ސައީދުގެ އާއިލީ މަސްލަހަތު އޮންނަ މީހެއްގެ ކުންފުންޏަކަށް ޕްރޮޖެކްޓެއް ދިން މައްސަލަ އޭސީސީއަށް
ފެނަކަ ކޯޕަރޭޝަން ލިމިޓެޑްގެ މެނޭޖިން ޑިރެކްޓަރ އަހްމަދު ސައީދު މުހައްމަދުގެ އާއިލީ މަސްލަހަތު އޮންނަ މީހެއްގެ ކުންފުންޏަކަށް ޕްރޮޖެކްޓެއް ހަވާލުކުރި މައްސަލަ އެންޓި ކޮރަޕްޝަން ކޮމިޝަނަށް ހުށަހަޅައިފިއެވެ.
އާންމު ފަރާތަކުން ކޮށްފައިވާ ޓްވީޓެއްގައި ބުނެފައިވަނީ ފެނަކަ އެމްޑީ ސައީދުގެ ކޮރަޕްޝަންތަކުގެ ތެރޭގައި އަމިއްލަ އަނބިމީހާގެ ހިއްސާ އޮތް ކުންފުންޏަކަށް ޕްރޮޖެކްޓް ދިނުންވެސް ހިމެނޭ ކަމަށެވެ. އަދި ހަމަ އެހެންމެ މި ޓްވީޓްގައި އޭސީސީއަށް ހުށަހަޅާފައިވާ މައްސަލަ ހުށަހަޅާ ފޯމު ވެސް ވަނީ ހިއްސާކޮށްފައެވެ.
އެފޯމުގައިވާ ގޮތުގައި މި މައްސަލަ ހުށަހަޅާފައިވަނީ ފެނަކަ ކޯޕަރޭޝަންގެ މުވައްޒަފުންގެ ފަރާތުންނެވެ. އަދި ނަންހާމަ ކުރަން ބޭނުން ނުވާކަމަށް ވެސް ވަނީ މި މައްސަލަ ފޯމުގައި ބުނެފައެވެ. މި ފޯމުގައި ބުނެފައިވަނީ ހދ.ކުރިނބީ ޕަވަރ ހައުސް ވަށާފާރު ރޭނުމުގެ ޕްރޮޖެކްޓް ފެނަކަ ކޯޕަރޭޝަން ލިމިޓެޑްގެ އެމްޑީ އަހްމަދު ސައީދު މުހައްމަދުގެ އަނބިކަނބަލުން ޝާހިދާ އަބްދުﷲގެ އިތުރު އެއްބަނޑު އެއްބަފާ ބޭބެއެއް ކަމަށްވާ އަހްމަދު އަބްދުﷲ ދީދީގެ ޝެލްޓަރ ހޯލްޑިންގްސް ޕްރައިވެޓް ލިމިޓެޑް އަށް ދީފައިވަނީ 626،364.55 (ހަސަތޭކަ ސައްބީސްހާސް ތިންސަތޭކަ ފަސްދޮޅަސް ހަތަރު ރުފިޔާ ފަންސާސްފަސް ލާރި) އަށް ކަމަށެވެ. އަދި މިއީ ކަނޑައެޅިގެން ކުންފުނީގެ އުސޫލުތަކާ ހިލާފަށް މެނޭޖިން ޑިރެކްޓަރ ސައީދު އޭނާގެ މަޤާމުގެ ހައިސިއްޔަތު ނަހަމަ ގޮތުގައި ބޭނުން ކޮށްގެން ހޯދަމުންދާ ނުހައްގު މަންފާތަކެއްގެ ގޮތުގައި ވެސް މި ފޯމުގައި ފާހަގަ ކޮށްފައިވެއެވެ.
މި މައްސަލައާއި ގުޅިގެން މައުލޫމާތު ސާފުކޮށްލުމަށްޓަކައި މެނޭޖިން ޑިރެކްޓަރ ސައީދަށް ގުޅަން ކުރި މަސައްކަތް ވަނީ ނާކާމިޔާބު ވެފައެވެ. ޑެޕިއުޓީ މެނޭޖިންގް ޑިރެކްޓަރ އިބްރާހިމް ވަހީދުއާ ގުޅާލުމުން އެމަނިކުފާނު ވިދާޅުވީ މި މައްސަލައާއި ގުޅޭ މައުލޫމާތެއް ލިބިފައި ނުވާ ކަމަށެވެ. އަދި ހދ.ކުރިނބީ ޕަވަަރ ހައުސްގެ މަސައްކަތް ހަވާލު ކުރީ ޝެލްޓަރ ހޯލްޑިންގ ޕްރައިވެޓް ލިމިޓެޑަށް ކަމަށާއި ނަމަވެސް އެކުންފުންޏަކީ އެމްޑީ ސައީދުގެ އާއިލީ މަސްލަހަތު އޮންނަ މީހެއްގެ ކުންފުންޏެއްކަން އެނގިފައި ނުވާކަމަށް ވެސް ވިދާޅުވިއެވެ.
