އަބަދު ދެން އޮފީހަށް ސަލާމް ބުނަން ނުހަދާތި! އެމްސީ އަކާއި ނުލާ ދެން ސަލާމް ބުނެވެނީ އެންމެ 15 ދުވަހު!
މެޑިކަލް ސެޓްފިކެޓް (އެމްސީ) ނުވަތަ ސަލާމުގެ ސެޓްފިކެޓު ނެތި ދެން ވަޒީފާއަށް ސަލާމް ބުނެވޭނީ އެންމެ 15 ދުވަހު ކަމުގައި ކަނޑައަޅައިފިއެވެ.
މިގޮތަށް ކަނޑައެޅުނީ ވަޒީފާއާއި ބެހޭ ގާނޫނަށް ގެނެސްފައިވާ އިސްލާހުތައް ރައީސް އިބްރާހީމް މުހައްމަދު ޞާލިޙު މިއަދު ތަސްދީގު ކުރެއްވުމާއި އެކުގައެވެ.
މިބިލުގައިވާ ގޮތުން މުވައްޒަފަކު ހިދުމަތްކުރާ ކޮންމެ އަހަރަކު، މުސާރަ ލިބޭގޮތަށް ކޮންމެ މުވައްޒަފަކަށް ވެސް މަދުވެގެން 30 ދުވަހުގެ ޗުއްޓީއެއް، ސަލާމުގެ ޗުއްޓީގެ ގޮތުގައި ދޭންވާނެ ކަމަށާއި ބަލީގެ ބާވަތާއި އެ ބަލީގެ ސަބަބުން މުވައްޒަފަކަށް މަސައްކަތަށް ނުނިކުމެވޭނެ މުއްދަތު ބަޔާންކޮށް، ރަޖިސްޓަރީކޮށްފައިވާ ޞިއްޙީ މަސައްކަތްތެރިޔަކު ދޫކުރާ މެޑިކަލް ސެޓްފިކެޓެއް ވަޒީފާއަށް ނުކުންނަ ދުވަހު ހުށަހެޅުމުން މެނުވީ އެ މުވައްޒަފަކަށް ސަލާމުގެ ޗުއްޓީ ދިނުން، ވަޒީފާދޭ ފަރާތުގެ މައްޗަށް ލާޒިމު ވެގެނެއް ނުވާނެއެވެ.
ނަމަވެސް އެ 30 ދުވަހުގެ މުއްދަތުގެ ތެރެއިން 15 ދުވަސް ވިދިވިދިގެން ދެ ދުވަހަށްވުރެ ދިގު ނުވާނެ ގޮތެއްގެ މަތިން، މެޑިކަލް ސެޓްފިކެޓަކާއި ނުލައި، ސަލާމުގެ ޗުއްޓީގެ ގޮތުގައި ބޭނުންކުރުމުގެ އިޚްތިޔާރު، ވަޒީފާ އަދާކުރާ ފަރާތަށް ލިބިގެންވާ ކަމަށް ވެސް ރައީސް ޞާލިޙު މިއަދު ތަސްދީގު ކުރެއްވި ބިލުގައިވެއެވެ.
މީގެ އިތުރުން އެކިއެކި ވިޔަފާރިކުރާ ތަންތަނުގައާއި، އެނޫންވެސް މަސައްކަތްތައްކުރާ ތަންތަނުގައި މުވައްޒަފުން މަސައްކަތް ކުރަމުންދާ ގޮތް ބަލައި ދެނެގަތުމަށާއި، އެތަންތަނުގައި މަސައްކަތްކުރާ މީހުންނަށް މުސާރައިގެ ގޮތުން އެންމެ ކުޑަމިނުން ދެވޭނެ އުޖޫރައާ ގުޅޭގޮތުން މިނިސްޓަރަށް ލަފާ ދިނުމަށް ޓަކައި "މިނިމަމް ވޭޖް އެޑްވައިޒަރީ ބޯޑު" ގެ ނަމުގައި ބޯޑެއް އޮންނަންވާނެ ކަމަށް ވެސް ބިލުގައި ވެއެވެ.
Ads by STO
