި އަހަރެންނަށް ދީފައިވާ ޤަދަރު ފަހަރުގައި އަހަރެންނަށް ނޭނގިދާނެއެވެ. އެހެން ނަމަވެސް އަހަރެންގެ ހިތުގައި ތިބާއަށް ޓަކައި ވަނީ ވަރަށް މަތިވެރި ޤަދަރެކެވެ. ދުވަހަކުވެސް އެއްވެސް ކަމެއް އަހަރެން ސިއްރު ކުރަން ބޭނުންނުވާ ރަހުމަތްތެރި އަކީ ތިއީއެވެ. ސަބަބަކީ ލޯމަރާލުމަށް ފަހު ވެސް އަހަންނަށް ތިބާއާއި މެދު އިތުބާރު ކުރެވޭތީއެވެ.
އެކުވެރިޔާއެވެ. ހަނދާންކުރައްޗެވެ. ދުވަހަކުވެސް އަހަންނަށް ދޮގެއް ނުހަދައްޗެވެ. އަހަރެންގެ ހިތް އެދުވަހަކުން ކުދި ކުދި ވެދާނެއެވެ. ތިބާއަށް ސިއްރު ކުރެވޭނެ އެއްވެސް ކަމެއް އަހަރެންގެ ދިރިއުޅުމުގައި ނެތެވެ. ނުވެސް އޮންނާނެެއެވެ. އަދި އެފަދަ ކަމެއް ބާއްވާކަށް ވެސް ބޭނުމެއް ނުވެއެވެ. ހަމައެފަދައިން ތިބާގެ ހިތުގައި އަހަންނަށް ސިއްރު ކުރަންޖެހޭ އެއްވެސް ކަމެއް ނޯންނާނެ ކަމަށް ފޮނި އުއްމީދު ތަކެއް ކުރަމުއެވެ.
ތިބާ އަހަރެންނަށް ދޮގު ހަދާ ދުވަހަކީ އަހަރެން މި ދުނިޔޭގައި ވެސް ދެވަނަ މީހަކަށް ތިފަދަ އިތުބާރެއް ކުރަން ޖެހިލުންވާން ފަށާނެ ދުވަހެވެ. އަހަރެން ގަބޫލު ކުރާ ގޮތުގައި އަހަރެންނަށް ތިބާ ވަރަށް ރަނގަޅަށް އެނގެއެވެ. ނަމަވެސް ތިބާ އަހަރެންނަށް ދޮގު ހަދާ ދުވަހަކީ އަހަރެންނަށް އަހަރެންގެ އަމިއްލަ ނަފުސު ވެސްް ދަސް ނުވާކަން ޔަވީން ވާނެ ދުވަހެކެވެ. ހެޔޮނުވާނެއެވެ. އަހަރެންނަށް ދޮގު ނުހަދައްޗެވެ.
